គ្រួសារសពទាំង ៤ នាក់ ស្លាប់ដោយគ្រោះអគ្គិភ័យទទួលបានថវិកា និងក្ដារមឈូសសម្រាប់ធ្វើបុណ្យតាមប្រពៃណី

គ្រួសារជនរងគ្រោះដែលស្លាប់ដោយគ្រោះអគ្គិភ័យចំនួន ០៤នាក់ នៅថ្ងៃទី ២៩ ខែមិថុនានេះ បានទទួលថវិកា និងក្ដារមឈូស ពីសំណាក់ អភិបាលរាជធានីភ្នំពេញ តាមរយៈលោកអភិបាលខណ្ឌដូនពេញ។

លោក សុខ ពេញវុធ អភិបាលនៃគណៈអភិបាលខណ្ឌដូនពេញ នាំយកបច្ច័យ និងក្តារមឈូសចំនួន ០៤ ជាការចូលរួមរំលែកមរណទុក្ខរបស់ លោក ឃួង ស្រេង អភិបាល នៃគណៈអភិបាលរាជធានីភ្នំពេញ ជាមួយក្រុមគ្រួសារសពប្រជាពលរដ្ឋរងគ្រោះចំនួន ០៤នាក់ ដែលបានបាត់បង់ជីវិត ក្នុងឧបទ្ទវហេតុគ្រោះអគ្គិភ័យ ទៀបភ្លឺថ្ងៃទី២៩ ខែមិថុនា ឆ្នាំ២០២១ ស្ថិនៅផ្លូវលេខ២០០ សង្កាត់បឹងរាំង ខណ្ឌដូនពេញ រាជធានីភ្នំពេញ។

ស្ថិតក្នុងស្ថានភាពដ៏សោកសង្រេងនេះ លោកអភិបាល ខណ្ឌដូនពេញបានប្រគល់ថវិកាចំនួន ១លានរៀល និងក្តារមឈូស​ចំនួន០៤ សរុបថវិកាចំនួន ៧លានរៀល ជូនដល់គ្រួសារសពនីមួយៗ ដើម្បីចូលរួមរំលែកទុក្ខដ៏ក្រៀមក្រំដល់គ្រួសារសព និងសូមបួងសួងដល់វិញ្ញាណក្ខន្ធបានទៅកាន់សុគតិភពកុំបីឃ្លៀងឃ្លាតឡើយ។

ជាមួយគ្នានោះដែរគ្រួសារសពទាំង៤ ក៏បានគោរពថ្លែងអំណរគុណយ៉ាងជ្រាលជ្រៅបំផុត និងរកអ្វីមកប្រៀបផ្ទឹមមិនបានឡើយចំពោះទឹកចិត្ត សណ្តោសប្រណី ប្រកបដោយសប្បុរសធម៌របស់ អភិបាលរាជធានីភ្នំពេញ ដែលតែងតែគិតគូរពីសុខទុក្ខរបស់ប្រជាពលរដ្ឋ នៅពេលដែលពួកគាត់ជួបទុក្ខលំបាក។

ក្រោយពីបានទទួលនូវបច្ច័យនិងក្តារមកឈូសរួច តំណាងក្រុមគ្រួសារសពទាំង០៤នាក់ បានគោរពជូនពរលោកអភិបាលរាជធានីនិងលោកអភិបាលខណ្ឌដូនពេញព្រមទាំងក្រុមគ្រួសារ និងក្រុមការងារ ទាំងអស់ សូមទទួលបាននូវជោគជ័យគ្រប់ភារកិច្ច ឈ្នះអស់មារសត្រូវ និងសុខភាពល្អបរិបូរណ៍ ព្រមទាំងជៀសផុតពីជម្ងឺកាចសាហាវទាំងពួង កុំបីឃ្លៀងឃ្លាតឡើយ៕

អត្ថបទ៖ រស្មី