ព័ត៌មានជាតិ
រដ្ឋមន្រ្តីក្រសួងព័ត៌មាន គាំទ្រការបង្កើតកម្មវិធីព័ត៌មានផ្សេងៗរបស់សារព័ត៌មានកម្ពុជាថ្មី ដើម្បីបម្រើមហាជន
ថ្នាក់ដឹកនាំផ្នែកព័ត៌មានរបស់សារព័ត៌មានកម្ពុជាថ្មីនៅព្រឹកថ្ងៃអង្គារនេះ បានចូលជួបសម្តែងការគួរសម និងសុំអនុសាសន៍ណែនាំផ្សេងៗពីលោក ខៀវ កាញារីទ្ធ រដ្ឋមន្រ្តីក្រសួងព័ត៌មាន នៅទីស្តីការក្រសួងព័ត៌មាន។ នៅក្នុងជំនួបនេះ លោក ខៀវ កាញារីទ្ធ បានសម្តែងការកត់សម្គាល់ចំពោះការវិវត្តនានារបស់សារព័ត៌មានកម្ពុជាថ្មី ហើយបានគាំទ្រការបង្កើតនូវកម្មវិធីព័ត៌មានជាច្រើនជាបន្តបន្ទាប់របស់កម្ពុជាថ្មី ដើម្បីបម្រើមហាជន។
លោក មៃ សុខលីម និពន្ធនាយកសារព័ត៌មានកម្ពុជាថ្មី បានបង្ហាញប្រាប់លោករដ្ឋមន្រ្តី ខៀវ កាញារីទ្ធ ពីការវិវត្តនានារបស់កម្ពុជា ពិសេស ការវិវត្តពីកាសែតបោះពុម្ភជាក្រដាសមកជាសារព័ត៌មានអនឡាញ ដើម្បីដើរឲ្យទាន់សភាពការណ៍ជាក់ស្តែងនៃបច្ចេកវិទ្យា និងតម្រូវការព័ត៌មានរបស់ប្រជាពលរដ្ឋ។ លោក មៃ សុខលីម បានលើកឡើងថា សារព័ត៌មានកម្ពុជាថ្មី បានបន្តផ្សព្វផ្សាយតាមវេបសាយ តាមអេប និងតាមបណ្តាញសង្គមហ្វេសប៊ុក ដោយទទួលបានការគាំទ្រច្រើនពីសំណាក់មហាជនកម្ពុជា។
ជាមួយគ្នានេះ និពន្ធនាយកសារព័ត៌មានកម្ពុជាថ្មី ក៏បានជម្រាបជូនរដ្ឋមន្ត្រីក្រសួងព័ត៌មានថា ក្រុមអ្នកសារព័ត៌មានកម្ពុជាថ្មី តែងតែផលិត និងផ្សព្វផ្សាយនូវព័ត៌មាន ដែលមានក្រមសីលធម៌ វិជ្ជាជីវៈ និងគុណភាពជូនដល់ប្រិយមិត្តអ្នកអាន និងអ្នកទស្សនា។ ក្នុងនោះ សារព័ត៌មានកម្ពុជាថ្មី តែងតែផ្សព្វផ្សាយនូវព័ត៌មានពាក់ព័ន្ធនឹងបញ្ហានយោបាយ សង្គម សេដ្ឋកិច្ច សិល្បៈកម្សាន្ដ និងសន្តិសុខសង្គមជាដើម។ បន្ថែមលើនេះ កម្ពុជាថ្មី ក៏បានបង្កើតនូវកម្មវិធីសម្ភាសន៍ផ្តាច់មុខលើប្រធានបទក្តៅៗ កម្មវិធីមាតុភូមិខ្ញុំ កម្មវិធីដែនដីបុព្វបុរស កម្មវិធីSession 26 កម្មវិធីផ្សាយផ្ទាល់Real Time ព្រមទាំង កម្មវិធីរីកចម្រើនក្រោមដំបូលសន្តិភាព(Grow under Peace)។
