លម្អិត​បន្ថែម​ពីអគ្គិភ័យ​ឆេះ​ហាង​លក់វិទ្យុទាក់ទង ​ខ្ទេចទាំងស្រុង ជាប់​ខាងជើង​ផ្សារ​ទួលទំពូង

ភ្នំពេញ ៖ ហេតុការណ៍គ្រោះអគ្គិភ័យ ឆេះហាងលក់វិទ្យុទាក់ទង សមត្ថកិច្ចជំនាញបង្រ្កាប​សង្គ្រោះនិងពន្លត់អគ្គិភ័យ ​បាន​ប្រើប្រាស់រថយន្តពន្លត់អគ្គិភ័យ​ចំនួន ១២គ្រឿង បាញ់ទឹកអស់ ២៤ឡាន​។   

សមត្ថកិច្ចប្រាប់​ឲ្យ​ដឹងថា កាលពីវេលាម៉ោង ១៧ និង១៥ នាទីល្ងាចថៃ្ងអាទិត្យម្សិលមិញ មានគ្រោះអគ្គីភ័យមួយកន្លែងកើតឡើងនៅចំណុចហាងលក់វិទ្យុទាក់ទងយីហោ មករា តេឡេកូបសប ស្ថិតផ្លូវលេខ៤៣២ ក្រុម១២ ភូមិ៣ សង្កាត់ទួលទំពូងទី១ ខណ្ឌចំការមន រាជធានីភ្នំពេញ។ ម្ចាស់ឈ្មោះ:  សៀង សេរីវឌ្ឍនា ភេទប្រុស អាយុ៣៣ឆាំ្ន ​អាជីវករ​លក់ និងវិទ្យុទាក់ទង។ 

ប្រភពព័ត៌មានប្រាប់បន្ត​ឲ្យ​ដឹងថា មូលេហតុ​នាំអោយកើតមានគ្រោះអគ្គិភ័យនេះ គឺបណ្តាលមកពីឆ្លងចរន្តអគិ្គសនី។ប្រភេទសំណង់ ថ្មបេតុងប្រក់សង័្កសីទំហំ ឆេះផ្ទះ ទំហំ ០៨ម៉ែត្រ x ១៤ម៉ែត្រ ជាន់ផ្ទាល់ដីឆេះអស់ទាំងស្រុង រួមទាំង​ឆេះសម្ភាឧបករណ៍វិទ្យុទាក់ទងអស់ទាំងស្រុង ប៉ុន្តែមិនបានឆេះរាលដាលដល់ផ្ទះអ្នកជិតខាងឡើយ។ ចំពោះមនុស្សក៏មិនប៉ះពាល់ដែរ។    

នៅក្នុងប្រតិបត្តិការណ៍​នេះដឹកនាំផ្ទាល់ដោយលោកវរសេនីយ៍ឯក ព្រុំ យ៉ន នាយការិយាល័យនគរបាលជំនាញបង្ក្រាប សង្គ្រោះ និងពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពេញ ប្រើប្រាស់រថយន្តការិអគ្គិភ័យ​​ចំនួន ១២គ្រឿង ប្រេីប្រាស់ទឹកអស់ចំនួន​ ២៤ឡាន​ស្មេីនឹង ៩៦ម៉ែត្រគូប ។ ក្នុងនោះ រថយន្តជំនួយអន្តរាគមន៍ពន្លត់មានដូចជា រថយន្តក្រសួងមហាផ្ទៃចំនួន ០២គ្រឿង ប្រើប្រាស់ទឹកអស់ចំនួន ០៤ឡានសើ្មនឹង ២៤ម៉ែត្រគូប រថយន្ត OCIC កោះពេជ្រចំនួន ០២គ្រឿង ប្រើប្រាស់ទឹកអស់ចំនួន ០២ឡាន  សើ្មនឹង១២ ម៉ែត្រគូប រថយន្តផ្សារទំនើបអូឡាំព្យាចំនួន ០២គ្រឿង ប្រើប្រាស់ទឹកអស់ចំនួន ០២ឡាន សើ្មនឹង ១២ម៉ែត្រគូប រថយន្តក្រុមហ៊ុនស្រាបៀរកម្ពុជាចំនួន ០១គ្រឿង  ប្រើប្រាស់ទឹកអស់ចំនួន ០១ឡានសើ្មនឹង ០៦ ម៉ែត្រគូប ៕

អត្ថបទ៖ រ៉ាវុទ្ធ