អាជ្ញាធរយកសាច់ក្របីក្លាស្សេ ៣ កុងតឺន័រ​មានផ្ទុកមេរោគកូវីដ-១៩ ​ទៅដុតបំផ្លាញចោល នៅស្រុកឱរ៉ាល់

កម្ពុជារកឃើញសាច់ក្របីក្លាស្សេ ចំនួន ៣ កុងតឺន័រ នាំចូលពីប្រទេសឥណ្ឌា​មានផ្ទុកមេរោគកូវីដ១៩។ សាច់ក្របីនោះ នឹងត្រូវនាំយកមកដុតបំផ្លាញចោល ក្នុងស្រុកឱរ៉ាល់ ខេត្តកំពង់ស្ពឺ នៅថ្ងៃទី ២៧ ខែកក្កដានេះ។

លោក វ៉ី សំណាង អភិបាលខេត្តកំពង់ស្ពឺ បានឱ្យដឹងថា សាច់ក្របីទាំង ៣ កុងតឺន័រ នឹងត្រូវដុតបំផ្លាញចោល នៅស្រុកឱរ៉ាល់ នៅថ្ងៃទី ២៧ ខែកក្កដានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក វ៉ី សំណាង ក៏បានអំពាវនាវ ដល់ប្រជាពលរដ្ឋ ដែលទិញសាច់គោ សាច់ក្របី ត្រូវប្រុងប្រយ័ត្ន ហើយសួរនាំឱ្យបានច្បាស់លាស់ ពីប្រភេទនៃសាច់ក្លាស្សេទាំងនោះ ដែលនាំចូលពីឥណ្ឌា មានផ្ទុកមេរោគកូវីដ ហើយគយចាប់បាន។

អគ្គនាយកដ្ឋានគយ និងរដ្ឋាករកម្ពុជា កាលពីថ្ងៃទី ១៩ ខែមិថុនា បានប្រកាសសម្រេចអនុញ្ញាតឱ្យនាំចូលសាច់បង្កក និងមុខទំនិញបង្កកពីប្រទេសឥណ្ឌាឡើងវិញ ក្រោយពីផ្អាកមួយរយៈ បន្ទាប់ពីមានករណីឆ្លងរីករាលដាលជំងឺកូវីដ-១៩ច្រើន នៅប្រទេសឥណ្ឌា។

ទោះយ៉ាងណាការលើកលែងបម្រាមនេះ ក៏ដាក់ជំនួសមកវិញនូវវិធានការបណ្ដោះអាសន្នមួយចំនួនរួមមាន៖

• តម្រូវឱ្យមានវិញ្ញាបនបត្រ ឬលិខិតបញ្ជាក់បន្ថែមចេញដោយ អាជ្ញាធរមានសមត្ថកិច្ច នៃប្រទេសដើមកំណើតទំនិញ ដែលបញ្ជាក់ថាគ្មានវិរុសកូវីដ១៩ លើកសាច់បង្កក
• នៅពេលទំនិញមកដល់តម្រូវឱ្យធ្វើតេស្តសំណាករកវិរុសកូវីដ១៩ ដោយវិទ្យាស្ថានប៉ាស្ទ័រកម្ពុជា មុនពេលអនុញ្ញាតឱ្យបំពេញបែបបទបញ្ចេញទំនិញពីគយ៕ ដោយៈ ឡេង ដេត