ក្រសួងអប់រំ ប្រកាសដាក់ឱ្យដំណើរការជាផ្លូវការគេហទំព័រធនធានអប់រំកម្ពុជា

ក្រសួងអប់រំ យុវជន និងកីឡា នឹងដាក់ឱ្យដំណើរការជាផ្លូវការគេហទំព័រធនធានអប់រំកម្ពុជា (OER Cambodia) គឺhttps://oer.moeys.gov.kh ជាផ្លូវការចាប់ពីថ្ងៃទី០១ ខែមីនា ឆ្នាំ២០២២នេះតទៅ សម្រាប់គាំទ្រដល់ការបង្រៀន និងរៀនស្របទៅតាមបរិបទនៃការអប់រំតាមបែបឌីជីថល និងបដិវត្តឧស្សាហកម្ម៤.០ ប្រកបដោយគុណភាព ប្រសិទ្ធភាព និងសិក្ដិសិទ្ធភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីជូនដំណឹងរបស់ក្រសួងអប់រំយុវជន និងកីឡាចុះផ្សាយនៅថ្ងៃទី០១ មីនានេះ បានឱ្យដឹងថា គេហទំព័រធនធានអប់រំកម្ពុជា បានបង្កើតឡើងក្នុងគោលបំណងលើកកម្ពស់ ជំរុញការចែករំលែក និងប្រើប្រាស់ មាតិកាអប់រំឌីជីថល ឱ្យកាន់តែសម្បូរបែបសម្រាប់បម្រើដល់ការបង្រៀន និងរៀនតាមរយៈការអប់រំតាមបែបគន្លងថ្មី ក្នុងការចាប់យក និងពង្រឹងការប្រើប្រាស់បច្ចេកវិទ្យាកាន់តែទូលំទូលាយ ជាពិសេស ការលើកកម្ពស់គុណវុឌ្ឍគ្រួបង្រៀន ក្នុងការធ្វើបដិវត្តកម្មឌីជីថលក្នុងប្រព័ន្ធអប់រំ ស្របពេលដែលស្ថានភាពនៃការរីកលវាលនៃជំងឺកូវីដ-១៩ នៅតែបន្ត។

លើសពីនេះ គេហទំព័រនេះ ក៏ផ្តល់ភាពងាយស្រួលដល់លោកគ្រូអ្នកគ្រូ សិស្ស និស្សិត អ្នកស្រាវជ្រាវ ក៏ដូចជាសាធារណជនទូទៅ ក្នុងការស្វែងរក ឯកសារឌីជីថលតាមកម្រិតថ្នាក់ ចាប់ពីមត្តេយ្យសិក្សារហូតដល់កម្រិតឧត្តមសិក្សាតាមប្រភេទក្រុមមុខវិជ្ជា និងអាចស្វែងរក តាមប្រភេទឯកសារដូចជា ពហុមេឌៀអន្តរកម្ម បទបង្ហាញ វីដអូ និងសំឡេង ឯកសារបង្រៀននិងសៀវភៅណែនាំ កិច្ចតែងការ រូបភាពផ្ទាំងធំ និងរូបភាពគំនូរជីវចលអប់រំ ល្បែងសិក្សា និងឯកសារស្រាវជ្រាវនានា។

ក្រសួងអប់រំ បានលើកទឹកចិត្តដលបុគ្គលិកអប់រំ និងអ្នកសិក្សាស្រាវជ្រាវ ដែលបំណងចែករំលែក ស្នាដៃស្រាវជ្រារបស់ខ្លួន ឯកសារបង្រៀន កិច្ចតែងការព្រមទាំងឯកសារអប់រំផ្សេងៗទៀត តាមរយៈការដាក់ស្នើឯកសារទាំងអស់សម្រាប់ផ្តល់ជាប្រយោជន៍ដល់អ្នកប្រើប្រាស់។ ក្រសួងអប់រំ មានក្រុមការងារត្រួតពិនិត្យខ្លឹមសារមាតិកាទាំងអស់នោះ និងផ្សព្វផ្សាយជាសាធារណៈទៅក្នុងគេហទំព័រ។ រាល់ខ្លឹមសារលើគេហទំព័រ ស្ថិតក្រោមអាជ្ញាប័ណ្ណដែលអនុញ្ញាតឱ្យចម្លង និងចែកចាយបន្តលើកលែងតែសម្ភារដែលស្ថិតក្រោមបញ្ជី “រក្សាសិទ្ធិ”។

ក្រសួងអប់រំ បានណែនាំដល់គណៈគ្រប់គ្រងគ្រឹះស្ថានសិក្សា បុគ្គលិកអប់រំ សិស្ស-និស្សិត និងសាធារណជនទាំងអស់ ចូលរួមប្រើប្រាស់គេហទំព័រធនធានអប់រំកម្ពុជា OER Cambodia ឱ្យបានទូលំទូលាយ និងចែករំលែកព័ត៌មានបន្តតាមការគួរ៕

ដោយ ៖ សំអឿន