សម្ដេចតេជោ ហ៊ុន សែន អំពាវនាវពលរដ្ឋបន្តការពារពីកូវីដ ខណៈរាជរដ្ឋាភិបាលកាត់បន្ថយការរឹតបន្តឹងមួយចំនួន  

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបន្តអំពាវនាវដល់ប្រជាពលរដ្ឋខ្មែរ ឲ្យបន្តយកចិត្តទុកដាក់ការពារខ្លួនពីការឆ្លងជំងឺកូវីដ-១៩ ទោះបីជាស្ថានភាពជំងឺនៅកម្ពុជា មានការថមថយហើ​យក៏ដោយ។ ការអំពាវនាវជាថ្មី របស់សម្ដេចតេជោនាយករដ្ឋមន្ត្រីនេះ បានធ្វើឡើងក្នុងពិធីសម្ពោធដា​ក់ឲ្យប្រើប្រាស់ភូមិកុមារ SOS ព្រៃវែង ក្រុងព្រៃវែង ខេត្តព្រៃវែង នាព្រឹកថ្ងៃទី ១៧ ខែមីនា ឆ្នាំ ២០២២នេះ។

សម្ដេចតេជោ ហ៊ុន សែន បានបន្តអំពាវនាវឲ្យអនុវត្តវិធានការសុខាភិបាល និងវិធានការ ៣ការពារ ៣កុំ ដើម្បីបង្ការទប់ស្កាត់ការឆ្លងជំងឺកូវីដ-១៩ ជាពិសេសមេរោគបំប្លែងខ្លួនថ្មី អូមីក្រុង ខណៈដែលរាជរដ្ឋាភិបាលកម្ពុជា បានកាត់បន្ថយនូវការរឹតបន្តឹងលើបញ្ហាមួយចំនួន។ ជាមួយគ្នានេះ សម្ដេចតេជោនាយករដ្ឋមន្ត្រី ក៏បានបញ្ជាក់ដែរថា កាលពីថ្ងៃម្សិលមិញ សម្ដេច​បានសម្រេចលើបញ្ហាចំនួន ៣ ដើម្បីដាក់ឲ្យអនុវត្តចាប់ពីថ្ងៃនេះតទៅ។

ទី១. អ្នកដែលមកពីក្រៅប្រទេស មិនតម្រូវឲ្យមានការធ្វើតេស្ដ PCR រយៈពេល ៧២ម៉ោងទៀតទេ។

ទី២. ពេលដល់ព្រលានយន្ដហោះរបស់កម្ពុជា មិនចាំបាច់ធ្វើតេស្ដទៀតនោះទេ។

ទី៣. មិនចាំបាច់ទៅយកវីសានៅប្រទេសណានោះទេ គឺយកវីសាពេលមកដល់តែម្ដង។

សូមជម្រាបថា ក្រសួងសុខាភិបាលកម្ពុជា កាលពីយប់មិញ បានចេញសេចក្ដីប្រកា​សព័ត៌មានមួយ ដោយបានឲ្យដឹងថា យោងចំណារឯកភាពដ៏ខ្ពង់ខ្ពស់ របស់សម្តេចតេជោ ហ៊ុន សែន នាយករដ្ឋមន្ត្រី ចុះថ្ងៃទី ១៦ ខែមីនា ឆ្នាំ ២០២២ គណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ-១៩ សម្រេចលុបចោលលក្ខខណ្ឌតម្រូវឲ្យអ្នកដំណើរ មកពីបរទេសត្រូវបង្ហាញលទ្ធផលតេស្ត PCR អវិជ្ជមាន ក្នុងរយៈពេល ៧២ម៉ោង មុនពេលមកដល់កម្ពុជា។ លុបចោលការតម្រូវឲ្យធ្វើតេស្តរហ័ស នៅពេលមកដល់កម្ពុជា។

ជាមួយគ្នានេះ ក្រសួងសុខាភិបាល ក៏អនុញ្ញាតឲ្យបើកដំណើរការឡើងវិញ នូវការផ្តល់ទិដ្ឋាការពេលមកដល់ (Visa, on Arrival) សម្រាប់អ្នកដំណើរអន្តរជាតិទាំងអស់ ទាំងអ្នកដំណើរតាមផ្លូវអាកាស ផ្លូវគោក និងផ្លូវទឹក។ ក្រសួងសុខាភិបាល ក៏បានបញ្ជាក់ដែរថា ទោះបីមានការលុបចោលលក្ខខណ្ឌ តម្រូវដូចមានចែងក្នុងចំណុចទី១,​និ ងទី២​ខាងលើនេះក៏ដោយ ក៏ក្រសួងសូមលើកទឹកចិត្តដល់អ្នកដំណើរទាំងអស់ គប្បីធ្វើតេស្ដរហ័សដោយខ្លួនឯង។

ទន្ទឹមនឹងនេះ អ្នកដំណើរទាំងអស់ ត្រូវបង្ហាញវិញ្ញាបនបត្រ បញ្ជាក់ការចាក់វ៉ាក់សាំងកូវីដ-១៩ នៅពេលមកដល់កម្ពុជា។ ចំពោះអ្នកដំណើរ ដែលពុំបានចាក់វ៉ាក់សាំងកូវីដ-១៩ ពេញលេញត្រូវធ្វើចត្តាឡីស័ក រយៈពេល ១៤ថ្ងៃ នៅតាមទីតាំងដែលកំណត់ ដោយក្រសួងសុខាភិបាល ឬអាជ្ញាធរមានសមត្ថកិច្ច៕

អត្ថបទ៖ ឃួន សុភ័ក្រ