សម្ដេចតេជោ ហ៊ុន សែន៖ មន្ទីរពេទ្យហ្លួងម៉ែ ត្រៀមប្រែជា មន្ទីរពេទ្យឯកទេសព្យាបាលជំងឺមហារីក

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា កម្ពុជាគ្រោងនឹងយកមន្ទីរពេទ្យហ្លួងម៉ែ ប្រែជាមន្ទីរពេទ្យឯកទេសព្យាបាលជំងឺមហារីក ខណៈចំនួនអ្នកជំងឺកូវីដ-១៩ កំពុងថយចុះជាលំដាប់ និងកម្ពុជាបានត្រៀមមន្ទីរពេទ្យថ្មី សម្រាប់ព្យាបាលប្រភេទជំងឺឆ្លង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងពិធីសំណេះសំណាល និងផ្តល់អនុសាសន៍ ដល់កីឡាករ កីឡាការិនី និងអត្តពលិក មុនពេលពួកគេចេញទៅប្រកួតកីឡាស៊ីហ្គេម (SEA Game) លើកទី៣១ នៅប្រទេសវៀតណាម នៅព្រឹក ថ្ងៃទី២៨ ខែមេសា ឆ្នាំ២០២២នេះ សម្តេចតេជោ ហ៊ុន សែន មានប្រសាសន៍ថា មន្ទីរពេទ្យហ្លួងម៉ែ អាចរៀបចំជាមន្ទីរពេទ្យឯកទេស ព្យាបាលជំងឺមហារីក ព្រោះបច្ចុប្បន្នជំងឺមហារីកកើតមានច្រើន។

ស្របពេលបច្ចុប្បន្នចំនួនអ្នកជំងឺកូវីដ-១៩ កំពុងធ្នាក់ចុះ ខណៈនៅភ្នំពេញនៅសល់តែ ២៦ នាក់ សម្ដេចបានផ្ដល់អនុសាសន៍ ផ្ទេរអ្នកជំងឺនៅស្តាតនៅពេទ្យហ្លួងម៉ែ ឬមន្ទីរពេទ្យចាក់អង្រែ ដើម្បីយកស្តាតទៅជួលជុល និងផ្ដល់ឱ្យកីឡាករហ្វឹកហាត់ ត្រៀមខ្លួនក្នុងនាមកម្ពុជាជាម្ចាស់ផ្ទះប្រកួតកីឡាស៊ីហ្គេម (SEA Game) លើកទី៣២ នៅខែឧសភា ឆ្នាំ២០២៣។

ជាមួយគ្នានេះ សម្ដេចតេជោ ប្រកាសថា កម្ពុជាកំពុងសាងសង់មន្ទីរពេទ្យសម្រាប់ព្យាបាលជំងឺកូវីដ-១៩ ក៏ដូចជាជំងឺឆ្លង មានទាំងបន្ទប់សម្ភព និងវះកាត់ជាដើម ដែលមន្ទីរពេទ្យនេះអាចទទួលអ្នកជំងឺជាង ១ ម៉ឺននាក់ នឹងបញ្ចប់ការសាងសង់នៅឆ្នាំក្រោយ។

បើទោះជំងឺកូវីដ-១៩ នៅកម្ពុជា មានស្ថានភាពល្អប្រសើរយ៉ាងណា សម្ដេចតេជោ នៅតែផ្ដាំផ្ញើថា យើងមិនអាចមើលស្រាល ឬភ្លេចខ្លួនបង្ការ និងការពារគ្រប់ពេលវេលា។

យោងតាមចំណាររបស់សម្តេចតេជោហ៊ុន សែន កាលពីថ្ងៃទី ២៨ ខែមីនា ឆ្នាំ ២០២១ កន្លងទៅ មន្ទីរពេទ្យស្ត្រីនគរទេព និងត្រូវប្តូរឈ្មោះទៅជាមន្ទីរពេទ្យហ្លួងម៉ែ ដើម្បីថ្វាយព្រះមរមរាជកិត្តិយសចំពោះព្រះរាជកិច្ចដឹកនាំប្រកបដោយទសពិធរាជធម៌ តាមព្រះរាជលំងានព្រះមហាវីរក្សត្រ ព្រះវររាជបិតាឯករាជ្យជាតិខ្មែរ ព្រះមរមកោដ្ឋជាទីសក្ការៈដ៏ខ្ពង់ខ្ពស់។ ដោយឡែក ស្របតាមស្ថានភាពបច្ចុប្បន្ន មន្ទីរពេទ្យ ហ្លួងម៉ែ កំពុងព្យាបាលអ្នកជំងឺកូវីដ-១៩៕