សម្ដេចតេជោ ហ៊ុន សែន ណែនាំឲ្យពិភាក្សាផ្ទេរអ្នកជំងឺកូវីដ ចេញពីពហុកីឡដ្ឋានជាតិអូឡាំពិក

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានណែនាំឲ្យមន្ត្រីពាក់ព័ន្ធពិភាក្សាគ្នា ផ្ទេរអ្នកជំងឺកូវីដ-១៩ ចេញពីពហុកីឡដ្ឋានជាតិអូឡាំពិក ទៅព្យាបាលនៅមន្ទីរពេទ្យផ្សេង ដើម្បីយកពហុកីឡដ្ឋានជាតិអូឡាំពិក ទៅឲ្យផ្នែកកីឡាវិញ។

ការណែនាំនេះ បានធ្វើឡើងគ្រាដែលសម្ដេចតេជោ ហ៊ុន សែន អញ្ជើញជួបសំណេះសំណាល និងផ្តល់អនុសាសន៍ដល់កីឡាករ កីឡាការិនី និងអត្តពលិក មុនពេលចេញទៅប្រកួតកីឡាស៊ីហ្គេម (SEA Games) លើកទី៣១ នៅប្រទេសវៀតណាម នាព្រឹកថ្ងៃទី ២៨ ខែមេសា ឆ្នាំ ២០២២នេះ។

សម្ដេចតេជោនាយករដ្ឋមន្ត្រី បានថ្លែងថា រាជរដ្ឋាភិបាល បាននិងកំពុងរៀបចំមន្ទីរពេទ្យព្យាបាលជំងឺកូវីដ-១៩ ដែលអាចផ្ទុកអ្នកជំងឺបានប្រមាណ ១ម៉ឺននាក់ ហើយនឹងត្រូវបញ្ចប់នាចុងឆ្នាំនេះ ឬដើមឆ្នាំក្រោយ។

ជាមួយគ្នានេះ ដោយសារតែអ្នកជំងឺកូវីដ-១៩ នៅរាជធានីភ្នំពេញ មានការថយចុះនោះ សម្ដេចតេជោ ហ៊ុន សែន បានណែនាំឲ្យក្រសួងសុខាភិបាល អាជ្ញាធររាជធានីភ្នំពេញ និងមន្ត្រីពាក់ព័ន្ធផ្សេងទៀត ត្រូវពិភាក្សាគ្នា ដើម្បីផ្ទេរអ្នកជំងឺកូវីដ-១៩ ចេញពីពហុកីឡដ្ឋានជាតិអូឡាំពិក ទៅព្យាបាលនៅមន្ទីរពេទ្យផ្សេងវិញ។ ចំណែកឯពហុកីឡដ្ឋានជាតិអូឡាំពិក ត្រូវផ្ដល់ជូនទៅផ្នែកកីឡាវិញ ដើម្បីហ្វឹកហាត់ សម្រាប់ការប្រកួតកីឡាសំខាន់ៗ នាពេលខាងមុខ៕

អត្ថបទ៖ ឃួន សុភ័ក្រ