ព័ត៌មានជាតិ

ឆក់កាបូបបានសម្រេចគេចខ្លួនបាន១ថ្ងៃ ស្អែកចេញឆក់ទៀត ត្រូវសមត្ថកិច្ចក្របួចជាប់

បានផុស

៥ years មុន

នៅ

ថ្ងៃអង្គារ ២២ មិថុនា ២០២១

ដោយ

ជនសង្ស័យមួយក្រុមមានគ្នា៤នាក់ ជិះម៉ូតូ២គ្រឿង បានធ្វើសកម្មភាពឆក់កាបូបលុយពីស្ត្រីម្នាក់បានសម្រេច កាលពីវេលាម៉ោង២០យប់ថ្ងៃទី២០ ខែមិថុនា ឆ្នាំ២០២១ នៅចំណុចមុខផែស្ងួតតេងឡាយ តាមបណ្តោយមហាវិថីឈ្នះឈ្នះ ក្នុងភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ហើយព្យាយាមគេចខ្លួនបាត់ លុះមកដល់វេលាម៉ោង១៧ និង៣០នាទីយប់ថ្ងៃទី២១ ខែមិថុនា ឆ្នាំ២០២១ ជនសង្ស័យជិះម៉ូតូបម្រុងធ្វើសកម្មភាពទៀត តែជួបកម្លាំងល្បាត ក៏ភ័យជិះម៉ូតូគេចខ្លួនតែត្រូវសមត្ថកិច្ចដេញតាមរហូតឃាត់បានជនសង្ស័យ២នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនសង្ស័យទី១ឈ្មោះ អេង វ៉ាន់ជា ភេទប្រុស អាយុ២៨ឆ្នាំ មុខរបរកម្មករសំណង់ ស្នាក់នៅភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ។ ទី២ឈ្មោះ រ៉េត ចាន់ណា ភេទប្រុស អាយុ២៦ឆ្នាំ មុខរបរកម្មករលើកបេតុង ស្នាក់នៅភូមិជម្ជូវ័ន សង្កាត់ចោមចៅទី៣ ខណ្ឌពោធិ៍សែនជ័យ ។ ជនរងគ្រោះឈ្មោះ ហាន់ សូដានី ភេទស្រី អាយុ៥១ឆ្នាំ មុខរបរលក់ដូរ ស្នាក់នៅភូមិសាមគ្គី សង្កាត់ត្រពាំងក្រសាំង ខណ្ឌពោធិ៍សែនជ័យ។

សម្ភារៈដែលបាត់បង់រួមមាន៖ ទូរស័ព្ទម៉ាកសាំយុង១គ្រឿង លុយចំនួន៤៨០០០០រៀល។ តាមប្រភពព័ត៌មាន បានឱ្យដឹងថា មុនពេលកើតហេតុជនរងគ្រោះ បានជិះម៉ូតូតាមដងមហាវិថីឈ្នះឈ្នះ ភ្លាមនោះស្រាប់តែលេចមុខជនសង្ស័យចំនួន៤នាក់ជិះម៉ូតូ២គ្រឿង ដោយមួយគ្រឿងម៉ាកនិច និងមួយគ្រឿងទៀតម៉ាកសង់ប៉ិច មកធ្វើសកម្មភាពឆក់ការស្ពាយពីស្ត្រីរងគ្រោះបានសម្រេចហើយគេចខ្លួនបាត់អស់។ ក្រោយកើតហេតុជនរងគ្រោះ បានទៅដាក់ពាក្យបណ្តឹងនៅប៉ុស្តិ៍នគរបាលត្រពាំងក្រសាំង ដើម្បីសុំការអន្តរាគមន៍។

លុះមកដល់ថ្ងៃទី២១ ខែមិថុនា ឆ្នាំ២០២១ កម្លាំងនគរបាលប៉ុស្តិ៍ត្រពាំងក្រសាំង បានល្បាតកន្លែងងាយរងគ្រោះ ខណៈមកដល់មុខផ្សារបឹងបៃតង ស្រាប់តែប្រទះឃើញជនសង្ស័យ២នាក់ជិះម៉ូតូម៉ាកនិចពណ៌ស ពាក់ស្លាកលេខភ្នំពេញ1IA 2793 ដោយមានការសង្ស័យក៏ហៅឈប់ដើម្បីត្រួតពិនិត្យ ភ្លាមនោះជនសង្ស័យទាំង២មិនឈប់និងព្យាយាមគេចខ្លួនតែត្រូវសមត្ថកិច្ចដេញចាប់បានម្នាក់ ដោយឡែកម្នាក់ទៀតបន្តជិះម៉ូតូគេចខ្លួនរហូតមកដល់ជិតប៉ុស្តិ៍នគរបាលចោមចៅទី៣ ទើបសមត្ថកិច្ចដេញចាប់បានតែម្តង។

នៅចំពោះមុខសមត្ថកិច្ចជនសង្ស័យបានសារភាពថា ខ្លួនពិតជាបានធ្វើសកម្មភាពឆក់កាបូបស្ត្រីរងគ្រោះពិតប្រាកដមែន ទើបសមត្ថកិច្ចកសាងសំណុំរឿងបញ្ជូនទៅផ្នែកព្រហ្មទណ្ឌដើម្បីចាត់ការបន្ត៕

អត្ថបទ៖ សុខា

Related Topics:ចោរឆក់