ព័ត៌មានជាតិ

មន្ត្រីជំនាញអះអាងថា ជំងឺដុំពកស្បែកគោ ក្របី អាចព្យាបាលជា បើម្ចាស់មើលថែបានល្អ

បានផុស

៥ years មុន

នៅ

ថ្ងៃសៅរ៍ ២១ សីហា ២០២១

ដោយ

មន្ត្រីការិយាល័យផលិតកម្មនិងបសុព្យាបាល នៃមន្ទីរកសិកម្មរុក្ខាប្រមាញ់និងនេសាទ ខេត្តសៀមរាប បានប្រាប់ កម្ពុជាថ្មី ឲ្យដឹងនៅល្ងាចថ្ងៃទី២០ ខែសីហា ឆ្នាំ២០២១នេះថា នៅប៉ុន្មានថ្ងៃមកនេះ មានការលើកឡើងថា មានសត្វគោ ក្របី ជាច្រើននៅក្នុងខេត្តសៀមរាប បានកើតជំងឺដុំពកស្បែក ហើយព្រួយបារម្ភថា អាចធ្វើឱ្យសត្វគោ ក្របី របស់ប្រជាពលរដ្ឋងាប់ច្រើនធ្វើឱ្យប៉ះពាល់ជីវភាពរបស់ពួកគាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធបញ្ហានេះ លោក ព្រំ វិច ប្រធានការិយាល័យផលិតកម្ម និងបសុព្យាបាល បានបញ្ចាក់ដែរថា ជំងឺដុំពកស្បែកគោ ក្របី នេះ គឺអាចព្យាបាលជាសះស្បើយ និងអាត្រាងាប់មានចំនួនតិច ប្រសិនម្ចាស់សត្វបានមើលថែបានល្អ។ ដោយវិធីនៃការព្យាបាល គឺការពារទប់ស្កាត់ជំងឺឱកាសនិយម និងដំបៅរលួយ ករណីសត្វក្តៅខ្លួន អាចប្រើពពួកថ្នាំបញ្ចុះកំដៅ ជាៈParacetamole អាចប្រើពពួក Dexametasone, Amoxiciline,Chlorazone,Bactrim ករណីមានដំបៅប្រើថ្នាំខៀវ(Methylen blu) និង Negazun។

លោកបានបន្តថា គិតចាប់ពីថ្ងៃទី២៨ ខែឧសភា ដល់០៩ ខែសីហា ឆ្នាំ២០២១ សភាពជំងឺដុំពកស្បែកគោនៅក្នុងខេត្តសៀមរាប មានកើតឡើងរប៉េះរប៉ោះ នៅតាមតំបន់មួយចំនួនក្នុងខេត្តសៀមរាប។ ដែលមានសត្វឈឺសរុប៦៨៣ក្បាល, ព្យាបាលជា ៦៦៧ក្បាល កំពុងព្យាបាល៤៧ក្បាល និងងាប់ ០៦ក្បាល។

ជាមួយគ្នានេះ មន្ត្រីបសុពេទ្យអគ្គនាយកដ្ឋាន-ខេត្ត-ស្រុក-ភ្នាក់ងារសុខភាពសត្វភូមិ សហកាការជាមួយអាជ្ញាធរមូលដ្ឋានបានចុះធ្វើការផ្សព្វផ្សាយពីវិធានការការពារ អនាម័យទប់ស្កាត់ការឆ្លងរាលដាលជំងឺដល់កសិករម្ចាស់សត្វចំនួន១២០០គ្រួសារ។ និងបានចុះបាញ់ថ្នាំសម្លាប់មេរោគតាមទ្រុងចិញ្ចឹមសត្វបានជាច្រើនកន្លែង និងផ្តល់ឳសថ សម្ភារះបរិក្ខាបសុពេទ្យដល់ភ្នាក់ងារសុខភាពសត្វភូមិតាមបណ្តាស្រុកសម្រាប់ជួយដល់ប្រជាពលរដ្ឋផងដែរ។

លោក ព្រំ វិច បានអំពាវនាវដល់ប្រជាពលរដ្ឋដែលមានសត្វគោ ក្របី ឈឺឬងាប់ ហាមលក់ដូរ ហាមយកសាច់របស់វាទៅបរិភោគ ព្រោះវាអាចធ្វើឱ្យប៉ះពាល់ដល់ផលិតកម្មសត្វ។ ហើយនៅពេលពេទ្យសត្វចុះទៅចាក់វ៉ាក់សាំងដល់សត្វគោ ក្របីសូមចូលរួមសហការ និងយកសត្វទៅចាក់ឱ្យបានគ្រប់ៗគ្នា។

ជាមួយគ្នានេះដែរលោក ព្រំ វិច ក៏បានសំណូមពរដល់ប្រជាពលរដ្ឋដែលមានសត្វឈឺត្រូវធ្វើការទំនាក់ទំងជាមួយភ្នាក់ងារសុខភាពសត្វភូមិ និងអាជ្ញាធរកមូលដ្ឋានឱ្យបានលឿន ដើម្បីខាងមន្ត្រីជំនាញជួយរកវិធីសាស្ត្រសង្គ្រោះបានទាន់ពេល។

សូមបញ្ជាក់ថា ជំងឺដុំពកស្បែកគោនេះ បង្កដោយវីរុស(Poxviridae)តាមរយៈសត្វល្អិតបឺតជញ្ជក់ឈាម មូស របោម រុយ ស្រួយ ដង្កែ ការចល័តសត្វឈឺពីតំបន់មួយទៅតំបន់មួយ និងការស៊ីចំណីជុំគ្នា។ ជំងឺនេះ ជាជំងឺចាស់សម្រាប់ប្រទេសគេ តែថ្មីសម្រាប់ប្រទេសកម្ពុជា៕

អត្ថបទ ៖ គឿនវេត

Related Topics:ជំងឺដុំពកលើស្បែកគោ