សមត្ថកិច្ចខេត្តសៀមរាបឃាត់ខ្លួនមនុស្ស៤នាក់ ខណៈកំពុងនេសាទខុសច្បាប់ក្នុងបឹងទន្លេសាប

កម្លាំងសមត្ថកិច្ចចម្រុះចុះបង្ក្រាបបទល្មើសនេសាទនៅតំបន់បឹងទន្លេសាបនៃខេត្តសៀមរាប ឃាត់ខ្លួនបានជនសង្ស័យដែលកំពុងអូសមងហ៊ុំបានចំនួន៤នាក់យកទៅសួរនាំ។   

លោក ទា គឹមសុទ្ធ ប្រធានមន្ទីរកសិកម្មរុក្ខាប្រមាញ់និងនេសាទខេត្តសៀមរាប បានឲ្យដឹងនៅថ្ងៃទី៦ ខែមេសាឆ្នាំ២០២២នេះថា គិតចាប់ពីថ្ងៃទី០២ ខែមីនា ដល់ថ្ងៃទី០៦ ខែមេសា ឆ្នាំ២០២២ បានបង្ក្រាបបទល្មើសឧបករណ៍​អួនអូសទឹកសាប២០វង់ ម៉ាញ់០៣វង់ ឈឺបយន្ត០២គ្រឿង អួនហ៊ុំ០៨វង់ កាណូត៤៤គ្រឿង ម៉ាស៊ីន១៤គ្រឿង បញ្ជូនសំណុំរឿងទៅតុលាការ១១ករណី និងចេញដីកាកោះ១១នាក់។

លោកបន្តថា ថ្ងៃទី៦ខែមេសា នេះ កម្លាំងសមត្ថកិច្ចចម្រុះបានបន្តចុះស្រាវជ្រាវរហូតឃាត់ខ្លួនបានមនុស្សចំនួន៤នាក់ដែលកំពុងអូសអួននៅកណ្ដាលទន្លេសាប។ 

បច្ចុប្បន្នកម្លាំងសមត្ថកិច្ចកំពុងរៀបចំសំណុំរឿងដើម្បីបញ្ជូនជនសង្ស័យទៅតុលាការចាត់ការតាមផ្លូវច្បាប់៕

អត្ថបទ៖ កុសល