ព័ត៌មានជាតិ

បណ្ណាល័យអេឡិចត្រូនិក Kumnit App ជំនាន់ទី ២ បានដាក់ឲ្យដំណើរការជាផ្លូវការ នៅកម្ពុជា

បានផុស

២ years មុន

នៅ

ថ្ងៃព្រហស្បតិ៍ ៥ ឧសភា ២០២២

ដោយ

ក្រុមហ៊ុន IDEA 3MS GLOBAL CO.,LTD បានប្រកាសដាក់សម្ពោធនូវបណ្ណាល័យអេឡិចត្រូនិក Kumnit App ជំនាន់ទី២ ( Version 2 ) ជាផ្លូវការដែលប្រារព្ធធ្វើឡើងនៅសណ្ឋាគារ Sofitel Phnom Penh Pokeethra នៅព្រឹកថ្ងៃទី ៥ ខែឧសភា ឆ្នាំ ២០២២។ កម្មនេះ ក៏មានការអញ្ជើញចូលរួមពី លោក ខៀវ កាញារីត្ធ រដ្ឋមន្ដ្រីក្រសួងព័ត៌មាន លោក ឧកញ៉ា ម៉ុង ឫទ្ធី អគ្គនាយកក្រុមហ៊ុនម៉ុងឫទ្ធីគ្រុប អ្នកនិពន្ធ និងសហគ្រិនជាច្រើនរួប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជា ឌីណា នាយកក្រុមហ៊ុន IDEA 3MS GLOBAL CO.,LTD និងជាស្ថាបនិកបណ្ណាល័យអេឡិចត្រូនិក Kumnit App បានពន្យល់ថា ដោយមើលឃើញពីអត្ថប្រយោជន៍នៃវិស័យបច្ចេកវិទ្យាដែលបាននឹងកំពុងក្លាយទៅជាចលករ មួយប្រកបដោយប្រសិទ្ធិភាព ដល់ការរួមចំណែកអភិវឌ្ឍន៍ធនធានមនុស្ស និងលើកកម្ពស់ សេដ្ឋកិច្ចសង្គមជាតិផងដែរនោះ ទើបខ្ញុំបាទ ព្រមទាំងក្រុមការងារទាំងអស់គ្នាដែលជាស្ថាបនិក បានរួមគ្នាបង្កើត App ថ្មីមួយ ដែលពួកយើងខ្ញុំឱ្យឈ្មោះថា «គំនិត» ( Kumnit ) ។ លោកបានមានប្រសាសន៍ទៀតថា «តាមការពិតយើងបានសម្ភោទ Kumnit app ជំនាន់ទីមួយមក តាំងពីដើមឆ្នាំ ២០២០ មកម្ល៉េះ គឺនៅថ្ងៃទី ៧ ខែមករា ឆ្នាំ ២០២០ គិតមកទល់ពេលនេះមានរយៈពេលជាង ២ ឆ្នាំទៅហើយ ហើយយថ្ងៃនេះផងដែរ ជាការដាក់សម្ពោធនូវ Kumnit app ជំនាន់ទី ២ ដែលអ្នកប្រើប្រាស់កាន់តែងាយស្រួលប្រើប្រាស់ជាមុន មានមុខងារច្រើនជាងមុន និងមានចំណុចពិសេសៗល្អៗច្រើនជាមុន។

ចំណុចពិសេសរបស់ Kumnit App ជំនាន់ ២ នេះគឺថា យើងនឹងអាចធ្វើការលក់ពី Online ទៅជា Offline តាមរយ:ការដាក់លក់សៀវភៅរបស់យើងនៅគ្រប់ទីតាំង Mart ក៏ដូចជាបណ្ណាគារលក់សៀវភៅផ្សេងដូចសៀវភៅបោះពុម្ពធម្មតាដែរ យើងគ្រាន់តែព្រីននៅCover សៀវភៅនីមួយៗ នឹង មាន QR code បន្ទាប់ពីនោះអតិថិជន គិតលុយរួច Scanនោះលោកអ្នកនឹងអាចអានបាន និង ស្តាប់បាននៅក្នុងទូរស័ព្ទដៃបានភ្លាមៗតែម្តង។ « Kumnit App » អាចនិយាយបានថា ជាបណ្ណាល័យ Electronic ដ៏ធំមួយដែលអ្នកអានអាចស្វែងរកបាននូវ កម្រងសៀវភៅព័ត៌មាន និងមេរៀនល្អៗប្រកបដោយភាពសម្រិតសម្រាំង សម្រាប់យកមកអានដើម្បីបង្កើននូវចំណេះដឹង ចំណេះធ្វើ បទពិសោធន៍ ភាពប្រឈម ព្រមទាំងដំណោះស្រាយផ្សេងៗតាមរយៈSmart phone របស់យើងទាំងអស់គ្នា ដែលវាស្របទៅនឹងភាពជឿនលឿននៃសម័យកាលបច្ចេកវិទ្យានេះឯង។

សូមរំលឹកថា គោលបំណងក្នុងការបង្កើតឡើងនៅ Kumnit App មួយនេះឡើង គឺមាន ៣ ធំៗ គោលបំណងធំទី ១ គឺដើម្បីលើកទឹកចិត្ត ជំរុញទឹកចិត្ត និងបំផុសបំផុលឲ្យប្រជាពលរដ្ឋខ្មែរទាំងអស់ ជាពិសេសសិស្ស និស្សិត យុវជនក៏ដូចជាសហគ្រិនទូទៅផងដែរ អោយពួកគាត់ចាប់ផ្តើម ស្រលាញ់ការអាន ចាប់ផ្តើមស្រលាញ់ការអភិវឌ្ឍន៍ខ្លួនឯង តាមរយៈការអាន ឬ មើលសៀវភៅតាមលក្ខណៈ Digital book ដែលវាជួយផ្តល់នូវភាពងាយស្រួលទៅដល់អ្នកអានទូទៅ ដើម្បីឲ្យពួកគាត់អាចស្រាវជ្រាវសិក្សារៀនសូត្របានគ្រប់ពេលវេលា និងគ្រប់ទីកន្លែងផងដែរ។ ចំណែកគោលបំណងធំទី ២ ដើម្បីលើកស្ទួយ ស្នាដៃអ្នកនិពន្ធក្នុងស្រុកឲ្យពួកគាត់ មានប្រភពចំណូលមួយផ្នែកកទៀត តាមរយៈការដាក់លក់សៀវភៅរបស់ពួកគាត់ នៅក្នុង App មួយនេះ ។លើសពីនេះទៅទៀត នឹងចូលរួមធ្វើការផ្សព្វផ្សាយអំពីកិត្តិនាម ស្នាដៃរបស់ពួកគាត់ ដើម្បីឲ្យពួកគាត់ទទួលបានទាំងចំណូលព្រមទាំងភាពល្បីល្បាញទាំងនៅក្នុងស្រុកនិង ចេញទៅសាកលលោកផងដែរ។ ចំពោះគោលបំណងធំទី ៣ គឺដើម្បីចូលរួមជាផ្នែកមួយក្នុងការអភិវឌ្ឍន៍វិស័យអប់រំបែប Digital និង ចូលរួមអភិវឌ្ឍន៍ធនធានមនុស្យប្រទេសកម្ពុជាឲ្យកាន់តែមានភាពល្អប្រសើរឡើងថែមមួយកំរិតទៀតផងដែរ៕