អត្រាគ្រោះថ្នាក់ចរចរណ៍ស្លាប់ និងរងរបួស ខែកក្កដាកើនឡើង គួរឱ្យព្រួយបារម្ភ

ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ត្រីក្រសួងមហាផ្ទៃ នៅថ្ងៃទី១ ខែសីហានេះបានថ្លែងឱ្យដឹងអំពីលទ្ធផលការងារសុវតិ្ថភាពចរាចរណ៍ប្រចាំ ខែកក្កដា ឆ្នាំ២០២១ ដែលអត្រាគ្រោះថ្នាក់ស្លាប់ និងរងរបួសមានការថយចុះបើប្រៀបធៀបនឹងខែកក្កដាដូចគ្នាឆ្នាំ២០២០ ប៉ុន្តែវាជាការគួរឱ្យព្រួយបារម្ភ ដែលអត្រាគ្រោះថ្នាក់ស្លាប់ និងរងរបួសមានការកើនឡើងបើប្រៀបធៀបនឹងខែមិថុនា ឆ្នាំ២០២១កន្លងទៅនេះ។

របាយការណ៍របស់អគ្គស្នងការដ្ឋាននគរបាលជាតិបានបង្ហាញថា ក្នុងខែកក្កដាឆ្នាំ ២០២១នេះគ្រោះថ្នាក់ចរាចរណ៍បានកើតឡើង២០៨លើក ក្នុងនោះគ្រោះថ្នាក់កើតមានឡើងនៅពេលយប់មាន ៥៨% ដែលបណ្តាលឱ្យមនុស្សស្លាប់ចំនួន១០៧នាក់ និងរងរបួសធ្ងន់ស្រាលមានចំនួន២៨២នាក់។ ទិន្នន័យនេះបើប្រៀប ធៀបនឹងខែកក្កដា ឆ្នាំ២០២០ គឺចំនួនអ្នកស្លាប់មានការថយចុះ៤០នាក់ ស្មើនឹង២៧ភាគរយ រីឯអ្នករងរបួសគឺថយចុះ៧០នាក់ ស្មើនឹង២០ភាគរយ។​ ប៉ុន្តែបើធ្វើការប្រៀបធៀបគ្រោះថ្នាក់ចរាចរណ៍ក្នុងខែមិថុនាឆ្នាំ២០២១នេះវិញ គឺចំនួនអ្នកស្លាប់បានកើនឡើង១៤នាក់ ស្មើនឹង១៥% និងចំនួនអ្នករងរបួស៣៩នាក់ ស្មើនឹង១៦%។

មូលហេតុដែលបង្កឱ្យមានគ្រោះថ្នាក់ទាំងនេះ គឺបណ្តាលមកពីការបើកបរដោយល្បឿនលឿនមាន៣៧% ការមិនគោរពសិទ្ធិមាន ២២% ការមិនប្រកាន់ស្តាំ​ ១៧% ការវ៉ាជែងមាន១០% បើកបរក្នុងស្ថានភាពស្រវឹងមាន៥% និងកត្តាយានយន្តមាន១%។ ចំណែកឯភូមិសាស្រ្តដែល មានគ្រោះថ្នាក់ច្រើនគឺនៅរាជធានីភ្នំពេញមានចំនួន៦៦​​លើក នៅខេត្តកណ្តាល ១៦លើក និងនៅខេត្តស្វាយរៀង១៥លើក។

សម្ដេចក្រឡាហោម ស ខេង មានប្រសាសន៍ថា ផ្អែកលើទិន្នន័យខាងលើនេះបានបង្ហាញថា ស្ថានភាពគ្រោះថ្នាក់ចរាចរណ៍បានកើតឡើងភាគច្រើនបំផុតដោយសារតែមូលហេតុការបើកបរមិនគោរពច្បាប់។ ឆ្លៀតនៅក្នុងឱកាសនេះសម្តេចបានអំពាវនាវដល់បងប្អូនជនរួមជាតិ ជាពិសេសអ្នកបញ្ជាយានយន្តទាំងអស់សូមមេត្តា ប្រកាន់ខ្ជាប់នូវស្មារតីបើកបរដោយការគោរពច្បាប់ចរាចរណ៍ និងប្រុងប្រយ័ត្នគ្រប់ពេលវេលាដើម្បីចៀសផុតគ្រោះថ្នាក់ដល់ខ្លួនយើង គ្រួសារ អ្នករួមដំណើរជាមួយយើង និងសង្គមជាតិយើង។

ជាមួយគ្នានេះសម្តេចក៏បានថ្លែងអំណរគុណយ៉ាងជ្រាលជ្រៅបំផុតចំពោះបងប្អូនជនរួមជាតិ អ្នកបញ្ជាមធ្យោបាយធ្វើដំណើរគ្រប់ប្រភេទដែលបានប្រកាន់នូវឥរិយាបថជាពលរដ្ឋល្អ តាមរយៈការចូលរួមគោរពច្បាប់ចរាចរណ៍យ៉ាងខ្ជាប់ខ្ជួនគ្រប់ពេលធ្វើដំណើរ។ សម្តេចក៏បានថ្លែងការអរគុណ និងកោតសរសើរខ្ពស់ចំពោះស្មារតី យកចិត្តទុកដាក់បំពេញភារកិច្ចដឹកនាំការអនុវត្តច្បាប់ស្ដីពីចរាចរណ៍ផ្លូវគោកទាំងយប់ទាំងថ្ងៃរបស់ថ្នាក់ដឹកនាំនិងមន្រ្តីនគរបាលនៃអគ្គស្នងការដ្ឋាននគរបាលជាតិ គណៈបញ្ជាការឯកភាពរដ្ឋបាលរាជធានីខេត្ត ស្នងការដ្ឋាននគបាលរាជធានីខេត្ត អធិការដ្ឋាននគរបាលក្រុងស្រុកខណ្ឌ និងសមត្ថកិច្ចរួមសហការផ្សេងទៀតដែល​បានបំពេញភារកិច្ចក្នុងការរក្សាសុវត្ថិភាពចរាចរណ៍ជូនប្រជាពលរដ្ឋ ទោះបីក្នុងពេលដែលពិភពលោកក៏ដូចប្រទេសកម្ពុជាកំពុងរងការរាតត្បាតនៃ ជំងឺកូវីដ-១៩៕

​អត្ថបទ៖ ណារី