ព័ត៌មានជាតិ

រថយន្តធុនធំបុកគោយន្តកន្ត្រៃយ៍ពេញទំហឹង បង្កឲ្យមនុស្ស៨នាក់របួសធ្ងន់ស្រាល

បានផុស

៥ years មុន

នៅ

ថ្ងៃអង្គារ ១៣ កក្កដា ២០២១

ដោយ

បាត់ដំបង ៖ មនុស្សប្រុសស្រីចំនួន៨នាក់បានរងរបួសធ្ងន់ស្រាល ខណៈមានករណីចរាចរណ៍មួយបានកើតឡើងបង្កដោយរថយន្តដឹកទំនិញធុនធំ១គ្រឿងបុកជាមួយគោយន្តកន្ត្រៃយ៍លើកំណាត់ផ្លូវជាតិលេខ៥។

លោកវរសេនីយ៍ឯក គឹម ឡុង អធិការនគរបាលស្រុកមោងឫស្សីបានប្រាប់ឲ្យដឹងថា គ្រោះថ្នាក់ចរាចរណ៍ខាងលើបានកើតឡើងនៅវេលាម៉ោង០១:១៥នាទីរំលងអធ្រាត្រ ថ្ងៃទី១១ឈានចូលថ្ងៃទី១២ខែកក្កដាឆ្នាំ២០២១តាមបណ្តោយផ្លូវជាតិ៥ ត្រង់ចន្លោះបង្គោលគីឡូម៉ែត្រលេខ២២៣.២២៤ឋិតក្នុងក្រុមទី១១ ភូមិថ្នល់បត់ ឃុំឫស្សីក្រាំង ស្រុកមោងឫស្សីខេត្តបាត់ដំបង។

លោកអធិការបន្តថា មុនពេលកើតហេតុគេឃើញរថយន្ត១គ្រឿងម៉ាកFUSOប្រភេទដឹកទំនិញពណ៌ស ពាក់ស្លាកលេខភ្នំពេញ៣A-៩៩២៤ ទំនងម្ចាស់ងងុយដេកក៏រ៉េចង្កូតទៅបុកគោយន្តកន្ត្រៃយ៍ពេញទំហឹង ខណៈដែលធ្វើដំណើរបញ្ច្រាសទិសគ្នាពីខេត្តបាត់ដំបងឆ្ពោះទៅកាន់ទីក្រុងភ្នំពេញបណ្តាលឲ្យភាគីទាំងអស់ប៉ើងធ្លាក់ផ្លូវចាក់អ្នកធ្វើដំណើររាយប៉ាយពេញប្រឡាយតែម្តង។

គ្រោះថ្នាក់នេះបណ្តាលឲ្យអ្នកជិះគោយន្តកន្ត្រៃយ៍ដែលមានគ្នាចំនួន០៧នាក់បានរងរបួសធ្ងន់និងស្រាលក្នុងនោះមានកូនតូចម្នាក់ផងតែមិនមានគ្រោះថ្នាក់ធ្ងន់ធ្ងរទេ រួមនឹងអ្នកបើកបរឈ្មោះអេង.ឃីមភេទប្រុស អាយុ១៨ឆ្នាំ រស់នៅភូមិទួលរកា ឃុំឫស្សីក្រាំង ស្រុកមោងឫស្សីរងរបួសធ្ងន់ហើយអ្នករួមដំណើរចំនួន៣នាក់ក្នុងចំណោមអ្នកទាំង៧នាក់បានរងរបួសធ្ងន់ធ្ងរ។

សមត្ថកិច្ចបញ្ជាក់ថា ក្រោយកើតហេតុភ្លាមៗនោះ អ្នកបើកបររថយន្តFUSOបានរត់គេចខ្លួនបាត់ស្រមោលហើយអ្នករងគ្រោះខាងលើកំពុងសង្គ្រោះនៅមន្ទីរពេទ្យបង្អែកស្រុក ចំណែករថយន្តបង្កនិងគោយន្តកន្ត្រៃយ៍រងគ្រោះត្រូវបានសមត្ថកិច្ចយកទៅរក្សាទុករង់ចាំបន្តនីតិវិធី៕

ដោយ ៖ សៅ សារិទ្ធ

Related Topics:គ្រោះថ្នាក់ចរាចរណ៍

សេចក្ដីជូនដំណឹង១ សប្តាហ៍ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា