ទឹកហូរ​ច្រោះ​បាក់ច្រាំង​ទន្លេ ​ស្ទឹងព្រែកត្នោត​ មជ្ឍដ្ឋាន​ថា​មកពី​សាឡង់​បូមខ្សាច់

ទឹកហូរ​ច្រោះធើ្វឱ្យ​បាក់ស្រុតច្រាំងមាត់ស្ទឹងព្រែកត្នោត​ ចាប់ពីស្ពានថ្មតាខ្មៅ​ រហូតដល់វិហារ​លោក​តា សា ថៃជឺ ដែលមានប្រវែងជាង ២០០ម៉ែត្រ ស្ថិតនៅក្នុង សង្កាត់តាខ្មៅ ក្នុងក្រុងតាខ្មៅ ខេត្ត​កណ្តាលនៅថ្ងៃទី០៩ ខែឧសភា ឆ្នាំ២០២២ អាជ្ញាធរខេត្តកណ្តាល សហការជាមួយ​មន្ត្រីជំនាញ​សាលាក្រុងតាខ្មៅ ចុះត្រួតពិនិត្យមើល និងពិភាក្សា។

​មជ្ឍដ្ឋានជាច្រើនបានលើកឡើងថា​ បញ្ហារនេះមិនមែនកើតឡើងម្តងនោះទេ​ គឺច្រើនដងហើយ​ អាជ្ញាធរ​ចេះតែដាក់បន្ទុកទៅលើទឹកហូរច្រោះទៅវិញ​។ បើខែវស្សា​ ឬមេឃភ្លៀវខ្លាំងទឹកជំនន់​ ទើបស័ក្ដិសមបន្តិច ប៉ុន្តែនេះជាខែប្រាំង ហេតុអ្វីទឹកហូរច្រោះបាក់នោះ បើទឹកនោះហូរ​រហូតតែប៉ុណ្ណឹង​ហើយ។

ពួកគាត់បន្ថែមទៀតថា ការបាក់នេះដោយសារសាឡង់បូមខ្សាច់តែម្តង រាល់ថ្ងៃបូមច្រើន​សាឡង់​ណាស់ មានសាឡង់​បូមផង សាឡង់ដឹកយកមកផងយូៗទៅវាខូងខាងក្នុង​បានធ្វើអោយបាក់​បែប​នេះ បើនៅបន្តរអោយបូមទៀតនោះ ច្រាំងមាត់ស្ទឹងព្រែកត្នោតបន្តរបាក់រហូត។

ដោយឡែកបងប្រុសម្នាក់សុំមិនបញ្ចេញឈ្មោះបានប្រាប់ឱ្យដឹងថា ឈប់ចំណាយលុយធ្វើ​ជាប់រហូត​ទៅ គួររកអ្នកជំនាញវិស្វករសិក្សារឱ្យច្បាស់ពីកម្លាំងទឹកហូរ និងការហូរស្រុតរបស់ដី ការចាក់​ដុំថ្ម​ជួយទប់ ជាដើម សិក្សាឱ្យច្បាស់លាស់ បើធ្វើតាមតែជាងស្រមៃ ២ ទៅ ៣ ឆ្នាំធ្វើម្តងៗ។ ទឹកស្រកមានទំនាញ ទឹកឡើងមានដំណោល។

កម្ពុជាថ្មី មិនអាចសុំការបញ្ជាក់ពីលោក នូ សុវណ្ណារ៉ា អភិបាលក្រុងតាខ្មៅបានទេ នៅថ្ងៃទី ១០ ខែឧសភានេះ៕

អត្ថបទ៖ ឆៃ យ៉ា