អាជ្ញាធរស្រុកមណ្ឌលសីមា មិនអនុញ្ញាតឲ្យសង់រីសត លើដីចំណីព្រែកកោះប៉ោ ឡើយ

អភិបាលរងស្រុកមណ្ឌលសីមា មិនអនុញ្ញាតឲ្យម្ចាស់វិនិយោគសង់រីសត លើដីចំណីព្រែកកោះប៉ោឡើយ គ្រាដែលម្ចាស់គម្រោង ធ្លាប់ប្រព្រឹត្តម្តងរួចមកហើយកន្លងទៅ។ លោក ប៉ែន ប៊ុនឈួយ អភិបាលរងស្រុក ដឹកនាំក្រុមការងារចុះពិនិត្យមើល ទីតាំងសាងសង់រីសតមួយកន្លែងរបស់ ឈ្មោះ អ៊ួង ជាឈន ស្ថិតនៅចំណុចភូមិនាងកុក ឃុំប៉ាក់ខ្លង កាលពីថ្ងៃទី ៣ ខែកុម្ភ: ឆ្នាំ២០២២កន្លងទៅ។

លោកអភិបាលរងស្រុកមណ្ឌលសីមារូបនេះ ក៏អះអាងនៅរសៀលថ្ងៃទី ៧ ខែកុម្ភៈនេះថា លទ្ធផលចុះពិនិត្យវាយតម្លៃ ពីគម្រោងអភិវឌ្ឍន៍ជារីសតនោះហើយដែរ ដោយលោកណែនាំដល់ម្ចាស់វិនិយោគ មិនត្រូវសង់សំណង់រឹងមាំណាមួយ ចុះដីចំណីព្រែកកោះប៉ោទៀត ទើបគាត់យល់ព្រមសំណើ សុំអភិវឌ្ឍន៍ រួចបញ្ចូនទៅរដ្ឋបាលខេត្តកោះកុងពិនិត្យ សម្រេចបន្ត។

លោក ប៉ែន ប៊ុនឈួយ បានបន្ថែមថា ដីចំណីព្រែកអាចដាដុះជាដើមឈើ ឬលម្អផ្កាភ្ញីសម្រាប់សោភណ្ឌភាពបម្រើដល់វិស័យទេសចរណ៍បាន ដាច់ខាតមិនធ្វើសកម្មភាពសង់សំណង់ណាមួយបានទេ។ ការមានវិធានការលម្អិតបែបនេះ ដោយសារអាជ្ញាធរបារម្ភខ្លាចមហាជន ចោទប្រកាន់ថាអាជ្ញាធរជាអ្នកអនុញ្ញាតឲ្យមានសង់សំណង់ផ្សេងៗ លើចំណីព្រែកធម្មជាតិ។

ចំណែកឯលោក អ៊ួង ជាឈ័ន ជាអ្នកវិនិយោគក៏ទទួលយកនូវអ្វី ដែលជាការណែនាំហាមប្រាម របស់អាជ្ញាធរស្រុកមណ្ឌលសីមាផងដែរ ដោយមិនអភិវឌ្ឍន៍ឲ្យលើពីគម្រោងស្នើសុំរបស់ខ្លួនឡើយ។ អាជ្ញាធរស្រុកមណ្ឌលសីមា បង្ហាញថា លោក ជាឈ័ន បានទិញដីពីប្រជាពលរដ្ឋចំនួន ២ប្លង់ ស្មើនឹងជិត ១០ហិចតាស្ថិតនៅភូមិនាងកុក ឃុំប៉ាក់ខ្លង ក្នុងបំនងចង់វិនិយោគជារីសត៕

អត្តបទ៖ សិរី វឌ្ឍនៈ