ព័ត៌មានជាតិ

រដ្ឋបាលរាជធានី ខេត្ត អនុវត្តគោលនយោបាយជាតិស្តីពីមុខរបរ និងការងារ ស្តីពីការបង្កើតផែនការសកម្មភាពឆ្នាំ ២០២២-២០២៣

បានផុស

៤ years មុន

នៅ

ថ្ងៃសុក្រ ១៨ មីនា ២០២២

ដោយ

សៀមរាប ៖ នៅថ្ងៃទី១៨ ខែមីនា ឆ្នាំ២០២២នេះ គណៈកម្មការត្រួតពិនិត្យ និងវាយតម្លៃ លើការអនុវត្តគោលនយោបាយជាតិ ស្តីពីមុខរបរ និងការងារខេត្តសៀមរាប សម្រាប់ឆ្នាំ២០១៥-២០២៥ បានរៀបចំបើកសិក្ខាសាលាមួយ ស្តីពីការបង្កើតផែនការសកម្មភាព ឆ្នាំ២០២២-២០២៣

លោក នាក់ ណេរ៉ុន អភិបាលរងខេត្ត និងជាអនុប្រធានគណៈកម្មការ មានប្រសាសន៍ថា ស្ថិតក្នុងបរិការណ៍សន្តិភាពពេញលេញ ឯកភាពជាតិ និងស្ថិរភាព នយោបាយ សេដ្ឋកិច្ចកម្ពុជា កំពុងបន្តទទួលបាននូវការរីកចម្រើនលើគ្រប់វិស័យ នឹងបានឈានដល់ដំណាក់កាលនៃការប្រែប្រួលរចនាសម្ព័ន្ធសេដ្ឋកិច្ច ពីប្រទេសដែលពឹងផ្អែកលើវិស័យកសិកម្មទៅជាប្រទេសដែលពឹងផ្អែកលើវិស័យឧស្សាហកម្ម ព្រមទាំងកំពុងឈានទៅសម្រេចបានជាប្រទេសដែលមានកម្រិតចំណូលមធ្យម នាពេលដ៏ខ្លីខាងមុខ។

លោកបន្តថា ការបន្តពង្រីកទីក្រុង និងការកើនឡើង យ៉ាងឆាប់រហ័សនូវសកម្មភាពពាណិជ្ជកម្ម និងវិនិយោគនៅតាមទីក្រុង បានជំរុញឱ្យកើនឡើងនូវកម្លាំងពលកម្មចំណាកស្រុក ពីជនបទមកកាន់ទីក្រុង ជាពិសេស ខណៈដែលបរិការណ៍បងប្អូនប្រជាជនកម្ពុជា សម្បូរទៅដោយពលករយុវ័យក្មេងៗ ការបណ្តុះបណ្តាលវិជ្ជាជីវៈ ជូនពលករទាំងនេះ អាចនឹងផ្ដល់ភាគលាភខ្ពស់ដល់កំណើនសេដ្ឋកិច្ចតាមរយៈការធានាបាននូវការងារសមរម្យ ដែលអាចធ្វើឱ្យប្រសើរឡើងនូវជីវភាពសេចក្តីថ្លៃថ្នូរ និងសុខដុមរមនាក្នុងសង្គម។

លោក នាក់ ណេរ៉ុន បានបង្ហាញថា រាជរដ្ឋាភិបាល ក៏បានដាក់ចេញនូវ”គោលនយោបាយអភិវឌ្ឍន៍វិស័យឧស្សាហកម្ម កម្ពុជាឆ្នាំ ២០១៥-២០២៥ ដែលមានចក្ខុវិស័យជំរុញកែប្រែ នឹងធ្វើ ទំនើបកម្មរចនាសម្ព័ន្ធឧស្សហកម្មនៅកម្ពុជា ពីឧស្សាហកម្មអតិពលកម្ម ឈានទៅឧស្សាហកម្មផ្អែកលើជំនាញត្រឹមត្រូវឆ្នាំ២០២៥ សំដៅផ្លាស់ប្តូរពីឧស្សាហកម្មដែលមានតម្លៃបន្ថែមទាប ទៅជាឧស្សាហកម្មដែលមានតម្លៃបន្ថែមខ្ពស់ ព្រមទាំងដើម្បីលើកកម្ពស់ភាពប្រកួតប្រជែង នឹងផលិតភាពការងារផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សោម ចំណាន អនុរដ្ឋលេខាធិការក្រសួងការងារ នឹងបណ្តុះបណ្តាលវិជ្ជាជីវៈ និងជាប្រធានលេខាធិការដ្ឋានគណៈកម្មការអន្តរក្រសួង បានលើកឡើងថា លេខាធិការដ្ឋាននៃគណៈកម្មការអន្តរក្រសួង ក្រសួងការងារ និងបណ្តុះបណ្តាលវិជ្ជាជីវៈ បានសម្របសម្រួលឱ្យរដ្ឋបាលរាជធានី ខេត្ត បង្កើតគណៈកម្មការរាជធានី ខេត្ត សម្រាប់អនុវត្តគោលនយោបាយជាតិ ស្តីពីមុខរបរ និងការងារឆ្នាំ២០១៥-២០២៥ ដើម្បីឲ្យស្របទៅតាមយន្តការណ៍នៃការអនុវត្តគោលនយោបាយនេះ ហើយអាស្រ័យដោយគោលនយោបាយជាតិស្តីពីមុខរបរ និងការងារនេះ គឺជាគោលនយោបាយជាតិ ការអនុវត្តគោលនយោបាយនេះឱ្យមានប្រសិទ្ធភាពទាមទារនូវកិច្ចសហការដោយមានការសម្របសម្រួលដ៏ទន់ភ្លន់រវាងវិស័យនានាជាប់ទាក់ទងទៅនឹងវិស័យមុខរបរនិងការងារ ខណៈក្រសួងការងារ និងបណ្តុះបណ្តាលវិជ្ជាជីវៈ ដើរតួតែម្នាក់ឯង ពិតជាមិនអាចទទួលរ៉ាប់រងអនុវត្តឱ្យទទួលបានជោគជ័យឡើយ។

លោក សោម ចំណាន បន្តថា យើងបានកំណត់នៅក្នុងតារាងម៉ាទ្រិក ដែលជាឧបសម្ពន្ធនៃគោលនយោបាយនេះ មានក្រសួង ស្ថាប័ន និងអង្គភាពពាក់ព័ន្ធថ្នាក់ជាតិជាច្រើន ដែលត្រូវចូលរួមអនុវត្តអំពីករណីបែបនេះ ក៏តម្រូវឱ្យមាននៅថ្នាក់ក្រោមជាតិ ឬថ្នាក់ខេត្ត ដូចគ្នានេះដែរ ហើយជាការពិតណាស់ មានសកម្មភាពមួយចំនួននៅក្នុងគោលនយោបាយនេះ កំពុងតែត្រូវបានអនុវត្តស្រាប់ ដោយក្រសួង ស្ថាប័ន និងអង្គភាពនានា តាមរយៈនៃការអនុវត្តផែនការយុទ្ធសាស្ត្រ និងបេសកកម្មរបស់សាមី អង្គភាពនីមួយៗ ព្រោះថាសកម្មភាពដែលត្រូវអនុវត្តនោះវាពិតជាមិនមែន ឬក៏មិនអាចដាច់ចេញពី សកម្មភាពដែលមាននៅក្នុងផែនការនៃសាមីអង្គភាពនីមួយៗនោះទេ៕

ដោយ ៖ គឿនវេត