អាជ្ញាធរ​ចុះ​ដល់​កន្លែង​ទីតាំង​បែ​ចិញ្ចឹម​ត្រី និង​ផ្ទះ​បណ្ដែតទឹក ខណៈ​មាន​ការ​ស្នើ​សុំ​ពន្យារ​ពេល​រក​ទីតាំង​ថ្មី

អាជ្ញា​ធរខណ្ឌច្បារអំពៅ ដឹក​នាំ​ដោយ​លោក រស់ សុភ័ក្ត អភិបាលរងខណ្ឌ​ នៅ​ថ្ងៃទី ២ ខែ​មិថុនា ឆ្នាំ២០២១នេះ បាន​ចុះ​ពិនិត្យនិងចែកសេចក្តីជូនដំណឹងដល់អ្នករស់នៅលើបែចិញ្ចឹមត្រី ផ្ទះ​បណ្តែត​ទឹក ផ្ទះទូកតូចៗ និងសំណង់មិនរៀបរយ លើផ្ទៃទន្លេ ក្នុងភូមិសាស្ត្រ​ខណ្ឌច្បារអំពៅ។​

ការចុះរបស់អាជ្ញាធរ គឺធ្វើឡើង​អនុវត្តតាមស្មារតីនៃសេចក្តីជូនដំណឹង​របស់សាលារាជ​ធានី​ភ្នំ​ពេញ និងសេចក្តីជូនដំណឹងរបស់រដ្ឋបាលខណ្ឌច្បារអំពៅ ចុះថ្ងៃទី២ ខែមិថុនា ឆ្នាំ២០២១ ស្តីពីការរុះរើ ឬចល័តបែចិញ្ចឹមត្រី ផ្ទះបណ្តែតទឹក ផ្ទះទូកតូចៗ និងសំណង់មិនរៀប​រយលើ​ផ្ទៃ​ទន្លេ ក្នុងភូមិសាស្ត្ររាជធានីភ្នំពេញ។

នៅក្នុងយុទ្ធនាការថ្ងៃដំបូងនេះដែរលោកអភិបាលរងខណ្ឌ បានដឹកនាំក្រុមការងារ​ចុះចុះ​ត្រួត​ពិនិត្យ​ណែនាំដល់អ្នករស់នៅលើបែចិញ្ចឹមត្រី ផ្ទះបណ្តែតទឹក ចំនួន៣ទីតាំង រួមមាន​​មុខ​វត្តព្រែកប្រា ក្នុងសង្កាត់ព្រែកប្រា ព្រំប្រទល់ជាមួយសង្កាត់ព្រែកថ្មី មានបែ ចិញ្ចឹមត្រី ផ្ទះបណ្តែត​ទឹកច្រើនជាងគេ ទីតាំងទី២ នៅមាត់ទន្លេបាសាក់ភូមិដើមចាន់ សង្កាត់ច្បារអំពៅទី២ មានផ្ទះទូកតូចៗជាច្រើនឈប់ចតនៅមាត់ច្រាំងទន្លេ និង ទីតាំងទី៣ នៅចំនុចដៃទន្លេមេគង្គក្រោមស្ថិតក្នុងសង្កាត់ព្រែកឯងនិងសង្កាត់ក្បាលកោះ។

បន្ទាប់ពីបានអានខ្លឹមសារនៅក្នុងសេចក្តីជូនដំណឹងនិងបានស្តាប់ការពន្យល់បន្ថែមពីលោកអភិបាលរងខណ្ឌ អ្នករស់នៅលើបែចិញ្ចឹមត្រី ផ្ទះបណ្តែតទឹក ផ្ទះទូកតូចៗ និងសំណង់​មិន​រៀប​រយ​លើផ្ទៃទន្លេ យល់ព្រមអនុវត្តតាមសេចក្តីជូនដំណឹងរបស់រដ្ឋបាលរាជធានីនិងរដ្ឋបាលខណ្ឌច្បារអំពៅ តែ​សុំ​ពន្យាពេលថែមទៀតដើម្បីទុកពេលដើររកទីតាំងថ្មីដាក់កូនត្រីចិញ្ចឹម និងរើផ្ទះបណ្តែតទឹកចេញ ព្រោះនៅក្នុងបែ នីមួយៗសុទ្ធតែកូនត្រីទើបនិងដាក់ចូលចិញ្ចឹម។

ការស្នើសុំពន្យាពេល រុះរើ ឬចល័តបែចិញ្ចឹមត្រី ផ្ទះបណ្តែតទឹក ដែលជាសំណូមពររបស់​អ្នក​រស់​នៅលើទីតាំងទាំងអស់នេះ ត្រូវបានក្រុមការងារលើកយកមកពិចារណានិងសម្រេចនៅពេលក្រោយ។

សេចក្តីជូនដំណឹងរបស់រដ្ឋបាលខណ្ឌច្បារអំពៅចុះថ្ងៃទី២ ខែមិថុនា ឆ្នាំ២០២១ ចុះហត្ថ​លេ​ខា​ដោយលោកចេង មុនីរ៉ា អភិបាលខណ្ឌច្បារអំពៅ គឺទុក រយៈពេល១សប្តាហ៍​ឱ្យ​អ្នក​រស់​នៅលើបែចិញ្ចឹមត្រី ផ្ទះបណ្តែតទឹក ផ្ទះទូកតូចៗ និងសំណង់មិនរៀប​រយលើ​ផ្ទៃទន្លេ​រុះរើ​ចេញ​ដោយ​ខ្លួនឯង បើមិនអនុវត្តតាមសេចក្តីជូនដំណឹង រដ្ឋបាលខណ្ឌនិងមានវិធានកា​រ​រដ្ឋបាល​ដោយ​មិនទទួលខុសត្រូវរាល់ការខូតខាតឡើយ៕

អត្ថបទ៖ នរា