ព័ត៌មានជាតិ

ស្ថានភាពឆ្លងជំងឺកូវីដ នៅភ្នំពេញថយចុះ តែកើនឡើងវីរុសបំប្លែងថ្មីដែលតា

បានផុស

៥ years មុន

នៅ

ថ្ងៃសៅរ៍ ២១ សីហា ២០២១

ដោយ

ស្ថានភាពឆ្លងជំងឺកូវីដ១៩នៅក្នុងរាជធានីភ្នំពេញមួយរយៈចុងក្រោយនេះ មានការថយចុះគួរឱ្យកត់សម្គាល់តែមានការកើនឡើងនៃជំងឺវីរុសបំប្លែងខ្លួនថ្មីប្រភេទដែលតា deltaដែលកំពុងវាយលុកចូលក្នុងសហគមន៍គួរឱ្យព្រួយបារម្ភ។

លោកវេជ្ជវេជ្ជបណ្ឌិត ងី មានហេង ប្រធានមន្ទីរសុខាភិបាលរាជធានីភ្នំពេញបានមានប្រសាសន៍នៅព្រឹកថ្ងៃទី២១សីហានេះថា ចំនួនវិជ្ជមានជំងឺកូវីដ១៩នៅដើមខែសីហា ឆ្នាំ២០២១នេះ ហាក់មានការថយចុះគួរឱ្យកត់សម្គាល់ ប៉ុន្តែបែរជាមានការកើនឡើងចំនួនជំងឺកូវីដ១៩បំប្លែងខ្លួនថ្មីប្រភេទដែលតាទៅវិញ ដែលមានចំនួន១៦៨នាក់ ស្រី៧១នាក់ ដែលជាអ្នកដំណើរតាមជើងហោះហើរមកពីបរទេស និងប្រជាពលរដ្ឋក្នុងសហគមន៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិតបានបញ្ជាក់ថា មូលហេតុដែលនាំឱ្យការឆ្លងជំងឺកូវីដ១៩ថយចុះនេះ ដោយសារប្រជាពលរដ្ឋមានការយល់ដឹងនិងបានអនុវត្តបានល្អប្រសើរនូវវិធានការការពាររបស់ក្រសួងសុខាភិបាល ដូចជា៣កុំនិង៣ការពារ ដោយពួកគាត់បានចូលរួមអនុវត្តពាក់ម៉ាស់ទាំងអស់គ្នា រក្សាគម្លាតសុវត្តិភាព អនាម័យ លាងដៃជាមួយសាប៊ូ អាកុលឬជែល ពិសេសការចាក់វ៉ាក់សាំងបានជួយឱ្យមានភាពស៊ាំដែលអាចជួយកាត់បន្ថយការឆ្លងនៅក្នុងសហគមន៍។ ប៉ុន្តែបើមានឆ្លងក៏ស្ថិតក្នុងកម្រិតស្រាលផងដែរ។

លោកវេជ្ជវេជ្ជបណ្ឌិត ងី មានហេង បានបន្តទៀតថា បច្ចុប្បន្ននេះអាជ្ញាធរបានត្រៀមមណ្ឌលព្យាបាល៣ទីតាំងសម្រាប់ព្យាបាលអ្នកឆ្លងវីរុសកូវីដ១៩ប្រភេទបំប្លែងខ្លួនថ្មីDeltaរួមមាន មណ្ឌលព្យាបាលមង្គលឧត្តមមណ្ឌលព្យាបាលវិទ្យាល័យជាស៊ីមសាមគ្គី និងមណ្ឌលព្យាបាលសែនសុខ១ អតីតពិភពថ្មី សែនសុខ។

ជាមួយគ្នានេះដែរ លោកវេជ្ជបណ្ឌិតបានបន្ថែមថា អាជ្ញាធរក៏បានត្រៀមមណ្ឌលចត្តាឡីស័កនៅអនុវិទ្យាល័យ ប៊ុន រ៉ានី ហ៊ុន សែន វត្តភ្នំ សម្រាប់ទទួលពលករខ្មែរមកពីព្រំដែនកម្ពុជា-ថៃ និងព្រំដែនកម្ពុជា-វៀតណាម។

គួរបញ្ជាក់ថា ចាប់តាំងពីថ្ងៃទី៣១ ខែមីនា រហូតដល់ថ្ងៃទី១៩ ខែសីហា ឆ្នាំ២០២១ កម្ពុជាបានរកឃើញអ្នកឆ្លងជំងឺកូវីដ១៩ ប្រភេទដែលតា ចំនួន៨៣៦នាក់ នៅតាមរាជធានីខេត្តចំនួន២៣ លើកលែងខេត្តចំនួន២ប៉ុណ្ណោះដែលនៅមិនទាន់មានឆ្លងរួមមានខេត្តក្រចេះនិងខេត្តកែប៕

អត្ថបទ ៖ សំអឿន