កុមារ​ជាង ១៥ ម៉ឺននាក់​​នៅ​ភ្នំពេញ បាន​ចាក់​វ៉ាក់សាំង​​រួច​

ភ្នំពេញ៖ គិតចាប់ពីថ្ងៃបើកយុទ្ធនាការចាក់វ៉ាក់សាំងជូនកុមារអាយុ ៦ ឆ្នាំដល់ក្រោម១២ឆ្នាំ កាលពីថ្ងៃទី១៧ រហូតដល់ ទី ២៦ខែកញ្ញានេះ កុមារនៅក្នុងរាជធានីភ្នំពេញចំនួនជាង១៥ម៉ឺននាក់ហើយ ដែលទទួលបានការចាក់វ៉ាក់សាំងដូសទី១ ក្នុងចំណោមកុមារចំនួនជាង២២ម៉ឺននាក់។ នេះបើតាមការបញ្ជាក់របស់លោក ហួត ហៃ អភិបាលរងរាជធានីភ្នំពេញ ខណៈដែលលោកនិងអាជ្ញាធរខណ្ឌទួលគោក ចុះមកពិនិត្យទីតាំងចាក់វ៉ាក់សាំង បង្ការជំងឺកូវីដ-១៩ ជូនកុមារដែលមានអាយុចាប់ពី៦ឆ្នាំ ដល់ក្រោម១២ឆ្នាំ នៅមណ្ឌលសុខភាព ទួលគោក ខណ្ឌទួលគោក រាជធានីភ្នំពេញ នាព្រឹកថ្ងៃច័ន្ទ ទី២៧ ខែកញ្ញា ឆ្នាំ២០២១។

លោកហួត ហៃ មានប្រសាសន៍ថា ដំណើរការចាក់វ៉ាក់សាំងបង្ការជំងឺកូវីដ-១៩ ជូនកុមារដែលមានអាយុចាប់ពី៦ឆ្នាំ ដល់ក្រោម១២ឆ្នាំ បានប្រព្រឹត្តទៅតាមកម្មវិធីដែលបានគ្រោងទុក ដែលរហូតមកដល់ថ្ងៃទី២៦ ខែកញ្ញា ឆ្នាំ២០២១នេះ កុមារចំនួន ១៥១.៧៧០នាក់ លើ ២២១.១៣៦នាក់ បានចាក់វ៉ាក់សាំងរួចរាល់។

លោកបន្តថា សម្រាប់មូលដ្ឋានខណ្ឌទួលគោក ព្រឹកថ្ងៃទី២៧កញ្ញានេះ បានដំណើរការដល់សង្កាត់ទី០៩ លើ១០សង្កាត់ នឹងបញ្ចប់នៅពេលឆាប់ៗនេះ។

លោកក៏បានអំពាវនាវដល់មាតា បិតា ដែលពុំទាន់បាននាំកូនៗទៅចាក់វ៉ាក់សាំង សូមមេត្តារួសរាន់នាំកូនទៅចាក់វ៉ាក់សាំងអោយបានទាន់ពេលវេលា នៅតាមមណ្ឌលសុខភាពដែលបានកំណត់ ព្រោះវ៉ាក់សាំងគឺពិតជាខែលដ៏រឹងមាំដើម្បីការពារជម្ងឺកូវីដ-១៩៕

អត្ថបទ៖ ស្រីរ័ត្ន