សម្ដេចតេជោ ហ៊ុន សែន ៖ ដោយសារតែនៅមានមនុស្សជ្រុលនិយមបែបនេះ ទើបខ្ញុំត្រូវតែបន្តការពារសន្តិភាពនៃប្រទេសនេះ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា ដោយសារតែនៅមានមនុស្សជ្រុល​និយម​មួយ​ចំនួនតូច។ ដូច្នេះហើយ ទើបសម្ដេចត្រូវបន្តការពារសន្តិភាព ដើម្បីកុំឲ្យក្រុមជ្រុលនិយមទាំងនោះ មានលទ្ធភាពរើបម្រាសបំផ្លាញជាតិ និងប្រជាជនបន្តទៀត។

ការលើកឡើង​ខាងលើនេះ គឺបន្ទាប់ពីមានអ្នកលេងហ្វេសប៊ុកម្នាក់ឈ្មោះ ខ្មែរ សុវណ្ណ​ភូមិ​ បានចូលទៅខំមែន​ក្នុង​ទំព័រ​ហ្វេសប៊ុករបស់សម្ដេច នៅថ្ងៃទី១០ ខែវិច្ឆិកា ឆ្នាំ២០២១ ក្រោយពីសម្ដេចបានបង្ហោះរូបភាព និងខ្លឹមសារ​ទាក់​ទងនឹងខួប ៤៥ឆ្នាំ នៃការស្លាប់យ៉ាងវេទនា កូនប្រុសច្បងរបស់សម្ដេច នៅក្នុងរបបប្រល័យពូជសាសន៍ប៉ុលពត (១០ វិច្ឆិកា ១៩៧៦-១០ វិច្ឆិកា ២០២១)។

អ្នកលេងហ្វេសប៊ុកឈ្មោះ ខ្មែរ សុវណ្ណ​ភូមិ ដែលគេមើលឃើញថា ជាសកម្មជនរបស់អតីតគណបក្សប្រឆាំង បាន​ចូល​ទៅ​ខំមែន ដោយប្រើប្រាស់ពាក្យសម្ដីមិនសមរម្យ ទើបសម្ដេចតេជោ ហ៊ុន សែន ឆ្លើយតបថា «សូមបងប្អូនជួយមើលមតិរបស់ម្នាក់នេះ តើគាត់ជាសត្វ ឬជាមនុស្ស?។ ដោយសារតែនៅមានមនុស្សជ្រុលនិយមបែបនេះ ទើបខ្ញុំត្រូវតែបន្តការពារសន្តិភាពនៃប្រទេសនេះ កុំឱយក្រុមនេះមានលទ្ធភាពរើបម្រាសបំផ្លាញជាតិ និងប្រជាជនទៀត»។

សម្ដេចតេជោ ហ៊ុន សែន បានសរសេរក្នុងខំមែនទៀតថា «សូម្បីតែយើងរំលឹកដល់កូនយើង ក៍ទើសក្បាលគាត់ដែរដូចនេះវាសមមុខហើយ ដែលរត់ចោលស្រុកទាំងមេ ទាំងកូន ដោយសារតែទង្វើរអាក្រក់របស់ខ្លួន»៕