សម្ដេចតេជោ ហ៊ុន សែន៖ ​​បច្ចុប្បន្ន​ច្បាប់​វិនិយោគ​នៅ​​​កម្ពុជា ​មានលក្ខណៈល្អប្រសើរច្រើនណាស់​

សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ប្រាប់អ្នកវិនិយោគជប៉ុនថា ​​បច្ចុប្បន្ន​ច្បាប់​វិនិយោគ​នៅ​​​កម្ពុជា ​មានលក្ខណៈល្អប្រសើរច្រើនណាស់​ សូមចូលមកវិនិយោគ​ដោយរីករាយ​​​។

សម្ដេចតេជោបញ្ជាក់បែបនេះ ខណៈសម្ដេច​​បានទទួលជួបពិភាក្សាការងារជា​មួយលោក កាបាសហ្ស៊ីម៉ា អ៊ីគូអុ អភិបាលខេត្តគូម៉ាម៉ូតូ និងក្រុមហ៊ុនធុរកិច្ចចំនួន ​៨ ក្រុមហ៊ុន​ ដែលកំពុងធ្វើពាណិជ្ជកម្មនៅ​កម្ពុជា និង​កំពុងរៀបចំធ្វើពាណិជ្ជកម្មបន្ថែមទៀតនៅកម្ពុជានាពេលខាងមុខ។

នៅក្នុងជំនួបនោះ សម្ដេចតេជោ ហ៊ុន សែន បានស្វាគមន៍ចំពោះក្រុមហ៊ុនទាំងអស់ ដែលបាននឹងកំពុងធ្វើពាណិជ្ជកម្មនៅ​កម្ពុជា និងកំពុងមានគម្រោងទៅបណ្ដាក់ទុនវិនិយោគនៅក្នុងប្រ​ទេសកម្ពុជានៅពេលខាងមុខ។ ជាមួយគ្នានេះផងដែរ សម្តេចតេជោ​បានអនុញ្ញាតឱ្យក្រុមហ៊ុននីមួយៗបានលើកឡើងអំពីសកម្មភាពវិនិយោគរបស់ខ្លួន​នៅក្នុងប្រទេសកម្ពុជា ក៏ដូចជាគម្រោ​ងវិនិយោគនាពេលខាងមុខផងដែរ។​

សម្ដេចតេជោនាយករដ្ឋមន្រ្តី​បញ្ជាក់ថា៖ “បច្ចុប្បន្ននេះ ច្បាប់វិនិយោគនៅក្នុងប្រទេសកម្ពុជា គឺ​មានភាពល្អប្រសើរច្រើនសម្រាប់អ្នកវិនិយោគក្រៅប្រទេសទាំងអស់ ដែលចូលមកវិនិយោគនៅក្នុងប្រទេសកម្ពុជា”។​ បើតាមសម្ដេចតេជោ​ ការវិនិយោគនៅក្នុងប្រទេសកម្ពុជា គឺជាការរួមចំណែកយ៉ាងសំខាន់ ក្នុងការពង្រឹង​ពង្រីក ទំនាក់ទំនងសេដ្ឋកិច្ច រវាង​ប្រទេស​ទាំងពីរឲ្យកាន់​តែ​ល្អប្រសើរបន្ថែមទៀត។​

នៅក្នុង​ជំនួប​ជាមួយក្រុមហ៊ុនមីតស៊ូប៊ីស៊ី (MITSUBISHI)​ លោក Yogo KANDA ​អ្នកចាត់ការទូទៅនៃក្រុមហ៊ុនមីតស៊ូប៊ីស៊ី (MITSUBISHI) ​នៅភ្នំពេញ និងជាប្រធានសមាគមធុរកិច្ចជប៉ុនប្រចាំកម្ពុជា​ ​បាន​ជម្រាបជូនសម្ដេចតេជោ អំពីសកម្មភាពរបស់ក្រុមហ៊ុនរបស់លោកនៅក្នុងប្រទេសកម្ពុជា ជាពិសេសលោកមានក្រុមហ៊ុនចំនួន ៣ ដែល​បំបែកចេញពីក្រុមហ៊ុនធំរបស់គាត់ ដែលទីមួយ គឺក្រុមហ៊ុន MITSUBISHI Corporation ជាក្រុមហ៊ុនមួយគ្រប់គ្រងការផលិត និងដឹកជញ្ជូន ផលិតផលកាត់ដេរ ពីប្រទេសកម្ពុជា​ទៅកាន់ទីផ្សារអន្តរជាតិ ទី២ គឺក្រុមហ៊ុននាំចូលនូវរថយន្តមកកាន់ទីផ្សារកម្ពុជា និងទី៣ ជាក្រុមហ៊ុនលក់តំឡើង និងជួសជុល ថែទាំជណ្ដើរយន្ត។

នៅក្នុងជំនួបនោះ សម្ដេចតេជោ ហ៊ុនសែន ​បានចាត់ទុក​​ក្រុមហ៊ុនមីតស៊ុប៊ីស៊ី ដែលបានបើកនៅប្រទេសកម្ពុជាក្នុងឆ្នាំ១៩៩៧​ ដែល​ពេលនេះមានរយៈពេល ២៥ ​ឆ្នាំហើយ​ថា មានភាពចាស់ទុំ ហើយអ្វីដែលសំខាន់ គឺមានការផ្លាស់ប្ដូរកាន់តែប្រសើរឡើងពីមួយឆ្នាំទៅមួយឆ្នាំ។ ​អ្វីដែលទីផ្សាកម្ពុជាត្រូវការ ក៏មាន​រថយន្ត ​ជណ្តើរយន្តនេះផងដែរ ដែលក្រុមហ៊ុន​កំពុងតែវិនិយោគសព្វថ្ងៃ។ ជាមួយគ្នានោះ សម្តេចតេជោក៏ចង់ឃើញពីការនាំចេញផលិតផលកម្ពុជា​ទៅ​កាន់ទីផ្សារអន្តរជាតិផងដែរ ជាពិសេស​ផលិតផលកាត់ដេរ​។

សម្តេចតេជោនាយករដ្ឋមន្ត្រី បានសម្តែងនូវក្តីរីករាយ​ដែលសមាគមធុរកិច្ចជប៉ុនប្រចាំនៅកម្ពុជា មានកិច្ចប្រជុំជាទៀងទាត់ ជាមួយក្រុមប្រឹក្សាអភិវឌ្ឍន៍កម្ពុជា និង​ឯកអគ្គរាជទូតជប៉ុនប្រចាំនៅកម្ពុជា ក្នុងមួយឆ្នាំ ២ ដង។ សម្ដេចបានបានជំរុញបង្កើន​ទំហំពាណិជ្ជកម្មរវាងប្រទេសទាំងពីរ​បន្ថែមទៀត ជាពិសេសធ្វើយ៉ាងណាជំរុញការនាំចេញវិស័យកាត់ដេរឱ្យបានកាន់តែច្រើនទៅទីផ្សារអន្តរជាតិ ជាពិសេសទីផ្សាររបស់ប្រទេសជប៉ុន​៕

អត្ថបទ៖ កោះកែវ