យុទ្ធនាការចាក់វ៉ាក់សាំងលើកទី៣ នៅក្រុងសិរីសោភ័ណមានចំនួន ២ ទីតាំង រយៈពេលមិនកំណត់

ខេត្តបន្ទាយមានជ័យ៖ លោកឧត្តមសេនីយ៍ទោ ឈុន ម៉ៅ មេបញ្ជាការរងយោធភូមិភាគទី ៥ ជាមេបញ្ជាការតំបន់ទិសទី ១ និងជាប្រធានក្រុមទី ១ នៅព្រឹក ថ្ងៃទី ១០ ខែមករា ឆ្នាំ ២០២២ នេះ បានដឹកនាំក្រុមគ្រូពេទ្យ នៅមន្ទីរពេទ្យសំពៅលូន យោធភូមិភាគទី ៥ សហការជាមួយក្រុមគ្រូពេទ្យកងពលតូចថ្មើរជើងលេខ ៥២ ចុះបើកយុទ្ធនាការចាក់ថ្នាំចាក់វ៉ាក់សាំងជំរុញដូសទី៣ជូនដល់ ប្រជាពលរដ្ឋ អាជីវករ កម្មករ កម្មការនី ព្រះសង្ឃ ក្នុងក្រុងសិរីសោភ័ណ។

ទីតាំងចាក់វ៉ាក់សាំងនោះមានចំនួន ២ ទីតាំង ១ ក្នុងបរិវេណនៃវត្ត សមាធិផល ក្នុងភូមិ៤ សង្កាត់ព្រះពន្លា ក្រុងសិរីសោភ័ណ។ ទីតាំងទី ២ នៅក្នុងបរិវេន សិករងខេត្តបន្ទាយមានជ័យ ចំណែកការចាក់វ៉ាក់សាំងគ្មានកំណត់ថ្ងៃ គឺចាក់ទាល់តែអស់អ្នកមកចាក់ ហើយការចាក់វ៉ាក់សាំងនេះដោយមិនគិតថ្លៃ។

លោក ហ៊ឹល រ៉ាយ៉ា អភិបាលក្រុងសិរីសោភ័ណ បានប្រាប់អ្នកយកព័ត៌មានឲ្យដឹងថា ការចាក់វ៉ាក់សាំងដូសជំរុញជូនប្រជាពលរដ្ឋក្នុងក្រុងសិរីសោភ័ណ គឺចាប់ពីថ្ងៃទី ១០ ខែមករា ឆ្នាំ ២០២២ នេះតទៅ ចាក់ទាល់តែអស់មនុស្សមកចាក់ ទើបឈប់។ ការចាក់វ៉ាក់សាំងដូសទី៣ជូនប្រជាពលរដ្ឋ អាជីវករ កម្មករ កម្មការនី ព្រះសង្ឃ បានដំណើរការលឿនបំផុត ព្រោះក្រុមការងារគ្រប់ផ្នែក និងពលរដ្ឋសហការគ្នា បំពេញការងារបានយ៉ាងរលូន នៅ ២ កន្លែង ដោយចាក់វ៉ាក់សាំងប្រភេទ SINOVAC។

លោកបានបញ្ជាក់ឱ្យដឹងបន្តថា យុទ្ធនាការចាក់វ៉ាក់សាំងដួសជំរុញជូនប្រជាពលរដ្ឋ ក្រុមយោធាយោធភូមិភាគ ជួយអន្តរាគមន៍ មន្ត្រីអាជ្ញាធរ ប្រជាការពារ យុវជន ស.ស.យ.ក ជួយលើការងារសម្របសម្រួលបែបបទរដ្ឋបាល សណ្តាប់ធ្នាប់ ការចុះ និងហៅឈ្មោះ ផ្ទៀងផ្ទាត់បញ្ជូលទិន្នន័យក្នុងកុំព្យួទ័រជាដើម។

លោកឧត្តមសេនីយ៍ទោ ឈុន ម៉ៅ បានកោតសរសើរ និងថ្លែងអំណរគុណដល់ក្រុមការងារទាំងកងកម្លាំង ទាំងអាជ្ញាធរដែលបានខិតខំប្រឹងប្រែងចាក់វ៉ាក់សាំងបង្ការកូវីដ-១៩ ជូនពលរដ្ឋនៅក្នុងក្រុងសិរីសោភ័ណដោយមិនខ្លាចពីការនឿយហត់។ លោកបានណែនាំក្រុមការងារត្រូវមាន វិន័យ ការទទួលខុសត្រូវចំពោះថ្នាក់លើ ក៏ដូចពលរដ្ឋ និងបច្ចេកទេស ដើម្បីឱ្យដំណើរការចាក់វ៉ាក់សាំងប្រព្រឹត្តទៅរលូន បានលទ្ធផលល្អ មានប្រសិទ្ធភាព និងប្រកបដោយការទទួលខុសត្រូវ៕

អត្ថបទ៖ វ៉ាន់ ណាង