ព័ត៌មានជាតិ

រដ្ឋមន្រ្តីឲ្យសិក្សាពង្រាយបង្គោលទូរសព្ទគ្រប់ឃុំទាំងអស់

បានផុស

៥ years មុន

នៅ

ថ្ងៃអង្គារ ២១ កញ្ញា ២០២១

ដោយ

រដ្ឋមន្រ្តីក្រសួងប្រៃសណីយ និងទូរគមនាគមន៍បានថ្លែងថ្មីៗនេះ ឲ្យសិក្សាពីការពង្រាយបង្គោលអង់តែនទូរសព្ទនៅគ្រប់ឃុំទាំងអស់។

លោក ជា វ៉ាន់ដេត រដ្ឋមន្រ្តីក្រសួងប្រៃសណីយ និងទូរគមនាគមន៍ បានថ្លែងក្នុងពេលប្រជុំជាមួយប្រតិភូសមាគមបច្ចេកវិទ្យាឌីជីថលតាមអនឡាញកាលពីពេលថ្មីៗនេះថា ការពង្រាយដាក់បង្គោលអង់តែនទូរសព្ទនៅគ្រប់ឃុំ ដើម្បីប្រែក្លាយប្រទេសកម្ពុជាឲ្យក្លាយទៅជាប្រទេសឌីជីថល។

លោករដ្ឋមន្រ្តីថ្មីក្រសួងប្រៃសណីយនិងទូរគមនាគមន៍ដែលឡើងកាន់ការងារជំនួនឯកឧត្តមត្រាំ អុីវតឹក បានដាក់ការងារចាំបាច់ជាអាទិភាពមួយក្នុងចំណោមការងារអាទិភាពផ្សេងទៀត គឺការដាក់ឲ្យដំណើរការប្រព័ន្ធវាស់ស្ទង់គុណភាពសេវាទូរគមនាគមន៍នៅតាមតំបន់ដែលបញ្ហាពាក់ព័ន្ធគុណភាពសេវា ដែលត្រូវមានវិធានការតម្រូវឲ្យប្រតិបត្តិករទូរគមនាគមន៍វិនិយោគ លើហេដ្ឋារចនាសម្ព័ន្ធចាំបាច់បន្ថែម។

បើតាមលោករដ្ឋមន្រ្តី ក្នុងឆ្នាំ២០២៧ អ៊ិនធឺណែតទាំងអស់ ត្រូវតែទៅដល់គ្រប់ឃុំទាំងអស់។ ក្រសួងកំពុងតែសិក្សាអំពីការតបណ្ដាញខ្សែកាប ពីស្រុកទៅឃុំ ក្នុងខេត្ដចំនួន៦ នៃប្រទេសកម្ពុជា ហើយគ្រោងនឹងរួចរាល់ នៅខែមករា ឆ្នាំ២០២២ ខាងមុខនេះ។

ស្របតាមកំណើននៃការប្រើប្រាស់ ទូរសព្ទឆ្លាតវៃ និងការធ្វើពាណិជ្ជកម្មតាមប្រព័ន្ធអេឡិចត្រូនិក ការផ្លាស់ប្តូរបែបឌីជីថល បានក្លាយជាទិសដៅសំខាន់មួយ នៃគោលនយោបាយរបស់រដ្ឋាភិបាលកម្ពុជា ខណៈពេលដែលប្រទេសជាច្រើនកំពុងខិតខំសម្របខ្លួន ទៅនឹងបដិវត្តន៍ឧស្សាហកម្មទី៤៕

អត្ថបទ៖ ប៊ុណ្ណារ៉ា