សត្វស្លាប​តំបន់អភិរក្ស​ទួលពាន់តាឡី​ បឹងស្នេហ៌​ ឈឺងាប់​ជាបន្តបន្ទាប់​ ជិត​កន្លះខែ​ហើយមន្ត្រី​ជំនាញ​មិន​ទាន់ដឹង​មូលហេតុ 

សត្វស្លាបជាច្រើនប្រភេទ និងមានចំនួនរាប់ម៉ឺនក្បាល ដែលរស់នៅក្នុងតំបន់​អភិរក្សសត្វស្លាប​ទួល​ពាន់តាឡី បឹងស្នេហ៌ ក្នុងឃុំធាយ ស្រុកបាភ្នំ ខេត្តព្រៃវែង ត្រូវបានប្រជាពលរដ្ឋក្នុងសហគមន៌ និង​អាជ្ញាធរមូលដ្ឋាន រួមគ្នាការពារនិងអភិរក្សយ៉ាងតឹងរ៉ឹងបំផុត ព្រោះវាបានផ្តល់នូវប្រាក់​ចំណូលយ៉ាង​ច្រើន ដល់ប្រជាពលរដ្ឋក៏ដូចជាអាជ្ញាធរក្នុងតំបន់នោះ តាមរយៈការស្រូបទាញ​ភ្ញៀវភេសចរណ៌​រាប់​ពាន់នាក់ក្នុង១ខែៗ អោយចូលទៅទស្សនា។ 

ទោះជាយ៉ាងនេះក្តី សត្វស្លាបទាំងនេះក៏នៅតែប្រឈមនិងបញ្ហាជំងឺឆ្លង និងឈឺងាប់ជា​បន្តបន្ទាប់​រហូតដល់រាប់ពាន់ក្បាល កាលពីឆ្នាំមុន ហើយមកដល់ពេលថ្មីៗនេះ គេប្រទះឃើញថា សត្វស្លាប​ទាំងនោះ កំពុងតែសំកុកឈឺងាប់ជាបណ្តើរៗទៀតហើយ ដោយមិនដឹងថាមកពីមូលហេតុអ្វីនោះទេ បញ្ហានេះបានធ្វើអោយក្រុមភ្ញៀវទេសចរណ៌ដែលបានចូលទៅឃើញ រួមទាំងប្រជាពលរដ្ឋ​សហគមន៌​ដែលជាអ្នកទទួលបានផលប្រយោជន៌ពីសត្វស្លាបទាំងនេះ កំពុងមានការព្រួយបារម្ភ​ជាខ្លាំង និងស្នើសុំអោយមន្ត្រីជំនាញជួយចុះស្រាវជ្រាវរកមូលហេតុ និងដោះស្រាយបញ្ហានេះផង។ 

ប្រជាសហគមន៌ក្នុងតំបន់អភិរក្សសត្វស្លាបទួលពាន់តាឡី បឹងស្នេហ៌ នេះបានអោយដឹងថា សត្វស្លាប​ទាំងនេះបានចាប់ផ្តើមឈឺងាប់ ជាងកន្លះខែមកហើយ ដោយពីដំបូងពួក​វាចាប់សំកុក​លែងស៊ីចំណី ហើយប៉ុន្មានថ្ងៃក្រោយមក ក៏ចាប់ប្រកាច់ងាប់បន្តបន្ទាប់គ្នា ក្នុង១ថ្ងៃៗពី២០​ទៅ៣០​ក្បាល ហើយមកដល់ពេលនេះចំនួនសត្វដែលងាប់គឺរាប់រយក្បាលទៅហើយ និងនៅមានសត្វជា​ច្រើនក្បាលទៀតកំពុងតែឈឺសំកុកនៅក្នុងព្រៃ និងនៅតាមមាត់បឹង រងចាំថ្ងៃអស់ជីវិតមកដល់។ 

ពលរដ្ឋទាំងនោះបានបញ្ជាក់ថា សត្វស្លាបទាំងនោះងាប់រាយប៉ាយពេញព្រៃ តាមវាលស្រែ និងក្នុង​ទឹកមាត់បឹង គ្មានអ្នកណាទទួលខុសត្រូវប្រមូលយកទៅកប់ចោលនោះទេ ហើយក៏គ្មានអ្នក​ណា​ហ៊ាន​យកទៅទទួលទាននោះដែរ ព្រោះខ្លាចឆ្លងជម្ងឺពីសត្វទាំងនោះ។ 

មន្រ្តីជំនាញពេទ្យសត្វ នៃការិយាល័យផលិតកម្ម និងបសុព្យាបាល របស់មន្ទីរកសិកម្មខេត្តព្រៃវែង បានឱ្យដឹងថា មន្រ្តីជំនាញពេទ្យសត្វ បានចុះទៅពិនិត្យនិងយកសំណាកសត្វដែលឈឺងាប់នោះ បញ្ជូនទៅខាងនាយកដ្ឋាន ដើម្បីសិក្សារកមូលហេតុដែលធ្វើអោយសត្វទាំងនោះងាប់ហើយ ប៉ុន្តែ​រហូតមកដល់ពេលនេះ ខាងក្រសួងមិនទាន់បានប្រកាសពីលទ្ធផលនៃការពិនិត្យសំណាកនោះទេ ដូច្នេះហើយទើបយើងនៅមិនទាន់អាចនិយាយបានថា តើសត្វស្លាបទាំងនោះ​ងាប់ដោយសារមូល​ហេតុអ្វី? គឺទាល់តែក្រសួងប្រកាស ទើបជាចម្លើយផ្លូវការ៕