ចុះ​បិទ​អាជីវកម្ម​ជីកដី​​ ក្រោយ​អភិបាលរង​ខេត្ត​ចុះ​ទៅពិនិត្យ​ពុំមាន​ច្បាប់​

ខេត្តកណ្តាល ៖ លោក ណុប ដារ៉ា អភិបាលរងខេត្តកណ្តាល នៅថ្ងៃទី១០ ខែ វិច្ឆិកា ឆ្នាំ២០២១នេះ បានដឹកនាំគណៈកម្មការចម្រុះ ចុះត្រួតពិនិត្យនិងអនុវត្តច្បាប់ចំពោះអាជីវកម្មជីកដី ខ្សាច់ និងការដឹកជញ្ជូនដី ដែលពុំមានច្បាប់អនុញ្ញាត និងធ្វើសកម្មភាពខុសបច្ចេកទេស ក្នុងស្រុកកណ្តាលស្ទឹង។

ជាក់ស្តែងថ្ងៃនេះ គណៈកម្មការចម្រុះបានធ្វើការបិទអាជីវកម្ម ០១កន្លែង ដែលពុំមានច្បាប់អនុញ្ញាត ហើយធ្វើសកម្មភាពខុសបច្ចេកទេសច្បាប់កំណត់ និងកៀកដងផ្លូវ ស្ថិតនៅភូមិត្រស់ ឃុំទ្រា។ ទន្ទឹមនោះ បានផ្អាកអាជីវកម្មចំនួន ០២ កន្លែង ស្ថិតនៅភូមិថ្មី និងភូមិក្រាំងតី ឃុំថ្មី ដែលជីកលើសដែនអាជ្ញាបណ្ណ ហើយពុំមានបង់សួយសារ៉ែ និងធ្វើសកម្មភាពខុសបច្ចេកទេសច្បាប់កំណត់។

លោក​អភិបាល​រង​ខេត្ត ក៏​បានណែនាំនិងលើកទឹកចិត្តម្ចាស់អាជីវកម្ម ឲ្យ​ប្រកបរបរអោយបានត្រឹមត្រូវមានច្បាប់អនុញ្ញាត និងគោរពតាមបទដ្ឋានបច្ចេកទេស។ ចំពោះអាជីវកម្ម ០៣កន្លែងនេះ គណៈកម្មការនឹងអនុវត្តតាមនីតិវិធីដោយធ្វើការពិន័យ និងអោយបង់សួយសារ៉ែចូលរដ្ឋឡើងវិញអោយបានត្រឹមត្រូវ។

លោក ណុប ដារ៉ា ដែល​ក៏ជា​ប្រធានគណៈកម្មការចម្រុះបន្ថែម​ថា ក្រុមការងារនឹងបន្តចុះពិនិត្យតាមការដ្ឋានអាជីវកម្មជាបន្តបន្ទាប់ទៀត ដើម្បីពង្រឹងការគ្រប់គ្រង និងកាត់បន្ថយហានិភ័យនានាដែលប៉ះពាល់ដល់បរិស្ថាន និងបង្កគ្រោះថ្នាក់ដល់ប្រជាពលរដ្ឋដែលនៅជិតតំបន់នោះ និង អ្នកធ្វើដំណើរតាមដងផ្លូវ៕