តម្លៃប្រេងសាំងកម្ពុជា នឹងហក់ឡើង​មួយកម្រិតទៀត ដោយឥទ្ធិពល​ជម្លោះរុស្ស៊ី អ៊ុយក្រែន

អ្នកនាំពាក្យក្រសួងពាណិជ្ជកម្ម បានឲ្យដឹងថា តម្លៃប្រេងសាំងកម្ពុជា នឹងបន្តកើនឡើងបន្តិចទៀត ដោយសារសភាពការប្រែប្រួលតម្លៃនៅលើទីផ្សារអន្តរជាតិ និងឥទ្ធិពលជម្លោះរវាងរុស្ស៊ី និងអ៊ុយក្រែន។

លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បានប្រាប់កម្ពុជាថ្មី នៅថ្ងៃទី ២៥ ខែ កុម្ភៈថា កម្ពុជា មិនអាចជៀសផុតពីការកើនតម្លៃប្រេងសាំងបានទេ ដោយសារសភាពការពិភពលោក មានការប្រែប្រួល ដូចជា កត្តាវិបត្តិកូវីដ-១៩ និងជម្លោះរវាងរុស្ស៊ី និងអ៊ុយក្រែងជាដើម។ អ្នកនាំពាក្យបន្តថា ប្រេងឆៅបានហក់ឡើងពី ៧០ដុល្លារ ទៅ ១០០ដុល្លារ ក្នុង១បារ៉ែល ដែលនេះជាតម្លៃខ្ពស់ខ្លាំង។

ទោះយ៉ាងណា លោក ប៉ែន សុវិជាតិ អះអាងថា តម្លៃប្រេង មិនអាចហក់ឡើងដល់កម្រិត ៦ ០០០រៀល ក្នុង១លីត្រ ដូចដែលយើងធ្លាប់ជួបប្រទះកាលពីពេលកន្លងទៅទេ។ លោកថា «តម្លៃប្រេងនេះ ស្ថិតនៅក្នុងចំណុចមួយ ដែលយើងសង្ឃឹមថា មានដំណោះស្រាយ ពេលស្ថានភាពនៅរុស្ស៊ី អ៊ុយក្រែន ល្អប្រសើរឡើងវិញ ហើយការគ្រប់គ្រងវិបត្តិកូវីដ នៅលើពិភពលោកបានល្អ តម្លៃប្រេងក៏នឹងមានធ្លាក់ចុះមកវិញ»។

ដូចការលើកឡើងរបស់អ្នកនាំពាក្យក្រសួងពាណិជ្ជកម្មដែរ លោកបណ្ឌិត គី សេរីវឌ្ឍន៍ អ្នកវិភាគ​សេដ្ឋកិច្ច​ នៅរាជ​បណ្ឌិតសភាកម្ពុជា​ លើកឡើងថា តម្លៃប្រេងនៅកម្ពុជា នឹងកើនឡើង ប៉ុន្តែមិនខ្ពស់ខ្លាំងដូចកាលពីឆ្នាំ ២០០៨នោះទេ។ លោកថា កាលពីឆ្នាំ ២០០៨ តម្លៃប្រេងសាំងនៅកម្ពុជា ឡើងដល់ ៦៤០០រៀល ក្នុង១លីត្រ។ នៅក្នុងកាលៈទេសៈនេះ លោកបណ្ឌិត គី សេរីវឌ្ឍន៍ បានបញ្ចេញទស្សនៈថា « ប្រសិនបើរដ្ឋាភិបាលអន្តរាគមន៍កំណត់ថ្លៃលក់ឲ្យទាប នឹងមានវិបត្តិមួយទៀត គឺក្រុមហ៊ុនប្រេងខ្លះ នឹងត្រូវបិទទ្វារ កាត់បន្ថយការនាំប្រេងចូល នាំឲ្យកាន់តែខ្វះខាតបន្ថែមទៀត លើវិស័យនេះ អ៊ីញ្ចឹងនៅលើទីផ្សារសេរី មានតែទុកឲ្យថ្លៃប្រេងនេះ រត់ប្រណាំងគ្នា»។

