បុគ្គលតេស្តរហ័សឃើញវិជ្ជមានមិនរាយការណ៍ ត្រូវប្រឈមការពិន័យ ឬជាប់ពន្ធនាគារ

ភ្នំពេញ៖ អាជ្ញាធររាជធានីភ្នំពេញបានធ្វើការព្រមានថា បុគ្គលណាដែលបានប្រើប្រាស់តេស្ករហ័ស​រក​អង់ទីហ្សែនកូវីដ-១៩ ទទួលបានលទ្ធផលតេស្តវិជ្ជមាន ហើយមិនព្រមរាយការណ៍ជូនមន្ត្រីសុខាភិបាល ក្រុមគ្រូពេទ្យ ឬអាជ្ញាធរ មូលដ្ឋានទេនោះ អាចប្រឈមនឹងការអនុវត្តនូវការដាក់ពិន័យ ក៏ដូចជាការទោសដាក់ពន្ធនាគារ ស្របទៅច្បាប់ ស្តីពី វិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ។

ការព្រមាននេះបានធ្វើឡើងបន្ទាប់មានបងប្អូនប្រជាពលរដ្ឋមួយចំនួន ដែលបានប្រើប្រាស់តេស្តរហ័ស​រក​អង់ទីហ្សែនវីដ-១៩ ដោយខ្លួនឯងនៅតាមផ្ទះ ទទួលបានលទ្ធផលតេស្តវិជ្ជមានជំងឺកូវីដ-១៩ ប៉ុន្តែបានព្យាយាមប្រើប្រាស់ថ្នាំពេទ្យ ឬអនុវត្តការព្យាបាលបែបបុរាណដោយខ្លួនឯង ហើយមានអ្នកជំងឺមួយចំនួនបានវិវឌ្ឍទៅរកស្ថានភាពធ្ងន់ធ្ងរ រួចទើបរាយការណ៍មកមន្រ្តីសុខាភិបាល ឬអាជ្ញាធរមូលដ្ឋាន។

ដើម្បីពង្រឹងប្រសិទ្ធភាពនៃការគ្រប់គ្រង ថែទាំ និងព្យាបាលអ្នកជំងឺកូវីដ-១៩ នៅតាមផ្ទះក្នុង ភូមិសាស្រ្តរាជធានីភ្នំពេញ ប្រកបដោយគុណភាព និងប្រសិទ្ធភាពបន្ថែមទៀត រដ្ឋបាលរាជធានីភ្នំពេញ បានធ្វើការណែនាំ ក្នុងករណីការប្រើប្រាស់តេស្ករសរកអង់ទីហ្សែនកូវីដ-១៩ ដោយបុគ្គលឯកជន ទទួលលទ្ធផលតេស្តវិជ្ជមានជំងឺកូវីដ-១៩ សាមីខ្លួនត្រូវដាក់ខ្លួនឱ្យនៅដោយឡែកពីសមាជិកគ្រួសារ និងមានកាតព្វកិច្ចតាមផ្លូវច្បាប់ ក្នុងការជូនដំណឹងជាបន្ទាន់ទៅមន្ត្រីសុខាភិបាល ឬអាជ្ញាធរមូលដ្ឋាន តាមរយៈខ្សែទូរស័ព្ទ (Hotline) ១២២២ ឬ លេខទូរស័ព្ទរបស់ទីបញ្ជាការស្រាលនៃមូលដ្ឋានខណ្ឌដែលខ្លួនកំពុងរស់នៅ ដើម្បីឱ្យអាជ្ញាធរមូលដ្ឋាន និងក្រុមគ្រូពេទ្យចុះវាយតម្លៃស្ថានភាពអ្នកជំងឺ និងពិនិត្យទីតាំងផ្ទះ ថាតើត្រូវអនុញ្ញាត ឱ្យអ្នកជំងឺព្យាបាលនៅផ្ទះ ឬត្រូវបញ្ជូនទៅព្យាបាលនៅមន្ទីរពេទ្យរដ្ឋ។

រដ្ឋបាលរាជធានីភ្នំពេញបានបន្តទៀតថា ការអនុវត្តមិនត្រឹមត្រូវតាមនីតិវិធីប្រតិបត្តិស្តង់ដាសម្រាប់គ្រប់គ្រងថែទាំ និងព្យាបាលអ្នកជំងឺកូវីដ-១៩ នៅតាមផ្ទះ និងគោលការណ៍ណែនាំរបស់ក្រសួងសុខាភិបាល អាចបង្កគ្រោះថ្នាក់ដល់អាយុជីវិតរបស់អ្នកជំងឺ និងអាចបង្កជាហានិភ័យនៃការចម្លងជំងឺកូវីដ-១៩ ដល់សមាជិកគ្រួសារ អ្នករស់នៅក្បែរខាង និងសហគមន៍ទាំងមូលថែមទៀត។

គិតត្រឹមថ្ងៃទី១១ ខែសីហា ឆ្នាំ២០២១ រដ្ឋបាលរាជធានីភ្នំពេញអនុញ្ញាតឱ្យ​អ្នកជំងឺ​កូវីដ-១៩ ​​សម្រាក​ព្យាបាល​នៅ​ផ្ទះ​មាន​ចំនួន ៤,២៤១នាក់ ក្នុងនោះ​មាន​អ្នកជំងឺ ១,២៥៧ នាក់​បាន​ជា​សះស្បើយ។

គួរបញ្ជាក់ថាក្រសួងសុខាភិបាលបានអនុញ្ញាតឱ្យរាជធានីខេត្តទូទាំងប្រទេសអនុវត្តគ្រប់គ្រងថែទាំ និងព្យាបាលអ្នកជំងឺកូវីដ-១៩ នៅតាមផ្ទះដើម្បីជួយសម្រួលបន្ទុកនៅតាមមន្ទីរពេទ្យនានា៕

អត្ថបទ៖ សំអឿន