រដ្ឋាភិបាលបន្តឧបត្ថម្ភប្រាក់ដល់គ្រួសារក្រីក្រ និងងាយរងគ្រោះក្នុងអំឡុងកូវីដ ៣ខែទៀត

ភ្នំពេញ៖ រាជរដ្ឋាភិបាលកម្ពុជាបានសម្រេចឧបត្ថម្ភសាច់ប្រាក់ ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធប្រឆាំងជំងឺកូវីដ-១៩ សម្រាប់ជុំទី៦ ដែលមានរយៈពេល៣ខែជាបន្តទៀត គឺខែកក្កដា ខែសីហា និងខែកញ្ញា ឆ្នាំ២០២១ ដើម្បីជួយសម្រាលការលំបាក់របស់ប្រជាពលរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស្រី ដា អ្នកនាំពាក្យក្រសួងផែនការ បានមានប្រសាសន៍នៅថ្ងៃទី១៥ ខែកក្កដានេះថា​ កម្មវិធីឧបត្ថម្ភសាច់ប្រាក់នេះ រាជរដ្ឋាភិបាលកម្ពុជាបានអនុវត្តចាប់ពីខែមិថុនា ឆ្នាំ២០២០មកម្ល៉េះ ដែលមានគ្រួសារក្រីក្រសរុបចំនួនប្រមាណ៧០ម៉ឺនគ្រួសារ ស្មើនឹងប្រជាជនសរុបចំនួនប្រមាណ២លាន៨សែននាក់ កំពុងទទួលផលបើកប្រាក់ឧបត្ថម្ភពីកម្មវិធីនេះ។

លោក បានបន្តថា ដោយសាររដ្ឋាភិបាលមើលឃើញពីស្ថានភាពនៃការរីករាលជំងឺកូវីដ-១៩នៅបន្ត និងបានប៉ះពាល់ជីវភាពគ្រួសារក្រីក្រ និងងាយរងគ្រោះនោះ ទើបរាជរដ្ឋាភិបាលបានសម្រេចបន្តបើកផ្តល់ប្រាក់ឧបត្ថម្ភបន្ត៣ខែទៀត គឺខែកក្កដា ខែសីហា និងខែកញ្ញា ឆ្នាំ២០២១។

បើតាម ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា ការបើកផ្តល់ប្រាក់ឧបត្ថម្ភសាច់ប្រាក់ដល់គ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធប្រឆាំងជំងឺកូវីដ-១៩ ត្រូវធ្វើឡើងក្នុងសប្ដាហ៍ទី៤ នៃខែនីមួយៗ។

ក្រសួងសេដ្ឋកិច្ចបានបញ្ជាក់ថារយៈពេលអនុវត្តបន្តកម្មវិធីឧបត្ថម្ភសាច់ប្រាក់នេះនឹងត្រូវកំណត់ដោយឡែក ផ្អែកតាមសភាពការវិវត្តន៍ជាក់ស្តែង៕

អត្ថបទ៖ សំអឿន