ព័ត៌មានជាតិ

សម្តេចតេជោ ហ៊ុន សែន សម្រេចផ្តល់ជំនួយមនុស្សធម៌ចំនួន៣០ម៉ឺនដុល្លារ និងសម្ភារៈវេជ្ជសាស្ត្រមួយចំនួនដល់មីយ៉ាន់ម៉ា

បានផុស

៥ years មុន

នៅ

ថ្ងៃអង្គារ ១៧ សីហា ២០២១

ដោយ

សម្តេចអគ្គមហាសេនាបតីតេជោ ហ៊ុន សែន ក្នុងនាមរាជរដ្ឋាភិបាលកម្ពុជា បានសម្រេចផ្តល់ជំនួយមនុស្សធម៌ចំនួន៣០ម៉ឺនដុល្លារ និងសម្ភារៈវេជ្ជសាស្ត្រមួយចំនួនដល់រដ្ឋាភិបាលមីយ៉ាន់ម៉ា ដើម្បីចូលរួមទប់ស្កាត់ការរីករាលដាល នៃជំងឺរាតត្បាតកូវីដ-១៩ នេះបើយោងតាមលិខិតដែលសម្តេចតេជោផ្ញើជូននាយឧត្តមសេនីយ៍ មីង អោង ឡាំង ប្រធានក្រុមប្រឹក្សារដ្ឋបាលរដ្ឋសាធារណរដ្ឋសហភាពមីយ៉ាន់ម៉ា នៅថ្ងៃទី១៧ ខែសីហា ឆ្នាំ២០២១នេះ។

សម្តេចតេជោ ហ៊ុន សែន បានលើកឡើងថា សម្តេចបានតាមដានកិច្ចខិតខំប្រឹងប្រែងរបស់ប្រទេសមីយ៉ាន់ម៉ា ក្នុងការប្រយុទ្ធប្រឆាំង នឹងការផ្ទុះឡើងនៃជំងឺកូវីដ-១៩ ដោយបានចាត់វិធានការយ៉ាងម៉ឺងម៉ាត់ ដើម្បីទប់ស្កាត់ការរីករាលដាល នៃជំងឺរាតត្បាតនេះតាំងពីដំបូងមក។សម្តេចបន្តថា “ក្នុងស្មារតីមិត្តភាព និងសាមគ្គីភាពរវាងប្រទេសយើងទាំងពីរ ខ្ញុំសូមបរិច្ចាគជាសាច់ប្រាក់ចំនួន២០០.០០០ ដុល្លារអាមេរិក របស់រាជរដ្ឋាភិបាលកម្ពុជា បន្ថែមពីលើការសន្យារបស់កម្ពុជាចំនួន១០០.០០០ ដុល្លារអាមេរិក សម្រាប់ជំនួយមនុស្សធម៌អាស៊ាន ជួយមីយ៉ាន់ម៉ាតាមរយៈមជ្ឈមណ្ឌលអាស៊ាន សម្រាប់សម្របសម្រួលជំនួយមនុស្សធម៌ (AHA Centre)”។

បន្ថែមលើសាច់ប្រាក់នេះ សម្តេចក៏បានផ្តល់ឧបករណ៍វេជ្ជសាស្ត្រមួយចំនួនទៀតដែលរួមមាន៖ ម៉ាស់ចំនួន៣ លាន តេស្ត៍រហ័សចំនួន៥០០.០០០ សំលៀកបំពាក់សុវត្ថិភាព PPE ចំនួន ២.០០០ ឈុត ម៉ាស៊ីនផលិតអុកស៊ីហ្សែនស្វ័យប្រវត្តិចំនួន១០០ គ្រឿង ម៉ាស៊ីនជំនួយដកដង្ហើមចំនួន២០ គ្រឿង និងម៉ាស៊ីនតាមដានសញ្ញាជីវិតចំនួន២០ គ្រឿង។

ជំនួយនេះ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មាធិការអន្តរក្រសួងដើម្បីប្រយុទ្ធប្រឆាំងនឹងជំងឺកូវីដ-១៩ នឹងដឹកនាំគណៈប្រតិភូមួយក្រុម ដើម្បីប្រគល់ជូនអំណោយខាងលើ តាមជើងហោះហើរពិសេស ដែលនឹងត្រូវរៀបចំឡើង ដើម្បីទៅទីក្រុង ណៃពិដោ នាពេលឆាប់ៗនេះ។

សម្តេចតេជោ ហ៊ុន សែន ជឿជាក់ថា ជាមួយនឹងកិច្ចខិតខំប្រឹងប្រែងរួមគ្នា យើងនឹងយកឈ្នះលើជំងឺរាតត្បាតសកលនេះទាំងស្រុង៕

ដោយ ៖ កោះកែវ