ព័ត៌មានជាតិ

លោក សាយ សំអាល់ ប្រាប់យុវជនកុំទាន់ស្កប់ស្កល់នឹងសន្តិភាពបច្ចុប្បន្ន ប៉ុន្តែត្រូវពង្រឹងសមត្ថភាពបន្ថែម

បានផុស

៤ years មុន

នៅ

ថ្ងៃអាទិត្យ ១៦ មករា ២០២២

ដោយ

លោក សាយ សំអាល់ រដ្ឋមន្ត្រីក្រសួងបរិស្ថាន និងជាប្រធានស្តីទីសហភាពសហព័ន្ធយុវជនកម្ពុជា បានថ្លែងថា ក្នុងនាមយុវជន កុំស្កប់ស្កល់នឹងសន្តិភាពបច្ចុប្បន្ន ប៉ុន្តែត្រូវពង្រឹងសមត្ថភាពបន្ថែមទៀត ដើម្បីចូលរួមអភិវឌ្ឍន៍ប្រទេសជាតិឲ្យកាន់តែរីកចម្រើន។ លោក សាយ សំអាល់ ថ្លែងដូច្នេះក្នុងពេលអញ្ជើញបញ្ចុះបឋមសិលាសាងសង់អគាស្នាក់ការសហភាពសហព័ន្ធយុវជនកម្ពុជាសាខាខេត្តកំពង់ចាម និងសំណេះសំណាលជាមួយសមាជិកសមាជិកា ស.ស.យ.ក ខេត្តកំពង់ចាម នៅសាលាខេត្តកំពង់ចាម កាលពីពេលថ្មីៗនេះ។

ជាមួយគ្នានេះ លោក សាយ សំអាល់ បានជំរុញលើកទឹកចិត្តដល់យុវជនសហភាពសហព័ន្ធយុវជនកម្ពុជាទាំងអស់ បន្តខិតខំប្រឹងប្រែងធ្វើកិច្ចការងារសង្គម និងធ្វើជាធនធានមួយដែលមានប្រយោជន៍សម្រាប់គ្រួសារ និងសង្គមជាតិ។ ម្យ៉ាងទៀត យុវជន ត្រូវកសាងសមត្ថភាពចូលរួមថែរក្សានូវអ្វីដែលមាននាពេលបច្ចុប្បន្ន និងបន្តអភិវឌ្ឍន៍ខ្លួនឲ្យបានល្អប្រសើរនាសម័យបច្ចេកវិទ្យានេះ។

បន្ថែមលើនេះ លោករដ្ឋមន្រ្តីក្រសួងបរិស្ថាន ក៏បានអំពាវនាវដល់សមាជិក សមាជិកា ស.ស.យ.ក ខេត្តកំពង់ចាម ទាំងអស់ចូលរួមប្រយុទ្ធប្រឆាំងការឆ្លងរីករាលដាលជំងឺកូវីដ១៩ ដោយត្រូវចេះផ្សព្វផ្សាយដល់ប្រជាពលរដ្ឋតាមមូលដ្ឋាននូវវិធានសុខាភិបាល បីកុំ និង បីការពារ ឲ្យខ្ជាប់ខ្ជួន ពោល គឺត្រូវនាំគ្នាមកទទួលវ៉ាក់សាំងបង្ការជំងឺកូវីដ១៩ ដែលជាដូសទី៣ ដូសជម្រុញបន្ថែមទៀត៕

អត្ថបទ ៖ ហុង ម៉េង ហៀ