មន្ត្រីរំពឹងថាខែតុលាឆ្នាំនេះ កំណើនភ្ញៀវទេសចរអន្តរជាតិនឹងកើនឡើងវិញ

មន្រ្តីជាន់ខ្ពស់គ្រឹះស្ថានអង្គរបានបង្ហាញក្តីសង្ឃឹមថានៅដើមខែតុលាខាងមុខកម្ពុជាអាចទទួលបានភ្ញៀវទេសចរអន្តរជាតិ​ពិសេសភ្ញៀវមកពីតំបន់អ៊ឺរ៉ុបនឹងកើនឡើងវិញបន្ទាប់ពីកម្ពុជាចាក់វ៉ាក់តាមផែនការដែលបានគ្រោងទុកគឺពី ៧០ ទៅ ៨០ ភាគ​រយ។

លោក លី សែ នាយក​ប្រតិបត្តិ​គ្រឹះ​ស្ថាន​អង្គរ​បានប្រាប់​សារព័ត៌មាន​ឲ្យ​ដឹងនៅថ្ងៃទី៣ ខែ មិថុនាថា៖ «បញ្ហាសព្ធថ្ងៃការរឹតបន្តឹងជាអន្តរជាតិ គឺយើងមិនទាន់អាច បើកបានទេស្ថានភាព​នេះវាមិនមែន​កើត​តែ​​នៅកម្ពុជាទេវាទាក់ទងនឹងទីផ្សារអន្តរ​ជាតិ។ ប៉ុន្តែ​បើយើង​រំពឹងថាបើ​សន្ទុះនៃ​ការចាក់វ៉ាក់សាំង​លឿន​ឧទាហរណ៍កម្ពុជា អាចចាក់វ៉ាក់សាំងបានរហូត ៧០ ទៅ៨០ ភាគរយ និង ការបន្ធូរ​បន្ថយ​ការ​រឹត​បន្តឹង​បន្តិចម្ដងៗ ភ្ញៀវ​អាច​នឹងមកកម្ពុជា។ ប៉ុន្តែយើងនឹងពិនិត្យមើលជាក់ស្តែងទៅ តាមស្ថាន​ភាព​ព្រោះស្ថាន​ភាពបច្ចុប្បន្ន​មិនអាចនិយាយទុកជាមុនទេព្រោះស្ថានភាពវាប្រែប្រួលរហូត»។

លោក លី សែ បានបន្តថាជារួមការរំពឹងទុកក្នុងរង្វង់ខែតុលា​គឺយើងអាចបន្ធូរបន្ថយ​ការរឹតបន្តឹងបន្តិច​ម្តងៗដូច្នេះវិធានការយើងនឹងដកពិសោធន៍ទៅតាមប្រទេស ផ្សេងៗនៅក្នុងតំបន់ដូចជា ថៃ ម៉ាឡេស៊ី សិង្ហបុរី ប្រសិនជាប្រសិទ្ធភាពនៃការចាក់វ៉ាក់សាំង២ដូសហើយនោះ​តើកម្រិតនៃការចម្លង​ពីមួយទៅ​មួយ​នៅរក្សាគម្លាត បានតើយើងអាចលើកលែងការរឹតបន្តឹងបានប៉ុន្មាន ? ប្រសិនមានការលើក​លែង​ការរឹតបន្តឹងភ្ញៀវនឹងមក។

លោក លី សែ បានឲ្យដឹងទៀតថា៖ធ្លាប់មានក្រុមហ៊ុនទេសចរណ៍អ៊ឺរ៉ុប​បានមកទាក់​ទង​ជាមួយ​លោក​ច្រើនដែរ។ ប៉ុន្តែស្ថានការណ៍មិនទាន់អំណោយផលដល់ ការបើកទួលាយសម្រាប់​ការធ្វ់ដំណើរ​នៅ​ឡើយ​។

សូមរម្លឹកជូនថាក្នុងរយៈពេល ៥​ ខែឆ្នាំ ២០២១ នេះ គ្រឹះស្ថានអង្គរបានលក់​ប័ណ្ណចូលទស្សនា​អង្គរ​បាន​ជិត ៥,០០០ នាក់ដែលចំនួននេះបានធ្លាក់ចុះប្រមាណ ៩៨ ភាគរយបើប្រៀបធៀបរយៈ​ពេល​ដូចគ្នានៅឆ្នាំ ២០២០ ដោយទទួលចំណូលបានប្រមាណ ២០ ម៉ឺនដុល្លារអាមេរិក។

ប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោ ហ៊ុន សែន បានថ្លែងថា​យើងនឹង​ខិត​ខំចាក់​វ៉ាក់សាំងជូនប្រជាពលរដ្ឋឲ្យបាន ១០ លាននាក់នៅមុន ដំណាច់ឆ្នាំនេះ ឬក៏ដើមឆ្នាំ​ក្រោយ​តែម្ដង៕ អត្ថបទ៖ ណារី