ទោះយ៉ាងណា លោកបណ្ឌិត គី សេរីវឌ្ឍន៍ សង្កត់ធ្ងន់ថា រដ្ឋាភិបាល ក៏ត្រូវតែពិនិត្យមើលដែរ ថាតើតម្លៃប្រេងនេះ ឡើងលើសតម្លៃប្រេងឆៅ ឬប្រេងនៅលើទីផ្សារអន្តរជាតិដែរឬទេ។​​ លោកថា «ការឃ្លាំមើលរបស់រដ្ឋាភិបាល នឹងចរចាជាមួយក្រុមហ៊ុនប្រេង ធ្វើយ៉ាងណា កុំឲ្យគាត់យកប្រាក់ចំណេញច្រើនពេក ដើម្បីធានាជួយក្នុងវិបត្តិកូវីដ ឲ្យបានចប់សព្វគ្រប់សិន ព្រោះកន្លងមក ក្រសួងពាណិជ្ជកម្មបានធ្វើការងារនេះហើយ»។

អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បានគូសបញ្ជាក់ថា រុស្ស៊ី គឺជាប្រទេសផលិតប្រេង និងហ្គាស ដែលប្រេងរបស់រុស្ស៊ី ធ្វើការនាំចេញទៅចិន និងសហភាពអឺរ៉ុប ហើយនៅពេលដែលមានការដាក់ទណ្ឌកម្មសេដ្ឋកិច្ចលើរុស្ស៊ី បង្អាក់ការនាំចេញប្រេង ធ្វើឲ្យបរិមាណប្រេងសម្រាប់ការផ្គត់ផ្គង់តម្រូវការពិភពលោកមានការថយចុះជាបច្ច័យ នាំឲ្យប្រេងឡើងថ្លៃដែរ។

​លោកថា «យើងមិនអាចគ្រប់គ្រងតម្លៃបាន ដោយសារពឹងផ្អែកលើការនាំចូលប្រេងពីក្រៅប្រទេស ប៉ុន្តែបញ្ហានេះ  មិនមែនកើតឡើងតែកម្ពុជាទេ គឺជាវិបត្តិសកល»។

​​ក្រសួងពាណិជ្ជកម្ម និងស្ថាប័នពាក់ព័ន្ធកំពុងតាមដានយ៉ាងយកចិត្តទុកដាក់ ដោយមិនបណ្តោយឲ្យប្រេងឡើងខ្ពស់ នាំឲ្យប៉ះពាល់ខ្លាំងដល់ជីវភាពប្រជាពលរដ្ឋ ​និងសេដ្ឋកិច្ចខ្លាំងពេកនោះទេ។ នៅក្នុងដំណាក់កាលណាមួយ ក្រសួងនឹងធ្វើកិច្ចអន្តរាគមន៍ចរចាជាមួយវិស័យឯកជន ដើម្បីដោះស្រាយបញ្ហានេះ។ នេះបើតាមការបញ្ជក់របស់លោក ប៉ែន សុវិជាតិ។

យោងតាមក្រសួងពាណិជ្ជកម្ម ចុះផ្សាយថ្ងៃទី១៦ ខែកុម្ភៈ បានឲ្យដឹងថា ចាប់ពីថ្ងៃទី១៦ ដល់ថ្ងៃទី២៨ ខែកុម្ភៈ ឆ្នាំ២០២២ ប្រេងសាំងធម្មតាមានតម្លៃ ៤,៧០០រៀលក្នុងមួយលីត្រ ចំណែកឯប្រេងម៉ាស៊ូតមានតម្លៃ ៤,៤៥០រៀលក្នុងមួយលីត្រ៕

អត្ថបទ៖ ទួន សុផល

​​​