ព័ត៌មានជាតិ

កុំច្រឡំផ្តាសាយនិងកូវីដ ពេលតេស្តរហ័ស

បានផុស

៥ years មុន

នៅ

ថ្ងៃអង្គារ ១២ តុលា ២០២១

ដោយ

រហូតមកដល់ពេលនេះការសង្ស័យនៅតែមានក្នុងផ្នត់គំនិតពលរដ្ឋមួយចំនួន លើការតេស្តរហ័សរកកូវីដ ១៩ (Rapid Antigen test COVID-19) ដោយអះអាងថាអ្នកដែលផ្ដាសាយតេស្តទៅប្រាកដជារកឃើញមេរោគកូវីដ ១៩។

ប្រធានមន្ទីរពេទ្យខេត្តកោះកុងលោក ហៃ ឡៃសុន កន្លងទៅក៏បានធ្វើការពន្យល់លើករណីនេះដើម្បីកុំឲ្យពលរដ្ឋយល់ច្រឡំ។

លោកបានពន្យល់ថា ជំងឺផ្តាសាយបង្កឡើងដោយវីរុសប្រភេទផ្សេងពីវីរុសកូវីដ ១៩ ដូចជា វីរុស rhinovirus, adenovirus និងវីរុស influenza។ ចំណែកជំងឺកូវីដ ១៩ វិញ បង្កដោយវីរុសកូរ៉ូណា (coronavirus)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានលើកឡើង ៦ ចំណុច ដើម្បីពលរដ្ឋស្វែងយល់អំពីការតេស្តរហ័សរកកូវីត ១៩៖

១. ជាប្រភេទតេស្តមើលមេរោគកូវីដ ( Antigen) រហ័សពោលគឺលទ្ឋផល ត្រូវការរយៈពេលតែ ១៥នាទី (ប្រសិទ្ឋភាពតេស្តនេះប្រហាក់ប្រហែល ៩៥ %) ។

២. វិធីធ្វើដោយត្បាររុនច្រមុះ ( nasopharyngeal or nasal swab specimens ) ជម្រៅ ២ សង់ទីម៉ែត ដោយបង្វិល ៥ ជុំ ។

៣. ប្រសិទ្ឋភាពខ្ពស់ (sensitivity) ប៉ុន្តែទាបជាងមើលសំណាក PCR test (RT- PCR test)។ ប្រសិទ្ឋភាពចាប់រកមេរោគឃើញច្បាស់ល្អ ភាគច្រើននៅពេលមានរោគសញ្ញា (ក្អក ផ្តាសាយ ឈឺបំពង់ក ក្តៅខ្លួន) ពោលគឺចាប់ចន្លោះថ្ងៃទី ៥ ទៅថ្ងៃទី៩ ក្រោយពីឆ្លង ( ដំណាក់មេរោគមានច្រើននៅក្នុងសំណាក)។

៤. តេស្តនេះគេប្រើប្រាស់ក្នុងការផ្ទុះរាលដាលក្នុងសហគមន៌ជាប្រភេទប្រមូលផ្តុំ (outbreak settings) ដើម្បីស្រាវជ្រាវ បែងចែក ញែកអ្នកដែលវិជ្ជមានអោយបានឆាប់ ប៉ុន្តែទោះជាអ្នកវិជ្ជមានឫ អវិជ្ជមានក៏ដោយក៏ត្រូវមើលសំណាក PCR test បន្ថែមប្រសិនបើមានករណីសង្ស័យ ឫមានរោគសញ្ញា ឫ ស្ថិតក្នុងតំបន់ប្រឈមខ្ពស់ (Serial screening in congregate settings)។

៥. ចំណុចខ្សោយរបស់តេស្តនេះគឺ៖

-ចាប់មេរោគមិនឃើញ មុនពេលអ្នកជំងឺស្តែងចេញរោគសញ្ញា (asymptomatic phase) ពោលមុនថ្ងៃទី ៣ នៃការឆ្លង។
-តេស្តនេះ និងអវិជ្ជមាននៅពេលមេរោគក្នុងសំណាកចុះទាប (low virus) ចាប់ពីថ្ងៃទី ១១ តទៅ ហើយតំណាក់កាលនេះកម្រិតនៃការឆ្លងក៏ថមថយចុះផងដែរ ជាតំណាក់កាលលែងមានការគំរាមកំហែងនៃការឆ្លងទៀតហេីយ (no longer threat)។

៦. ចំណុចខ្សោយនៃលទ្ឋផលរបស់ PCR test គឺនៅតែមើលឃើញវិជ្ជមានដដែល ទោះជាអ្នកជម្ងឺស្ថិតក្នុងដំណាក់ជាសះស្បើយក៏ដោយ ( ខ្មោចមេរោគ dead virus) មានរយៈពេលរាប់សប្តាហ៏ទៅរាប់ខែ។

យោងតាមក្រសួងសុខាភិបាល រោគសញ្ញាជំងឺកូវីដ-១៩ និងជំងឺផ្តាសាយមានលក្ខណៈស្រដៀងគ្នាខ្លះៗដែលអាចធ្វើឱ្យអ្នកជំងឺយល់ច្រឡំ ប៉ុន្តែវាក៏អាចសម្គាល់បាននូវភាពខុសគ្នាដូចជា៖

រោគសញ្ញាផ្ដាសាយ

-ឡើងកម្ដៅខ្ពស់ តែធូរស្រាលវិញបន្តិចម្ដងៗ

-ក្អកកណ្ដាស់បន្តិចបន្តួច រួចធូរស្រាលវិញ

-ពុំមានអាការៈរាគរូស

-ហៀរសំបោរ តឹងច្រមុះនាំឱ្យពិបាកដកដង្ហើម

-អស់កម្លាំង និងឈឺខ្លួនតិចតួច

រោគសញ្ញាកូវីដ–១៩

-គ្រុនក្តៅលើសពី ៣៧.៥ អង្សាសេ

-ក្អកនិងឈឺកលើសពី៤ថ្ងៃ

-អាចមានអាការរមួលពោះ ក្អួតចង្អោរ រាគរូស និងពិបាកដកដង្ហើម

-ករណីធ្ងន់ធ្ងរអាចឈានដល់រលាកឬហើមសួត

-ឈឺតាមដងខ្លួននិងទទួលទានអាហារមិនសូវបាន