ការចាក់វ៉ាក់សាំង AstraZeneca ទី៣ សម្រាប់ថ្នាក់ដឹកនាំ​ និង​មន្រ្តី​រាជការ​ ចាប់ផ្ដើមនៅសប្ដាហ៍នេះ

ក្រសួងសុខាភិបាលនៅថ្ងៃទី០៩ ខែសីហា ឆ្នាំ២០២១នេះ បានប្រកាសពីដំណើរការចាក់វ៉ាក់សាំង AstraZeneca ​ដូសជំរុញ ឬដូសទី៣ នៅរាជធានីភ្នំពេញ សម្រាប់មន្ត្រីរាជការស៊ីវិល និងមន្ត្រីជាប់កិច្ចសន្យា ដែលកំពុងបម្រើការនៅថ្នាក់ជាតិ ព្រមទាំងថ្នាក់ដឹកនាំ​ជាន់ខ្ពស់ ដែល​តួនាទីជាឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី រដ្ឋលេខាធិការ ឬមានឋានៈស្មើ​ ដែលនឹងចាប់ផ្ដើមចាប់ពីថ្ងៃទី១២ ខែសីហានេះ។

បើតាមក្រសួងសុខាភិបាលបញ្ជាក់ថា យោងតាមអនុសាសន៍ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃទី០៦ ខែសីហា ឆ្នាំ២០២១ គណៈ​កម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខ័ណ្ឌទូទាំងប្រទេស នឹងផ្ដល់ការចាក់វ៉ាក់សាំង AstraZeneca ​ដូសទី៣ ជូនដល់ក្រុមគ្រូពេទ្យជួរមុខ ទាំងរដ្ឋ និងឯកជន និងដល់មន្ត្រីរាជការ ស៊ីវិលថ្នាក់ជាតិ និងថ្នាក់ក្រោមជាតិ នៅតាមរាជធានី ខេត្ត ជាបន្តបន្ទាប់ ព្រមទាំងកងទ័ព គ្រួសារកងទ័ព នគរបាលជាតិ និងអតីតយុទ្ធជនផងដែរ។

​ក្រសួងសុខាភិបាលបញ្ជាក់ថា ចំពោះមន្ត្រីរាជការស៊ីវិល និង​មន្ត្រីជាប់កិច្ចសន្យា ដែល​កំពុងបម្រើ​ការនៅថ្នាក់ជាតិ ដែលបានចាក់វ៉ាក់សាំងស៊ីណូហ្វាម ឬស៊ីណូវ៉ាក់ ដូសទី១ និងដូសទី២ ​រួចរាល់ ត្រូវ​ទៅចាក់វ៉ាក់សាំង AstraZeneca ​ដូសជំរុញ ឬដូសទី៣ ចាប់ពីថ្ងៃទី១២ ខែសីហា ឆ្នាំ ២០២១ នៅតាមមន្ទីរពេទ្យជាតិនានា​។

ចំពោះឥស្សរជន ដែលមានតួនាទី​ជាឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី រដ្ឋលេខាធិការ ឬមានឋានៈស្មើ ហើយបានចាក់វ៉ាក់សាំងស៊ីណូហ្វាម ឬស៊ីណូវ៉ាក់ ដូសទី១ និងដូសទី២ រួច​រាល់ ត្រូវទៅចាក់វ៉ាក់សាំង AstraZeneca ​​ដូសជម្រុញ ឬដូសទី៣ នៅ​មន្ទីរពេទ្យកាល់ម៉ែត ហើយមន្រ្តីដែលមានតួនាទីជា​អនុរដ្ឋលេខាធិការ អគ្គនាយក អគ្គនាយករង ឬមានឋានៈស្មើ ត្រូវ​ទៅចាក់វ៉ាក់សាំងដូសទី៣នៅមន្ទីពេទ្យព្រះអង្គឌួង៕

អត្ថបទ៖ កោះកែវ