ក្រសួង​សហការ​ជាមួយ​គម្រោង​ឆេន​ពង្រឹង​សហគមន៍​ប្រមូល​ទិញ​បន្លែ​សុវត្ថិភាព​

គម្រោងបន្លែផ្លែឈើកម្ពុជាហៅថា ឆេនដាក់ចេញនូវគោលការណ៍ពង្រឹងសហគមន៍ប្រមូលទិញបន្លែសុវត្ថិភាពហៅថា បន្លែសរីរាង្គរបស់កសិករដែលបានប្រើប្រាស់បច្ចេកទេសដាំដុះដើម្បីជំរុញទៅកសិករផ្សេងទៀតឱ្យផ្លាស់ប្តូរទំលាប់នៃការដាំដុះ។

លោក តូច ប៊ុនហ៊ួ​ រដ្ឋលេខាធិការក្រសួងកសិកម្ម រុក្ខាប្រមាញ់​ និងនេសាទបាន​មានប្រសាសន៍ក្នុង​កិច្ចប្រជុំថា នេះជាយន្តការជួយគាំទ្របន្លែក្នុងស្រុក ដែលក្រុមកសិករផលិតបាន ដើម្បីលើកទឹកចិត្ត​កសិករដែលខិតខំដាំដុះឈានទៅបង្កើនប្រាក់ចំណូលប្រចាំគ្រួសាររបស់ពួកគាត់។

លោករដ្ឋលេខាធិការមានប្រសាសន៍បន្តថា កិច្ចការងារនេះស្នើឱ្យមន្ត្រីមន្ទីរកសិកម្មខេត្ត សហការ​ជាមួយផ្នែកដៃគូពិនិត្យមើលគម្រោងថ្មីនិងលើកទឹកចិត្តក្រុមសមាជិកសហគមន៍ប្រមូលទិញចាស់ ដើម្បីបំពេញកិច្ចការងារផ្នែកទីផ្សារឱ្យមានប្រសិទ្ធភាពជូនកសិករយើងកុំឱ្យមានបន្លែកកស្ទះ។

លោកជាថាវរិទ្ធអភិបាលរងខេត្ត បានទទួលស្គាល់ថា៖នេះជាវឌ្ឍនភាពមួយក្នុងការជំរុញឲ្យមានទីផ្សារបន្លែក្នុងស្រុក  និងបានកាត់បន្ថយការ​បរិភោគ​បន្លែ​នាំចួល ដើម្បីលើកកម្ពស់ការថែរក្សាសុខភាពផង  ព្រោះកាលណាយើង​មានមជ្ឈមណ្ឌល​តាំងលក់​បន្លែ អតិជននិងងាកមកទិញបន្លែសរីរាង្គក្នុងស្រុកដែលមានគុណភាពសម្រាប់យើងទាំងអស់គ្នាបរិ​ភោគ។ 

លោក ទុំ នីរ៉ូ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែងបានចាត់ទុកថា នេះជាមុខព្រួញមួយដែលមន្ទីរកសិករកំពុងតែអនុវត្ត ហើយកសិករក៍បានយកចិត្តទុកដាក់​ខិតខំដាំដុះ​នៅ​តាមមូលដ្នានបានកាន់តែច្រើននៅឆ្នាំ ​២០២២​នេះ។

លោកបន្តថា គម្រោងសាកវប្បកម្មកម្ពុជា និងគម្រោងបន្លែផ្លែឈើកម្ពុជាហៅកាត់ថា ឆេននៅបន្តជួយកសិករយើងបន្តទៀត និងកំពុងរៀបចំការផ្តល់ទុនជាទឹកប្រាក់ចំនួន២០លានរៀលក្នុងមួយក្រុម  សម្រាប់ឱ្យ​ធ្វើការ​ប្រមូលទិញបន្លែនាំចេញមកទីផ្សារ។

លោកកែវជឿនកសិកដាំបន្លែគ្រប់មុខនៅភូមិឃុំកំភុន ស្រុកសេសានបានទទួលស្គាល់ថា ប៉ុន្មានឆ្នាំចុងក្រោយនេះគម្រោងឆេនបានផ្តល់បទពិសោធន៍នូវការដាំដុះដំណាំកសិកម្ម  ប្រកបដោយបច្ចេកទេស និងផលិតទទួលបានទិន្នផលខ្ពស់។ 

លោកបន្ថែមថា បច្ចុប្បន្នសង្កេតឃើញសហគមន៍ក៍ដូចជាគ្រួសារកសិករបង្កើត  បានសួនបន្លែសំរាប់បង្កើនជីវភាពរស់នៅបានល្អ   នឹងបានបរិភោគបន្លែធម្មជាតិដែលដាំដុះដោយខ្លួនឯងផង  ដើម្បីនាំគ្នាលើកកម្ពស់ការពារសុខភាព  និងលក់​ដូរ​ក្នុងសហគមន៍បានប្រាក់បន្ថែមទៀត។

សូមបញ្ជាក់ថា៖គណៈកម្មាធិការតម្រង់ទិសនៃគម្រោងបន្លែផ្លែឈើនេះ មានខេត្តចំនួន៤បានចូលរួមក្នុងនោះមានខេត្តក្រចេះ -ស្ទឹងត្រែង -ព្រះវិហារ-និងឧត្តរមានជ័យ ដើម្បីរួមគ្នាលើកកម្ពស់ទីផ្សារបន្លែក្នុងពេលដែលបច្ចុប្បន្នខេត្តទាំង៤នេះមានសកិករចំនួន ១ ម៉ឺនគ្រួសារកំពុងនាំគ្នាផលិតបន្លែសរីរាង្គ៕

អត្ថបទ៖ ងិនលីម