ខេត្តបាត់ដំបង​នៅតែមាន​សន្ទុះ​ខ្ពស់ នៃការឆ្លង​ជំងឺ​កូ​វីដ​-១៩ ​

នៅ​ល្ងាច​ថ្ងៃទី៤ ខែកក្កដា ឆ្នាំ២០២១ នេះ រដ្ឋបាលខេត្តបាត់ដំបងបានប្រកាស​អត្តសញ្ញាណ និងបាន​រក​ឃើញ​អ្នក​ឆ្លង​ជំងឺ​កូ​វីដ​-១៩ ថ្មីបន្ថែមទៀត ដែលមាន​កំណើន​កាន់តែ​ខ្ពស់រហូតដល់៥៧នាក់ សម្រាប់​ថ្ងៃទី៤ នេះ ហើយ​បើ​គិត​សរុប​អ្នក​ផ្ទុក​កូ​វីដ​នៅក្នុង​ខេត្ត រហូតមកដល់ពេលនេះ គឺមាន​ចំនួន​រហូតដល់១,១៧៦ នាក់​ហើយ​។​

យោងតាម​របាយការណ៍​ដែល​កម្ពុ​ជាថ្មីទទួលបាននៅ​ល្ងាចថ្ងៃទី៤ ខែកក្កដា ឆ្នាំ​២០២១ នេះ បានបញ្ជាក់​ពី​ការរកឃើញ​អ្នក​ផ្ទុក​ថ្មី បន្ថែមទៀត​គឺមាន​ចំនួន៥៧ នាក់ ដែល​ក្នុងនោះ​គឺ​ពលករ​មកពី​ប្រទេស​ថៃ​មាន​ចំនួន ២៦នាក់ ពាក់ព័ន្ធ​នឹង​សហគមន៍២០កុម្ភៈ មាន​ចំនួន៣១នាក់ ព្រមទាំង​មាន​អ្នកជា​សះស្បើយ​ចំនួន៣នាក់​ផងដែរ ។​

បើ​គិត​រហូតមកដល់​ថ្ងៃទី៤ ខែកក្កដា ឆ្នាំ​២០២១​នេះ អ្នក​ឆ្លង​ជំងឺ​កូ​វីដ​-១៩ នៅក្នុង​ខេត្តបាត់ដំបង មាន​ចំនួន​សរុប១,១៧៦ នាក់ ជាសះស្បើយ​មាន​ចំនួន៦១២ នាក់ ស្លាប់​បាន​កើនឡើង​ដល់៧ នាក់ និង​អ្នក​ដែល​កំពុង​សម្រាក​ព្យាបាល​នៅក្នុង​មន្ទីរពេទ្យ​ខេត្ត មាន​ចំនួន៥៥៧នាក់​៕

អត្ថបទ ៖ សោ និយម​រ័ត្ន​