ព័ត៌មានជាតិ
អ្នកនាំពាក្យ ៖ ការឲ្យនិយមន័យ សារព័ត៌មានរិះគន់រាជរដ្ឋាភិបាលថា ជាសារព័ត៌មានឯករាជ្យនោះ ជារឿងគ្រោះថ្នាក់បំផុត
ការឲ្យនិយមន័យសារព័ត៌មាន ដែលរិះគន់រដ្ឋាភិបាលថា ជាសារព័ត៌មានឯករាជ្យ នោះគឺជារឿងគ្រោះថ្នាក់បំផុត។ នេះជាការលើកឡើងរបស់លោក មាស សុភ័ណ្ឌ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន នៅក្នុងទិវាសេរីភាពសារព័ត៌មានពិភពលោកឆ្នាំ ២០២២ ដែលរៀបចំឡើងដោយអង្គការសមាគមចំនួន ២៤ នៅថ្ងៃទី ២ ខែឧសភានេះ។
មន្ត្រីជាន់ខ្ពស់ក្រសួងព័ត៌មានរូបនេះ បានអះអាងថា ក្រសួងព័ត៌មាន ដែលជាសេនាធិការរបស់រាជរដ្ឋាភិបាល បានផ្ដល់នូវភាពស្របច្បាប់ និងតម្លៃដល់អង្គភាពព័ត៌មានទាំងអស់ ដែលបានចុះបញ្ជីនៅក្នុងប្រទេសកម្ពុជា ទាំងក្នុងស្រុក និងក្រៅស្រុកស្មើៗគ្នា ដោយមិនបានគិតថា អង្គភាពសារព័ត៌មានណាតូច ឬអង្គភាពណាធំ ជាសារព័ត៌មានអនឡាញ ឬសារព័ត៌មានបែបប្រពៃណីនោះទេ។ ម្យ៉ាងទៀត ទោះបីជាមាននិន្នាការនយោបាយបែបណាក៏ដោយ ក្នុងនាមក្រសួងព័ត៌មាន តែងតែផ្ដល់នូវភាពស្របច្បាប់ស្មើៗគ្នា និងតម្លៃស្មើៗគ្នាទាំងអស់។
លោក មាស សុភ័ណ្ឌ បានឲ្យដឹងទៀតថា ក្រសួងព័ត៌មាន សូមលើកទឹកចិត្តទៅដល់អ្នកសារព័ត៌មាន ព្រមទាំងអង្គការសង្គមស៊ីវិល ដែលចូលរួមក្នុងទិវាសេរីភាពសារព័ត៌មានពិភពលោកឆ្នាំ ២០២២នេះ និងទាំងសមាគម ក៏ដូចជាសហគមន៍ទាំងអស់ ឲ្យសិក្សាស្វែងយល់អំពីទិដ្ឋភាពច្បាប់ ស្ដីពី របបសារព័ត៌មានឡើងវិញ ដើម្បីបញ្ចៀសកុំឲ្យមានការយល់ច្រលំពីស្មារតីរបស់ច្បាប់។
លោកអនុរដ្ឋលេខាធិការ បានបញ្ជាក់បន្ថែមថា «ខ្ញុំបារម្ភបំផុត នៅពេលដែលបងប្អូនទាំងអស់គ្នាឲ្យនិយមន័យនៃពាក្យថា សារព័ត៌មានឯករាជ្យ ដោយកំណត់នូវនិយមន័យតែមួយផ្នែក មិនមែនទាល់តែសារព័ត៌មានហ្នឹងផ្សាយតែរិះគន់ សារព័ត៌មានហ្នឹងផ្សាយប្រឆាំងតែរាជរដ្ឋាភិបាល បានហៅថា ឯករាជ្យនោះទេ នេះជាការឲ្យនិយមន័យមួយដែលគ្រោះថ្នាក់ ហើយដែលគួរឲ្យព្រួយបារម្ភ»។
បើតាមអ្នកនាំពាក្យរូបនេះ នៅពេលដែលមានការ ឲ្យនិយមន័យសារព័ត៌មានឯករាជ្យ តាមរបៀបបច្ចុប្បន្ន គឺនឹងនាំមកនូវការបែកបាក់ប្រេះស្រាំចំពោះសាមគ្គីភាព ជាពិសេសនៅក្នុងវិជ្ជាជីវៈសារព័ត៌មាន និងផ្ដល់ជាមូលដ្ឋានមួយ ដែលអាចឲ្យអ្នកសារព័ត៌មាន មានការបែងចែកបក្សពួក និងក្រុមក៏ដូចជានិន្នាការនយោបាយ ដែលជាមូលហេតុ និងជាបញ្ហាចម្បងធ្វើឲ្យមានការប៉ះពាល់ ទៅដល់សេរីភាពសារព័ត៌មាន នៅក្នុងប្រទេសកម្ពុជា។
លោកបញ្ជាក់ថា «ដូច្នេះទាំងអស់គ្នា ត្រូវចូលរួមចំណែកនៅក្នុងការទទួលខុសត្រូវ ក្នុងពេលដែលយើងទាមទារ នូវសិទ្ធិសេរីភាពដែលការពារដោយច្បាប់ យើងក៏ត្រូវបំពេញកាតព្វកិច្ចករណីយកិច្ច និងការទទួលខុសត្រូវដោយអនុលោមទៅតាមច្បាប់ និងលិខិតបទដ្ឋានគតិយុត្តដែលមានជាធរមានដែរ»។
ទិវាសេរីភាពសារព័តមាន ត្រូវបានប្រារព្ធធ្វើឡើងជារៀងរាល់ឆ្នាំ នៅថ្ងៃទី ៣ ខែឧសភា។ កម្ពុជា នឹងរៀបចំទិវាសេរីភាពសារព័ត៌មានសកលលោក លើកទី ២៩ ក្រោមអធិបតីភាពរបស់លោក ហ៊ុន ម៉ាណែត និងលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន នៅសណ្ឋាគារសុខាភ្នំពេញ ដោយមានចូលរួមពីតំណា ងអង្គការយូណេស្កូប្រចាំកម្ពុជា តំណាងស្ថាន ទូតស៊ុយអ៊ែត និងឯកអគ្គរដ្ឋទូតសហភាពអឺរ៉ុបប្រចាំកម្ពុជា ព្រមទាំងមន្ត្រីអ្នកនាំពាក្យ អ្នកសារព័ត៌មានជាតិ-អន្តរជាតិជាច្រើនរូបទៀត៕
អត្ថបទ៖ លន់ សេនី
-
ព័ត៌មានជាតិ៧ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ១ សប្តាហ៍ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៧ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ១ សប្តាហ៍ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
កីឡា៣ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត
-
ព័ត៌មានជាតិ៦ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
ជីវិតកម្សាន្ដ២ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»