រកឃើញវីរុសបំប្លែងថ្មី Delta ១៧០ ករណីបន្ថែមទៀត​កើនដល់ ២ ៦៤៧ ករណី​

គិតចាប់ពីថ្ងៃទី៣១ ខែមីនា រហូតមកដល់ថ្ងៃទី៤ ខែកញ្ញាឆ្នាំ២០២១នេះ កម្ពុជាមានអ្នកឆ្លងកូវីដ១៩ ប្រភេទដែលតាចំនួន ២៦៤៧នាក់ ស្ត្រីមានចំនួន១៣១៧នាក់ក្នុងនោះភាគច្រើននៅរាជធានីភ្នំពេញ។

លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាលបានឱ្យដឹងនៅក្នុងសេចក្តីជូនដំណឹងចុះនៅរសៀលថ្ងៃ ទី៥ កញ្ញានេះថា ក្នុងចំណោមអ្នកឆ្លងសរុប២៦៤៧នាក់នោះ ឆ្លងនៅតាមរាជធានីខេត្តចំនួន​២៣ ខណៈខេត្តកែប និងខេត្តក្រចេះនៅមិនទាន់មានឆ្លងជំងឺនេះនៅឡើយទេ។

លោកស្រីបានបន្តថា រាជធានីខេត្តដែលឆ្លងច្រើនជាងគេគឺ រាជធានីភ្នំពេញមានចំនួន ៩១៤នាក់ស្រី៤២៣​នាក់ បន្ទាបមកទៀតខេត្តបន្ទាយមានជ័យ៥២៦នាក់ ឧត្រមានជ័យ២៤៥នាក់ សៀមរាប២០៧នាក់ ស្ទឹង​ត្រែង​១១៩នាក់ ព្រះវិហារ១០៨និងខេត្តកណ្តាល១០២នាក់ហើយក្រៅពីនេះខេត្តផ្សេងទៀតមានក្រោម១០០​នាក់។

ក្រសួងសុខាភិបាល បានបង្ហាញថាករណីឆ្លងជំងឺដែលតា នៅប្រទេសកម្ពុជាភាគច្រើនជាអ្នកដំណើរមកពីបរទេស តាមជើងហោះហើរ ពលករខ្មែរត្រលប់ពីប្រទេសថៃ ពីប្រទេសវៀតណាម ប្រជាជនអ្នកភូមិនៅក្នុង​សហគមន៍ ក្រុមហ៊ុនឯកជន បុគ្គលិកសុខាភិបាល អាជីវករ មន្ត្រីរាជការ យោធា ពិរុទ្ធជន អ្នកបកប្រែភាសាជនជាតិបរទេស បុគ្គលិករោងចក្រកាត់ដេរ បុគ្គលិកធនាគារ ដូនជីនៅវត្ត និងសិស្សជាដើម។

លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល នៅតែបន្តក្រើនរំលឹក និងអំពាវនាវទៅដល់សាធារណជន បងប្អូនប្រជាពលរដ្ឋទូទាំងប្រទេស បន្តប្រុងប្រយ័ត្នខ្ពស់ការពារខ្លួនកុំភ្លេចខ្លួនឲ្យសោះ ដោយត្រូវចេះផ្លាស់ប្តូរទម្លាប់រស់នៅរបស់ខ្លួនឲ្យស្របតាមពាក្យស្លោកដែលថា៖ រៀនរស់នៅធម្មតាជាមួយ​កូវីដ១៩ តាមរបគន្លងថ្មី ក្នុងបរិបទប្រយុទ្ធនឹងជំងឺកូវី-១៩ សំដៅបង្ការ គ្រប់គ្រង និងកាត់ផ្តាច់នូវខ្សែចម្លងនៃវីរុស​កូវីដ-១៩. ជាពិសេសពពួកប្រភេទកំប្លែងថ្មីនេះ ឬក៏ប្រភេទថ្មីផ្សេង ទៀត ដែលអាចកើតមានក្នុងព្រះរា​ជាណាចក្រកម្ពុជាយើង ជាយថាហេតុណាមួយ៕

ពិស្ដារ៖

អត្ថបទៈ សំអឿន