ចំពោះកម្មវិធីព័ត៌មានថ្មីទាំងអស់នេះ លោក ខៀវ កាញារីទ្ធ បានសម្តែងការគាំទ្រ ហើយលោកបានបញ្ជាក់ថា លោកតែងតែបានតាមដានកម្មវិធីផ្សាយព័ត៌មានរបស់សារព័ត៌មានកម្ពុជាថ្មីជារៀងរាល់ថ្ងៃ។ លោករដ្ឋមន្រ្តី បានអះអាងថា នាពេលបច្ចប្បន្ននេះ សារព័ត៌មាននានានៅក្នុងប្រទេសកម្ពុជា បានប្រកួតប្រជែងគ្នាខ្លាំងណាស់ក្នុងការធ្វើព័ត៌មានល្អៗ ដើម្បីទាក់ទាញការចាប់អារម្មណ៍ពីក្រុមហ៊ុនផ្សព្វផ្សាយពាណិជ្ជកម្ម និងប្រជាពលរដ្ឋ។ ទោះជាយ៉ាងណាក៏ដោយ លោករដ្ឋមន្រ្តីក្រសួងព័ត៌មាន បានជំរុញឱ្យសារព័ត៌មានទាំងអស់បន្តផ្សព្វផ្សាយព័ត៌មានប្រកបដោយក្រមសីលធម៌ វិជ្ជាជីវៈ និងមានគុណភាព ដើម្បីឲ្យអ្នកអាន អ្នកទស្សនា ទទួលបាននូវព័ត៌មានពិត និងទទួលបាននូវចំណេះដឹងថ្មីៗ។
ជុំវិញបញ្ហានេះ និពន្ធនាយកសារព័ត៌មានកម្ពុជាថ្មី លោក មៃ សុខលីម បានជម្រាបរដ្ឋមន្រ្តីក្រសួងព័ត៌មានថា ការរាយការណ៍ និងការផ្សព្វផ្សាយព័ត៌មានប្រកបដោយក្រមសីលធម៌ វិជ្ជាជីវៈ និងមានគុណភាព គឺជាគោលដៅចម្បងរបស់សារព័ត៌មានកម្ពុជាថ្មីតែម្តង។ លោកថា សារព័ត៌មានកម្ពុជាថ្មីតែងតែបានផ្សព្វផ្សាយនូវព័ត៌មានពិតឥតលម្អៀង ដើម្បីជាការរួមចំណែកជាមួយរាជរដ្ឋាភិបាល ក៏ដូចជា ក្រសួងព័ត៌មាន ក្នុងការប្រយុទ្ធប្រឆាំង និងលុបបំបាត់នូវព័ត៌មានក្លែងក្លាយនៅក្នុងប្រទេសកម្ពុជា៕
អត្ថបទ ៖ វណ្ណ សុគន្ធា
-
ព័ត៌មានជាតិ៣ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ១២ ម៉ោង ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានអន្ដរជាតិ៥ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
កីឡា៦ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត
-
ជីវិតកម្សាន្ដ៥ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
សន្តិសុខសង្គម២ ថ្ងៃ ago
សមត្ថកិច្ចស្រុកស្វាយលើ ឃាត់ខ្លួនប្តីប្រពន្ធ ១គូសង្ស័យរួមគំនិតសម្លាប់កូនខ្លួនឯង អាយុទើបតែ ២២ខែ
-
សន្តិសុខសង្គម១៩ ម៉ោង ago
បឋម៖ អគ្គិភ័យកំពុងឆេះផ្ទះពលរដ្ឋក្នុងបុរីពិភពថ្មីកំបូល
-
សន្តិសុខសង្គម១ សប្តាហ៍ ago
បឋម៖ អគ្គិភ័យកំពុងឆេះរោងចក្រជិតផ្សារបែកចាន (មានវីដេអូ)