ការបង្រៀន និងរៀនកម្រិតមត្តេយ្យសិក្សា ដំណើរការចាប់ពីសប្ដាហ៍ក្រោយទៅ

ការបើកបវេសនកាលឆ្នាំសិក្សា ២០២១-២០២២ នៅតាមគ្រឹះស្ថានសិក្សាចំណេះទូទៅ និងការបើកដំណើរការបង្រៀន និងរៀននៅកម្រិតមត្តេយ្យសិក្សា សម្រាប់កុមារចាប់ពីអាយុ៣ឆ្នាំ ទៅអាយុក្រោម៦ឆ្នាំ និងកម្មវិធីអប់រំកុមារតូចគ្រប់រូបភាព ចាប់ពីថ្ងៃទី១០ ខែមករា ឆ្នាំ២០២២តទៅ

លោកបណ្ឌិតសភាចារ្យ ហង់ជូន ណារ៉ុន រដ្ឋមន្ត្រី ក្រសួងអប់រំ យុវជន និងកីឡា បានឱ្យដឹងនៅក្នុងលិខិតចុះថ្ងៃទី ៥ ខែមករា ផ្ញើទៅប្រធានមន្ទីរអប់រំ យុវជន និងកីឡារាជធានីខេត្តថា ផ្អែកតាមស្ថានភាពនៃការរាតត្បាតនៃជំងឺកូវីដ-១៩ នាពេលបច្ចុប្បន្ននៅទូទាំងប្រទេស ដែលមានកម្រិតឆ្លងទាបបំផុត និងស្របតាមការប្រកាសបើកដំណើរការសង្គមសេដ្ឋកិច្ចឡើងវិញតាមគន្លងប្រក្រតីភាពថ្មី និងអនុវត្តតាមអនុសាសន៍របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្រសួងអប់រំ យុវជន និងកីឡា សូមស្នើលោក លោកស្រី ប្រធានមន្ទីរ ណែនាំដល់គ្រប់គ្រឹះស្ថានសិក្សាចំណេះទូទៅ និងគ្រឹះស្ថានមតេយ្យសិក្សា ព្រមទាំងកម្មវិធីអប់រំកុមារតូចគ្រប់រូបភាព ត្រូវចាប់ផ្ដើមទទួលការចុះឈ្មោះចូលរៀន និងដំណើរការបវេសនការឆ្នាំសិក្សា ២០២១‑២០២២ ចាប់ពីថ្ងៃទី ១០ ខែមករា ឆ្នាំ ២០២២ តទៅ។

លោករដ្ឋមន្ត្រីបានណែនាំដល់លោក លោកស្រី ប្រធានមន្ទីរ ផ្សព្វផ្សាយឱ្យបានទូលំទូលាយដល់គ្រប់គ្រឹះស្ថានសិក្សាចំណេះទូទៅ មតេយ្យសិក្សា និងកម្មវិធីអប់រំកុមារតូចគ្រប់រូបភាព ដើម្បីអនុវត្តឱ្យមានប្រសិទ្ធភាព។

ថ្លែងនៅក្នុងពិធីប្រគល់ប្រាក់រង្វាន់ជូនកីឡាការិនី អ៊ុក ស្រីមុំ នៅព្រឹកថ្ងៃទី ០៥ ខែមករានេះ សម្ដេចតេជោ ហ៊ុន សែនបានជូនដំណឹងដល់អាណាព្យាបាលទូទាំងប្រទេសថា ចាប់ពីថ្ងៃទី ១០ ខែមករា ឆ្នាំ ២០២២ គឺជាថ្ងៃបើកបវេសនកាលឆ្នាំសិក្សា ២០២១-២០២២ ជាមួយនឹងការបើកមតេយ្យសិក្សា ដែលមានអាយុ ចាប់ពី ៣ ឆ្នាំដល់ ៥ ឆ្នាំ។

ទន្ទឹមនឹងការប្រកាសបើកបវេសនកាលឆ្នាំថ្មីនេះ សម្តេចតេជោ ក៏បានក្រើនរំលឹកដល់ឪពុកម្តាយ ឬអាណាព្យាបាលសិស្សទាំងអស់ ត្រូវប្រុងប្រយ័ត្នខ្ពស់នឹងជំងឺកូវីដបំប្លែងខ្លួនថ្មី អូមីក្រុង ដែលកំពុងរីករាលដាលខ្លាំង។

សម្តេចតេជោ ហ៊ុន សែន បញ្ជាក់ថា បច្ចុប្បន្នមានសិស្សានុសិស្សចំនួនជាង ៣ លាននាក់ ដែលកំពុងសិក្សា នៅកម្ពុជា ដូច្នេះត្រូវចូលរួមការពារទាំងអស់គ្នា មិនចំពោះតែសិស្សសាលាមតេយ្យនោះទេ៕

អត្ថបទ៖ សំអឿន