ប្រជាពលរដ្ឋក្រីក្រចំនួន ៣០០ គ្រួសារ ក្នុងក្រុងព្រៃវែងទទួលបានអំណោយពីលោកជំទាវ ញ៉ែម សាខន ស ខេង 

ព្រៃវែង៖ នៅព្រឹកថ្ងៃទី ២៤ ខែមីនា ឆ្នាំ ២០២២ លោកជំទាវ ញ៉ែម សាខន ស ខេង បានអញ្ជើញជួបសំណេះសំណាល និងចែកអំណោយមនុស្សធម៌ដល់បងប្អូនប្រជាពលរដ្ឋដែលមានជីវភាពក្រីក្រចំនួន ៣០០ គ្រួសារ មកពីសង្កាត់ចំនួន ៤ នៅក្នុងក្រុងព្រៃវែង។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែនៅក្នុងឱកាសនោះ លោក ស សុខា រដ្ឋលេខាធិការក្រសួងអប់រំយុវជន និងកីឡា បានមានប្រសាសន៍ថា ក្រោមការដឹកនាំប្រកបដោយគតិបណ្ឌិត របស់រាជរដ្ឋាភិបាល ដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សម្ដេចតែងយកចិត្តទុកដាក់ គិតគូអំពីសុខទុក្ខរបស់បងប្អូនប្រជាពលរដ្ឋ គ្រប់ពេលវេលា គ្រប់កាលៈទេសៈ ដោយមិនប្រកាន់និន្នាការនយោបាយបក្ខពួកនិយមនោះឡើយ។

លោក បានបន្ថែមទៀតថា នៅក្នុងខេត្តព្រៃវែងនេះថ្នាក់ដឹកនាំខេត្តក៏បានរៀបចំនូវព្រឹត្តិការណ៍សំខាន់ៗជាច្រើន ធ្វើយ៉ាងណាដើម្បីបង្កភាពសប្បាយរីករាយជូនបងប្អូនប្រជាពលរដ្ឋ ក្នុងនោះខេត្តព្រៃវែងក៏បានបំបែកនៅឯកត្តកម្មទូកដែលវែងជាងគេនៅលើពិភពលោក ឈ្មោះថា (កម្ពោជិកតុត្តាខេមរាតរី) ឲ្យមហាជន ក៏ដូចជាពិភពលោកបានស្គាល់ និងបានឃើញអំពីសក្តានុពលរបស់ប្រទេសកម្ពុជា ក៏ដូចជានៅក្នុងខេត្តព្រៃវែងនេះ។

ក្នុងនោះដែរ លោក ក៏អំពាវនាវនាដល់បងប្អូនប្រជាពលរដ្ឋទាំងអស់ដែល បានចាក់វ៉ាក់សាំង ដូសទី ១ ដូសទី ២ រួច សូមបន្តទៅចាក់ដូសទី ៣ បន្តទៀត ហើយចំពោះបងប្អូនប្រជាពលរដ្ឋណាដែលមិនទាន់បានចាក់វ៉ាក់សាំងសូមអញ្ជើញទៅចាក់ឲ្យបានគ្រប់គ្នា ដើម្បីបង្ការនិងទប់ស្កាត់ការរីករាលដាលឆ្លងជំងឺកូវីដ19 និងសូមឲ្យបងប្អូនត្រូវបន្តយកចិត្តទុកដាក់អនុវត្តនូវវិធានការសុខាភិបាលក៏ដូចជារាជរដ្ឋាភិបាលបានដាក់ចេញគឺ ៣ កុំ ៣ ការពារ ឲ្យបានខ្ជាប់ខ្ជួន។ 

សូមបញ្ជាក់ថា អំណោយដែលចែកជូនពលរដ្ឋថ្ងៃនេះ មានដូចជា អង្ករ ទឹកសុទ្ធ មី ត្រីខ ទឹកត្រីទឹកស៊ីអ៊ីវ និងថវិកាមួយចំនួនផងដែរ។ សៅគ្រី