ព័ត៌មានជាតិ
អ្នកនាំពាក្យក្រសួងបរិស្ថាន៖ ធម្មជាតិអាចអត់មនុស្សបាន តែមនុស្សមិនអាចអត់ធម្មជាតិទេ
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានលើកឡើងថា ធម្មជាតិអាចអត់មនុស្សបាន ប៉ុន្តែមនុស្សមិនអាចអត់ធម្មជាតិបាននោះទេ គឺត្រូវការជាប្រចាំរាល់ថ្ងៃ។
លោក នេត្រ ភក្ត្រា បានលើកឡើងបែបនេះក្នុងឱកាសចូលរួមកម្មវិធីរត់ ប្រណាំងក្រោមប្រធានបទ “រត់ដើម្បីបរិស្ថាន ធម្មជាតិ និងសុខភាព” នៅក្រុងសែនមនោរម្យ នៃខេត្តមណ្ឌលគិរី ដែលបានទទួលវិញ្ញាបនបត្រទទួលស្គាល់ថាជាក្រុងដីស្អាតរបស់អាស៊ាន ដែលរៀបចំឡើងរវាង ក្រសួងបរិស្ថាន ក្រសួងទេសចរណ៍ រដ្ឋបាលខេត្តមណ្ឌលគិរី អង្គការ WWF និងក្រុមហ៊ុនឯកជនដៃគូនៅថ្ងៃទី២៦ ខែមីនា ឆ្នាំ២០២២ នៅក្នុងក្របខណ្ឌនៃការប្រារព្ធទិវាមួយម៉ោងសម្រាប់ភពផែនដី ដោយមានអ្នកចូលរួមប្រមាណជិត ២០០នាក់ អញ្ជើញមកពីរាជធានីភ្នំពេញ និងខេត្តមណ្ឌលគិរី។
លោក នេត្រ ភក្ត្រា បានចាត់ទុកថា កម្មវិធីនេះគឺជាឱកាសមួយសម្រាប់អ្នកស្រឡាញ់បរិស្ថាន ធនធានធម្មជាតិ និងអ្នកស្រឡាញ់សុខភាព មានឱកាសជួបជុំគ្នាដើម្បីធ្វើសកម្មភាពរួមគ្នាដើម្បីបុព្វហេតុបរិស្ថាន ធនធានធម្មជាតិ និងសុខុមាលភាពរបស់ខ្លួន។
អ្នកនាំពាក្យក្រសួងបរិស្ថានរូបនេះ បានមានប្រសាសន៍ថា កម្មវិធីរត់ដើម្បីបរិស្ថាន ធម្មជាតិ និងសុខភាពនេះ គឺជាការបង្ហាញឱ្យឃើញពីចំណងទាក់ទងគ្នារវាងមនុស្ស និងធម្មជាតិ ដែលមនុស្សចាំបាច់ត្រូវការធម្មជាតិក្នុងការទទួលបានខ្យល់ដកដង្ហើមដ៏បរិសុទ្ធ បរិស្ថាន និងអនាម័យល្អ ដើម្បីផាសុកភាពសម្រាប់មនុស្សរស់នៅ និងធម្មជាតិបានផ្តល់នូវអាហារូបត្ថម្ភ ដល់មនុស្សគ្រប់រូបយ៉ាងសម្បូរបែប។
លោកបានលើកឡើងថា ធម្មជាតិអាចអត់មនុស្សបាន ប៉ុន្តែមនុស្សមិនអាចអត់ ធម្មជាតិបាននោះទេ គឺត្រូវការជាប្រចាំរាល់ថ្ងៃ។ លោករដ្ឋលេខាធិការគូសបញ្ជាក់ថា៖ “ប្រសិនបើធម្មជាតិត្រូវបានបំផ្លាញ នោះជីវីតមនុស្សសត្វក៏ប្រឈមមុខនឹងការផ្លិចបំផ្លាញដូចគ្នា។ ការគោរព ស្រឡាញ់ ថែរក្សាអភិរក្សធនធានធម្មជាតិ គឺជាការគោរពស្រឡាញ់ជីវិតមនុស្ស។ យើងគោរពធម្មជាតិ នោះធម្មជាតិនឹងផ្តល់ការគោរព និងផលប្រយោជន៍យ៉ាងច្រើនដល់យើងវិញ”។
លោក នេត្រ ភក្ត្រា បានថ្លែងថា ចេញពីទីក្រុងសែនមនោរម្យ ខេត្តមណ្ឌលគិរី ប្រជាពលរដ្ឋនឹងយល់កាន់តែច្បាស់លាស់ថា បរិស្ថាន និងធនធានធម្មជាតិពិតជាមានសារៈសំខាន់ ហើយសុខភាពយើង ក៏កាន់តែសំខាន់ ហើយក៏ពឹងអាស្រ័យលើបរិស្ថាន ធម្មជាតិផងដែរ។
គួរបញ្ជាក់ថា ក្នុងការរត់ប្រណាំងនេះ ជ័យលាភីលេខ ១ ដល់លេខ ៣ បាន ទទួលពាន និងសម្ភារៈមួយចំនួន។ ដោយឡែក ទិវាមួយម៉ោងសម្រាប់ភពដែដី ត្រូវប្រារព្ធនៅល្ងាចថ្ងៃទី២៦ ខែមីនា ឆ្នាំ២០២២នេះ ក្រោមអធិបតីភាពលោករដ្ឋលេខាធិការក្រសួងបរិស្ថាន នេត្រ ភក្ត្រា នៅសួនច្បារក្រុងសែនមនោរម្យ និងមានអ្នកចម្រៀងល្បីគឺ អ្នកនាង មាស សុខសោភា និងតារាចម្រៀងផ្សេងទៀត និងមានការសម្តែងសិល្បៈពីជនជាតិដើមទៀតផង៕
អត្ថបទ៖ សំអឿន
-
កីឡា១ សប្តាហ៍ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៦ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ៧ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៦ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ១ សប្តាហ៍ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានជាតិ៥ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
កីឡា២ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត