អ្នកលក់សាច់សត្វព្រៃ នៅផ្សារ សាមគ្គី ស្ទឹងត្រែង មិនរាងចាលក្រែងចិត្តសមត្ថកិច្ច

ឈ្មួញលក់សាច់សត្វព្រៃមុខដដែលៗ នៅ ផ្សារសាមគ្គី ស្ទឹងត្រែង នៅ តែបន្តលក់ជារៀងរាល់ថ្ងៃ ទោះជាមានការបង្ក្រាបក៏ដោយក៏ពួកគេហាក់មិនខ្លាចរអា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅ ថ្ងៃទី ១៦ ខែធ្នូនេះ គេសង្កេតឃើញនៅ តែមានការដាក់លក់សាច់សត្វព្រៃខុសច្បាប់ នៅ លើទីផ្សារសាមគ្គី ស្ទឹងត្រែង ដូចជាប្រភេទសាច់ជ្រូកព្រៃ សាច់ប្រើស សាច់ឈ្លុស សាច់កាំប្រម៉ា អណ្ដើក ត្រកួត និងប្រភេទសាច់សត្វជាច្រើនទៀតដែលគេស្តុកទុកក្នុងធុងក្លាស្សេលួចលាក់។

ប្រជាពលរដ្ឋលក់ដូរនៅ ផ្សារខាងលើបានលើកឡើងថា ការបង្ក្រាបរបស់មន្ត្រីជំនាញហាក់បីដូចជាគ្រាន់តែទៅ បង្អើលៗក្រុមឈ្មួញតែប៉ុណ្ណោះ។ បើពួកគេរត់គេចសល់បន្តិចបន្តួច បានត្រឹមប្រមូលវត្ថុតាងយកមកដុតបំផ្លាញចោល មិនបានចាប់ខ្លួនអ្នកលក់ដូរផាកពិន័យ ឬបញ្ជូនទៅ តុលាការ ទើបពួកគេមិនរាងចាលនៅ តែបន្តលក់សាច់សត្វព្រៃជារៀងរាល់ថ្ងៃ។

ពាក់ព័ន្ធក្នុងករណីលក់សាច់សត្វព្រៃខាងលើនេះ លោក អន ចាន់សុជាតិ នាយខណ្ឌរដ្ឋបាលព្រៃឈើខេត្តស្ទឹងត្រែង បានឱ្យដឹងនៅ ថ្ងៃទី ១៦ ខែធ្នូនេះថា លោកនឹងធ្វើការរឹតបន្តឹងការលក់សត្វព្រៃខុសច្បាប់។ ជាក់ស្ដែងប៉ុន្មានថ្ងៃកន្លងមកនេះ ក៏មានការបង្ក្រាបផងដែរ តែពួកគេហាក់ដូចជាមិនរាងចាល។

លោកនាយខណ្ឌរដ្ឋបាលព្រៃឈើបានបន្តថា ម្សិលមិញនេះ លោកជាប់ប្រជុំជាមួយមន្ត្រីការងារ មិនបានចុះទៅ ទៅ ពិនិត្យផ្ទាល់។ លោកបន្តថា លោកនឹងដាក់ភ្នាក់ងារទៅ ពិនិត្យ និងបញ្ជាកម្លាំងផ្នែកសង្កាត់ចុះបង្ក្រាបការលក់ដូរសាច់សត្វព្រៃដោយខុសច្បាប់នេះ។

គួរបញ្ជាក់ថា សាច់សត្វព្រៃលក់នៅ ផ្សារទាំងនោះត្រូវបានមានការលើកឡើងថា ជ្រូកព្រៃបានមកពីការដាក់អន្ទាក់ ឬដាក់ម៉ាស៊ីនឆក់របស់ព្រាននៅ ក្នុងចំការ រីឯសត្វឈ្លូស ប្រើស កាំប្រម៉ា អណ្ដើក និងសត្វជាច្រើនប្រភេទទៀត ត្រូវបានគេរុករក ឬបរបាញ់នៅតាមព្រៃជ្រៅ ៗ យកមកលក់ឱ្យក្រុមឈ្មួញនៅ ផ្សារស្ទឹងត្រែង៕

អត្ថបទ៖ ងិន លីម