ដេញកាប់បុរសម្នាក់ រហូតជនរងគ្រោះភិតភ័យជិះម៉ូតូទៅបុក​បង្គោលភ្លើង​ស្លាប់

បុរសម្នាក់បានស្លាប់ភ្លាមៗ បន្ទាប់​ពី​មាន​ជនមួយ​ក្រុម​មាន​គ្នា ២នាក់បាន​ជិះម៉ូតូមួយ​គ្រឿង ដេញតាម​កាប់ ធ្វើ​ឱ្យជនរងគ្រោះ​ មាន​ការ​ភិតភ័យខ្លាំង រហូតជិះម៉ូតូទៅបុកបង្គោលភ្លើងស្លាប់នៅហ្នឹងកន្លែង។

ហេតុការណ៍នេះ កើតឡើងកាលពីវេលាម៉ោង ២០ និង២០ នាទីយប់ថ្ងៃទី ១ ខែមិថុនា តាមបណ្តោយផ្លូវជាតិលេខ២ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។ បុរសជនរងគ្រោះឈ្មោះ គឹម សុខឃឿន អាយុ២១ឆ្នាំ ជិះម៉ូតូម៉ាក ស៊ុយស៊ីគីនិច។

ប្រភព​ព័ត៌មាន​ពី​កន្លែង​កើត​ហេតុ​បាន​ឱ្យ​ដឹងថា នៅមុនពេលកើតហេតុ គេឃើញ ជនរង​គ្រោះ​ជិះម៉ូតូមួយគ្រឿងម៉ាក ស៊ុយស៊ីគីនិច ឌុបនារីម្នាក់ធ្វើដំណើរ​តាមបណ្តោយផ្លូវ​ជាតិលេខ២ ក្នុងទិស​ដៅពីត្បូងទៅជើង។

ខណៈកំពុងធ្វើដំណើរ ស្រាប់តែលិចមុខជនមិនស្គាល់មុខ២នាក់ ជិះម៉ូតូមួយគ្រឿង តាម​ពីក្រោយ​ជនរងគ្រោះ រួចធ្វើសកម្មភាពដកកាំបិតប៉ងកាប់លើជនរងគ្រោះ ដោយ​មិនដឹង​មូលហេតុ ធ្វើឱ្យ​ជនរងគ្រោះ មានភាពភ័យព្យាយាមជិះរត់គេច​ពីក្រុមជនសង្ស័យ ក៏ជ្រុលរេចង្កូតម៉ូតូ ទៅបុកនឹងបង្គោលភ្លើង បណ្តាលឱ្យបាក់.ក ស្លាប់ភ្លាមៗ។

ប្រភពប្រព័ត៌មានបន្តថា នារីដែលរួមដំណើរជាមួយជនរងគ្រោះ បន្ទាប់ពីកើតហេតុភ្លាមៗ ត្រូវ​ក្រុម​ជនសង្ស័យ ដឹកយកឡើងតាមម៉ូតូទៅបាត់តែម្តង ដោយដឹងមាន​គោលបំណង​យក​ទៅណា​ប្រាកដឡើយ។

នាយប៉ុស្តិ៍រដ្ឋបាលចាក់អង្រែលើ លោកវរសេនីយ៍ត្រី ជា រតនា ឱ្យដឹងថា គឺជាករណី ដេញតាម​កាប់ជនរងគ្រោះ ខណៈ​ជិះ​ម៉ូតូជាមួយនារីម្នាក់ ( តែមិនទាន់ដឹងថា ជាករណីអ្វី​អោយពិត​ប្រាកដ​ឡើយ) ពោលពុំទាន់ដឹងថា ជាករណីគំនុំ ឬ ឃាតកម្មប៉ងសម្លាប់ឡើយ។

បច្ចុប្បន្នសមត្ថកិច្ចជំនាញ កំពុងស្រាវជ្រាវតាមរយៈកាំមេរ៉ាសុវត្ថិភាព ដើម្បីឈានទៅចាប់ខ្លួនក្រុម​ជជនសង្ស័យយក​ទៅផ្តន្ទា​ទោសតាមនីតិវិធីច្បាប់នៅពេលក្រោយ៕ ដោយៈលីហេង