ព័ត៌មានជាតិ

បើកការដ្ឋានជួសជុលផ្លូវបេតុង ដាក់លូមូលនៅសង្កាត់ទឹកល្អក់ទី៣ ជាគម្រោងអភិវឌ្ឍន៍សង្កាត់ ដោយប្រើប្រាស់ថវិកាប្រមាណជាង៨៤លាន

បានផុស

២ years មុន

នៅ

ថ្ងៃអង្គារ ១៤ ធ្នូ ២០២១

ដោយ

ភ្នំពេញ ៖ គម្រោង ជួសជុលផ្លូវបេតុងគ្មានសរសៃដែកប្រវែង ៧១ម៉ែត្រទទឹង ២.៥ម៉ែត្រ នៅភូមិ១២និងការដាក់លូមូលដោះទឹកប្រវែង ៣២៩ម៉ែត្រ នៅភូមិ១០ និងភូមិ១២ សង្កាត់ទឹកល្អក់ទី៣ ខណ្ឌទួលគោក ដែលជាគម្រោងអភិវឌ្ឍន៍ សង្កាត់ដោយប្រើមូលនិធិអភិវឌ្ឍន៍សង្កាត់ប្រមាណជាង៨៤លានរៀលបានដំណើរការហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីរដ្ឋបាលខណ្ឌទួលគោកបានឲ្យដឹងថា លោក ជា ពិសី អភិបាលខណ្ឌទួលគោក នៅថ្ងៃទី១៤ ខែធ្នូ ឆ្នាំ២០២១នេះបានដឹកនាំ ប្រធានការិយាល័យ និងលោកចៅសង្កាត់ទឹកល្អក់ទី៣ ចុះបើកការដ្ឋានគម្រោងអភិវឌ្ឍន៍ ក្នុងសង្កាត់ទឹកល្អក់ទី៣ ខណ្ឌទួលគោក ដោយមានការចូលរួមពី បងប្អូនប្រជាពលរដ្ឋប្រមាណ៦០នាក់ ។

ក្នុងឱកាសនៃការបើកការដ្ឋាននេះ លោក ជា ពិសី ជាអភិបាលខណ្ឌ បានឧបត្ថម្ភបងប្អូនប្រជាពលរដ្ឋ ដែលអញ្ជើញចូលរួមកម្មវិធីនេះផងដែរ ដោយក្នុងម្នាក់ៗទទួលបានសារុង១ និង ម៉ាស១ប្រអប់ ជាអំណោយរបស់លោកជា ពិសី និង លោកស្រី។

មន្ត្រីដដែលបានបញ្ជាក់ទៀតថា សម្រាប់គម្រោងឆ្នាំ២០២១នេះ សង្កាត់ទឹកល្អក់ទី៣ បានលើកគម្រោង ជួសជុលផ្លូវបេតុងគ្មានសរសៃដែកប្រវែង ៧១ម៉ែត្រ ទទឹង ២.៥ម៉ែត្រ កម្រាស់ ០.១២ម៉ែត្រនៅភូមិ១២ និងដាក់លូមូលដោះទឹកប្រវែង ៣២៩ម៉ែត្រ ទំហំ០.៦០ម៉ែត្រ នៅភូមិ១០ និងភូមិ១២ ដោយប្រើមូលនិធិអភិវឌ្ឍន៍សង្កាត់ សរុបចំនួន ៨៤.៨៤១.០០០រៀល៕

ដោយ ៖ ស្រីរ័ត្ន