ខេត្ត​បន្ទាយមានជ័យ មាន​តំបន់​សេដ្ឋកិច្ច​ពិសេស ០៤ កន្លែង​ មាន​រោងចក្រ ២២ កំពុង​ដំំណើរការ​

ខេត្ត​បន្ទាយមានជ័យ បាន​ទាក់ទាញ​ការ​វិនិយោគ​តាម​រយៈ​ការ​បង្កើត​តំបន់​សេដ្ឋកិច្ច​ពិសេស​ជា​ច្រើន​កន្លែង។

លោក លី សារី អភិបាល​រង​ខេត្ត​បន្ទាយមានជ័យ​បាន​ឲ្យ​កម្ពុជា​ថ្មី​ដឹង​ថា ទូទាំង​ខេត្ត​បន្ទាយមានជ័យ​មាន​តំបន់​សេដ្ឋកិច្ច​ពិសេស ០៤ កន្លែង​។​ តំបន់សេដ្ឋកិច្ច​ពិសេស​ទាំង ០៤ កន្លែង មាន​តំបន់​សេដ្ឋកិច្ច​ពិសេស​អូរនាង តំបន់​សេដ្ឋកិច្ច​ពិសេស​សានកូ តំបន់​សេដ្ឋកិច្ច​ពិសេសប៉ោយប៉ែត​ភីភី​ និង​សួន​ឧស្សាហម្ម​ ស៊ីសុផុន អ៉ិនដាសស្រ្ទៀលផាក។

លោក​ លី សារី បាន​បញ្ជាក់​ថា តំបន់​សេដ្ឋកិច្ច​ពិសេស​ទាំង ០៤ កន្លែង មានរោងចក្រ​ ២២ កំពុង​ដំណើរការ​ ដោយ​ប្រើប្រាស់​កម្មករ​សរុប​ជាង ១ ម៉ឺន​នាក់។

បើតាម​លោក លី សារី ក្រុមហ៊ុន​ដែល​បោះទុន​វិនិយោគ​នៅ​តំបន់​សេដ្ឋកិច្ច​ពិសេស​នៅ​ខេត្ត​បន្ទាយមានជ័យ​​​ភាគច្រើន​ជាក្រុមហ៊ុនបរទេសមាន​ដូចជា ក្រុមហ៊ុនថៃ ជប៉ុន និង​ចិន។

លោក ហាយ សំណាង នាយកទីចាត់ការ​ផែនការ​វិនិយោគ​ខេត្ត​បន្ទាយមានជ័យ​បាន​ឲ្យ​កម្ពុជា​ថ្មី​ដឹង​ថា ក្នុងនាម​អាជ្ញាធរខេត្ត​តែងតែ​យកចិត្តទុកដាក់​សម្របសម្រួល​​ធ្វើយ៉ាងណា​ជំរុញ​ឲ្យ​​​អ្នក​វិនិយោគ​មក​បណ្តាក់​ទុន​បង្កើត​រោងចក្រ​កាន់​តែ​ច្រើន​​ ដើម្បី​បង្កើត​ឱកាស​ការងារ​សម្រាប់​ពលរដ្ឋក្នុង​មូលដ្ឋាន។ នៅក្នុងតំបន់សេដ្ឋកិច្ចពិសេស​ខេត្ត​បន្ទាយមានជ័យ​ មានការ​អភិវឌ្ឍវិស័យហេដ្ឋារចនាសម្ព័ន្ធ ដែល​បង្កលក្ខណៈងាយស្រួលសម្រាប់អ្នកវិនិយោគ​។

មន្រ្តី​ទទួល​បន្ទុក​ផ្នែក​វិនិយោគ​ខេត្ត​រូប​នេះ​បាន​បញ្ជាក់​ថា ការវិនិយោគនៅក្នុងតំបន់ពិសេសទទួល​បាន​ការ​លើកទឹកចិត្ត​ពីរ​ដ្ឋាភិបាល និង​ការអនុគ្រោះ​ផ្សេង​ៗ​ដើម្បីទាក់ទាញអ្នកវិនិយោគបរទេសទៅបណ្ដាក់ទុន៕

អត្ថបទ៖ ប៊ុណ្ណារ៉ា