បណ្ឌិត គី សេរីវឌ្ឍន៍៖ ការចំណាយរបស់ភ្ញៀវ​ទេសចរថ្ងៃចូលឆ្នាំជាង ​៥៥០លានដុល្លារ បានហូរចេញទៅ​បរទេស ៧៥%

យោងតាមក្រសួងទេសចរណ៍ បានស្ទង់មតិបឋម ទៅលើគ្រួសារមួយដែលមានគ្នា៥នាក់ ហើយធ្វើដំណើរកម្សាន្តឆ្ងាយពីផ្ទះក្នុងរយៈពេល៣ថ្ងៃនៃពិធីបុណ្យចូលឆ្នាំថ្មី ពួកគេបានចំណាយមិនតិចជាង៥០០ដុល្លារទេ ដូច្នេះបើសរុបការចំណាយរបស់ភ្ញៀវទេសចរជាង៥លាននាក់ ដែលចេញដើរកម្សាន្តនៅថ្ងៃបុណ្យចូលឆ្នាំខ្មែរ គឺមានទំហំទឹកបា្រក់រហូតដល់ជាង ៥៥០លានដុល្លារឯណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំពោះចរន្តទឹកប្រាក់ ដែលបានគណនាចេញពីការចាយវាយរបស់ភ្ញៀវទេសចរចំនួនជាង ៥៥០លានដុល្លារនេះ បានហូរចេញទៅក្រៅប្រទេសអស់មួយចំនួនធំ។ នេះបើតាមលោកបណ្ឌិត គី សេរីវឌ្ឍន៍។

លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ច នៃរាជបណ្ឌិតសភាកម្ពុជា បានពន្យល់ថា ការចំណាយដ៏ច្រើនរបស់ពលរដ្ឋ រយៈពេល ៤ឬ៥ថ្ងៃ ក្នុងការដើរកម្សាន្តនេះ អាចចូលសេដ្ឋកិច្ចកម្ពុជា ប្រមាណតែ ២៥ ទៅ៣០ភាគរយប៉ុណ្ណោះ ខណៈ ៧០ភាគរយ-៧៥ភាគរយទៀត បានហូរចេញទៅក្រៅប្រទេសវិញ តាមរយៈមធ្យោបាយធ្វើដំណើរ ចំណាយលើប្រេងសាំង ម្ហូបអាហារ សម្លៀកបំពាក់ ដែលកម្ពុជាបាននាំចូលពីក្រៅប្រទេស។

លោកថ្លែងក្នុងសម្តីដើមដូច្នេះ« កាលចូលឆ្នាំក្នុងរយៈពេលបីបួនថ្ងៃកន្លងទៅនេះ យើងឃើញថា ភ្ញៀវទេសចរ ដែលជាភ្ញៀវក្នុងស្រុកមានដំណើរកម្សាន្តយ៉ាងសប្បាយរីករាយ ក្នុងន័យនេះ យើងឃើញការចាយវាយជាច្រើនរបស់ពួកគាត់ ត្រូវបានហូរចេញលេចធ្លាយត្រឡប់ទៅក្រៅប្រទេសវិញ ដោយសារតែម្ហូបអាហារ ប្រេងឥន្ធនៈ គ្រឿងមធ្យោបាយធ្វើដំណើរ សម្លៀកបំពាក់នានា សុទ្ធតែជារបស់នាំចូល…កម្ពុជា ទទួលបានផលចំណេញសេវាទិញលក់រាយផ្នែកសេវាកម្ម គឺមានការកើនឡើងដែលទទួលបានតែផលចំណេញទេ»។

លោកបណ្ឌិតបន្តថា«  ​ការប៉ាន់ស្មានភ្ញៀវទេសចរចំណាយមិនតិចជាង ៥០០លានដុល្លារនេះ វាគឺជាចំណាយសរុបមែន ប៉ុន្តែអ្វីដែលទទួលបានក្នុងស្រុក ពោលគឺផលិតផលក្នុងស្រុកមិនមានដល់ប៉ុណ្ណឹងទេ ដោយសារតែ ៧៥% បានហូរចេញត្រឡប់ទៅវិញអស់ហើយ»។

ទោះយ៉ាងណា រដ្ឋមន្រ្តីក្រសួងទេសចរណ៍ លោក ថោង ខុន បានបញ្ជាក់ថា ចរន្តភ្ញៀវទេសចរដ៏ច្រើននេះ បានបង្កើតជាផលប្រយោជន៍សេដ្ចកិច្ចដ៏ច្រើនទាំងនៅថ្នាក់ជាតិ និងនៅតាមមូលដ្ឋាន។ លោករដ្ឋមន្រ្តី គូសបញ្ជាក់ថា នៅតាមបណ្តាសណ្ឋាគារ ប៊ូទីក ផ្ទះសំណាក់ និងសេវាស្នាក់នៅផ្សេងៗស្ទើរគ្រប់ខេត្ត ដែលមានលទ្ធភាពបើក អាជីវកម្មឡើងវិញនោះ បានទទួលការកក់ពេញស្ទើរ ១០០%។

ជាមួយគ្នានេះ បណ្តាភោជនីយដ្ឋាន និងអាហារដ្ឋាន ក៏មានភ្ញៀវចូលស្ទើរពេញៗក្នុងរយៈពេល៣ថ្ងៃនេះ ដែលមានភាពខុសគ្នាធៀបនឹងពេលកំពុងមានវិបត្តិកូវីដ-១៩ខ្លាំង ដែលភ្ញៀវភាគច្រើនបានរៀបចំម្ហូបអាហារ ដោយខ្លួនឯងសម្រាប់បរិភោគតាមផ្លូវ។

សូមបញ្ជាក់ថា បុណ្យចូលឆ្នាំថ្មីរយៈពេល ០៣ថ្ងៃ បូករួមថ្ងៃអាទិត្យចុងសប្តាហ៍១ថ្ងៃទៀត មានភ្ញៀវទេសចរជាង ៥លាន១៧ម៉ឺននាក់ បានចេញដើរលេងកម្សាន្តទូទាំងប្រទេស។ នេះបើតាមរបាយការណ៍របស់ក្រសួងទេសចរណ៍៕

អត្ថបទ៖ ទួន សុផល