ព័ត៌មានជាតិ

ជួបគ្រោះថ្នាក់ចរាចរណ៍តាមផ្លូវ ដោះស្លាកលេខទុក មានទោសកម្រិតណាដែរ?

បានផុស

៥ years មុន

នៅ

ថ្ងៃចន្ទ ៨ វិច្ឆិកា ២០២១

ដោយ

ករណីដោះស្លាកលេខយានយន្តទុក ពេលមានគ្រោះចរាចរណ៍ផ្លូវគោកតាមផ្លូវ ឃើញកើតមានដោយភាគីបង្កព្យាយាមបិទបាំង ឬបំបិទភស្តុតាង ដើម្បីរំដោះខ្លួនពីការតាមដានស្វែងរកអត្តសញ្ញាណ ឬដាក់បន្ទុកពីភាគីណាមួយ។

យោងតាមច្បាប់ចរាចរណ៍ផ្លូវគោក ក៏បានចែងពីការដាក់ទោសទណ្ឌនិងការពិន័យករណីភាគីណាមួយ ព្យាយាមកែប្រែស្ថានភាពដើមទីតាំងកន្លែងកើតហេតុដូចករណីដោះស្លាកលេខចេញជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧត្ដមសេនីយ៍ត្រី ថី វិសាល អនុប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ បានឲ្យកម្ពុជាថ្មីដឹងថា ពាក់ព័ន្ធបញ្ហានេះតាមអនុក្រឹត្យលេខ ៧៣ ចុះឆ្នាំ២០០៩ បានចែងពីការចុះបញ្ជីផ្ដល់ប័ណ្ណសម្គាល់យានយន្ត និងបំពាក់ស្លាកលេខសម្គាល់យានយន្ត។ ក្នុងអនុក្រឹត្យមាត្រា ១៨ បានចែងអំពីការកិបស្លាកលេខភ្ជាប់យានជំនិះតាមទីតាំងកំណត់នីមួយ។

ក្នុងករណីមានគ្រោះថ្នាក់ចរាចរណ៍ ហើយម្ចាស់រថយន្តដោះស្លាកលេខចេញ អាចរងការចោទប្រកាន់មានទោសតាមក្រមព្រហ្មទណ្ឌនៃព្រះរាជាណាចក្រកម្ពុជា។

បើតាមលោកឧត្ដមសេនីយ៍អំពើលុបបំបាត់ ផ្លាស់ប្ដូរទីកន្លែង ឬយកវត្ថុណាមួយក៏ដោយនៅទីកន្លែងប្រពឹ្រត្តបទឧក្រិដ្ឋ ឬបទមជ្ឈិមធ្វើជាឧបសគ្គស្វែងរកការពិត អាចជាប់ទោសពី ១ ឆ្នាំទៅ ៣ ឆ្នាំ ហើយរងការពិន័យជាប្រាក់ពី ២ លានរៀល ទៅ ៦ លានរៀល។

លោកបញ្ជាក់ថា ការដោះស្លាកលេខចេញជាប់បណ្ដឹងអាជ្ញា ពាក់ព័ន្ធដល់ការធ្វើជាឧបសគ្គដល់ការស្វែងរកការពិត ឬអត្តសញ្ញាណយានយន្ត ដែលធ្វើឲ្យប៉ះពាល់ដល់ការស៊ើបអង្កេតរបស់មន្រ្តីយុត្តិធម៌។

យោងតាមអនុក្រឹត្យចុះបញ្ជីយានយន្តក្នុងមាត្រា ១៨ គ្រប់យានជំនិះត្រូវកិបដោយសៀល ឬខ្ចៅមានសម្គាល់ភិនភាគដោយក្រសួងសាធារណការនិងដឹកជញ្ជូន។ យ៉ាងណាមិញ ករណីគ្រោះថ្នាក់ហើយមានការដោះស្លាកលេខចេញនេះ មិនសូវកើតមានញឹកញាប់នោះទេ។ ភាគីបង្កច្រើនតែរត់គេចខ្លួន ទើបចូលខ្លួនទៅដោះស្រាយជាមួយភាគីរងគ្រោះតាមក្រោយតាមរយៈតំណាងស្របច្បាប់ ឬមេធាវី។

លោកឧត្ដមសេនីយ៍ត្រី ថី វិសាល ក៏បានស្នើបងប្អូនដែលប្រើប្រាស់ដងផ្លូវ ត្រូវចូលរួមគោរពច្បាប់ទាំងអស់គ្នា ដែលផ្តើមពីខ្លួនឯងផ្ទាល់ ដើម្បីកាត់បន្ថយអត្រាគ្រោះថ្នាក់បង្កឲ្យស្លាប់និងរបួស។ ក្នុងករណីមានគ្រោះថ្នាក់ចរាចរណ៍កើតឡើង សូមកុំធ្វើឲ្យប្រែប្រួលស្ថានភាពកន្លែងកើតហេតុ ទុកឲ្យសមត្ថកិច្ចដោះស្រាយ ដើម្បីចៀសវាងការជាប់ទោសទណ្ឌផ្សេងៗ៕

អត្ថបទ៖ ប៊ុណ្ណារ៉ា