សម្តេចតេជោហ៊ុន សែន ផ្តល់អង្ករ ១៤០តោន ដល់ខណ្ឌទាំង១៤ យកទៅជួយពលរដ្ឋក្រីក្រ

 
ភ្នំពេញ៖ អំណោយជាអង្គចំនួន១៤០តោនរបស់សម្ដេចអគ្គមហាសេនាបតីតេជោហ៊ុន សែននិងសម្ដេចកិត្តិព្រឹទ្ធបណ្ឌិតប៊ុនរ៉ានី ហ៊ុនសែន តាមរយៈលោក ឃួង ស្រេង អភិបាលនៃគណៈអភិបាលរាជធានីភ្នំពេញ បានប្រគល់ជូនទៅខណ្ឌទាំង ១៤ ចំណុះឲ្យរដ្ឋបាលរាជធានីភ្នំពេញ ដើម្បីបន្តយកទៅចែកជូនឱ្យបងប្អូនប្រជាពលរដ្ឋដែលជួបការលំបាកខ្វះខាតនៅក្នុងមូលដ្ឋានខណ្ឌនីមួយៗ។
នៅព្រឹកថ្ងៃទី២០ មីនានេះ រដ្ឋបាលខណ្ឌទាំង១៤ បានយកយានយន្ត មកទទួលអង្ករទាំងនេះដល់សាលារាជធានីភ្នំពេញ ដើម្បីបន្តយកទៅផ្តល់ជូនតាមសង្កាត់ និងប្រជាពលរដ្ឋមានជីវភាពខ្វះខាតបន្តទៀត។

អ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តី បានបញ្ជាក់ថា អង្ករដែលប្រគល់ជូនទៅខណ្ឌទាំង១៤ខាងលើនេះ ក្នុង១ខណ្ឌៗទទួលបានអង្ករ១០តោន។
លោក ឃួង ស្រេង ធ្លាប់បានមានប្រសាសន៍ថា បងប្អូនប្រជាពលរដ្ឋ ដែលមានបញ្ហាខ្វះខាតក្នុងជីវភាព អាចទាក់ទង មកខាងទីស្នាក់ការគណបក្សប្រជាជនកម្ពុជា តាមរយៈសង្កាត់ដែលខ្លួនរស់នៅ នោះក្រុមការងារនឹងផ្តល់ការជួយឩបត្ថម្ភ ដោយមិនទុកឲ្យពលរដ្ឋរងគ្រោះដោយការអត់ឃ្លាននោះទេ ៕ស្រីរ័ត្ន