លោក លុយ​ មិថុនា​ ដាក់​ចិត្តកាយ​បង្កើត​ឱ្យដំណើរ​ការបណ្ណាល័យ​អេឡិចត្រូនិក ​សម្ដេចតេជោ ហ៊ុន សែន

បណ្ណាល័យអេឡិកត្រូនិកសម្ដេចតេជោ ហ៊ុន សែន បានដាក់ឱ្យដំណើរការកាលពីថ្ងៃទី ៤ ខែឧសភា នៅសាលាមធ្យមវិចិត្រសិល្បៈ បន្ទាប់ពីចំណាយពេលបង្កើតជាង ៧ ឆ្នាំ។

លោក លុយ មិថុនា ស្ថាបនិកនៃបណ្ណាល័យអេឡិកត្រូនិកសម្ដេចតេជោ ហ៊ុន សែន បានឱ្យដឹង​នៅ​ថ្ងៃទី ១០ ខែឧសភានេះថា លោកប្រើឈ្មោះបណ្ណាល័យ ប៉ុន្តែជាក់ស្ដែងវាជាគេហទំព័រមួយ ដែល​បញ្ចូល​ព័ត៌មាន និងសៀវភៅពីថ្នាក់ទី១ ដល់ថ្នាក់ទី១២ ប៉ុន្តែគំនិតរបស់ក្រុមការងារផ្ទាល់តែម្ដង គឺ​ព្យា​​យាមបញ្ចូលព័ត៌មាន​ ឬស្នាដៃនិពន្ធរបស់សម្ដេចផ្សេងៗ ដែលអាច​នឹងមានសិទ្ធ​យកមកបញ្ចូល​ទៅក្នុងបណ្ណាល័យឱ្យបានច្រើនតែម្ដង​។

លោក លុយ មិថុនាបន្តថា មូលហេតុដែលលោកទុកបណ្ណាល័យនេះ​សម្រាប់ប្រជាជន ឬក៏ប្អូនៗ​និស្សិតជំនាន់ក្រោយ ដែលគាត់ចង់ស្វែងយល់ និងស្រាវជ្រាវស្នាដៃសម្ដេចផ្ទាល់ គឺចូលតែ​បណ្ណាល័យ​សម្ដេចពួកគាត់ អាចឃើញព័ត៌មាន ឬក៏សកម្មភាពផ្សេងៗ និងទី២ គាត់អាច​ឃើញ​នូវស្នា​ដៃនិពន្ធផ្សេងៗរបស់សម្ដេចថែមទៀតផង។ គំនិតទី២ យើងចង់បណ្ដុះការអានរបស់ប្អូនៗ​យុវជន ឱ្យគាត់ងាកមកចូលអានសៀវភៅវិញ ដោយសារបណ្ដាញសង្គមមានច្រើន ដែលធ្វើឱ្យយុវជនរវល់តែហ្វេសប៊ុក តិកតុក នៅពេលដែលពួកគាត់ទំនេរ។

ទន្ទឹមនឹងនេះ លោក លុយ មិនថុនា ចង់អរគុណសន្ដិភាព ដែលនៅក្នុងបណ្ណាល័យអេឡេចត្រូនិក ក្រុមការងារលោកបានគូរូប​សម្ដេចតេជោ កាលដែលសម្ដេចនៅជាយុវជនមួយ​ផ្ទាំងទុកក្នុង​បណ្ណា​ល័យ។ បន្ទាប់មកលោកក៏បានសរសេរជា សុភាសិតអប់រំមួយខ្លី ទាក់ទងនិងសន្តិភាព ដើម្បីឱ្យប្អូនៗ ដែលចូលមកអានសៀវភៅបានឃើញនូវយុវជនម្នាក់ដែលតស៊ូលះបង់សព្វគ្រប់បែបយ៉ាងគាត់ តស៊ូដើម្បីប្ដូរយកសន្តិភាពមកជូនប្រជាជន និងយុវជនសម័យនេះ។

លោក លុយ មិថុនា ស្ថាបនិកនៃបណ្ណាល័យអេឡិកត្រូនិកសម្ដេចតេជោ ហ៊ុន សែន ថ្លែងថា “ខ្ញុំចង់ឱ្យប្អូនៗ យល់ពីតម្លៃសន្តិភាព ចេះថែរក្សា​ និងស្រឡាញ់សន្តិភាព”។

បណ្ណាល័យអេឡិកត្រូនិកសម្ដេចតេជោ ហ៊ុន សែន ដែលជាបណ្ណាល័យបណ្ដុំទៅដោយព័ត៌មានល្អៗ និងចំណេះដឹងផ្សេងៗជាច្រើនត្រូវបានដាក់ប្រគល់ជូនសាលាមធ្យមវិចិត្រសិល្បៈហើយ បណ្ណាល័យនេះបង្កើតឡើងដើម្បីតបស្នងតម្លៃនៃសន្តិភាព ដោយសារសន្តិភាពទើបយើងមានឱកាសបានរៀនសូត្រ និងមានចំណេះចេះដឹង។

លោកថា នៅក្នុងបណ្ណាល័យនេះមានព័ត៌មានជាច្រើនដូចជា ព័ត៌របស់សម្ដេចតេជោ ព័ត៌មានសម្ភោធនានា ព័ត៌មានថ្នាក់ដឹកនាំ និងមានសៀវភៅឯកសារចាប់ពីថ្នាក់ទី១រហូតដល់ថ្នាក់ទី១២ និងព័ត៌មានចំណេះដឹងជាសំឡេងអាន និងជាវីដេអូជាច្រើនទៀត។បច្ចុប្បន្នក្រុមការងាររបស់លោក បានបញ្ចូលសៀវភៅបានប្រមាណ ជាង ១០០ ក្បាល ហើយត្រៀមបញ្ចូលសៀវភៅបន្ថែមទៀត។

បណ្ណាល័យអេឡិកត្រូនិក សម្ដេចតេជោ ហ៊ុន សែន បានបង្កើតឡើងកាលពីកំឡុងឆ្នាំ២០១៥ ក្រោយពីលោក លុយ មិថុនា បានជួបនឹងសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងបង្កើតសៀវភៅមួយក្បាលដែលមានចំណងជើងថា សៀវភៅអេឡិកត្រូនិក ហ៊ុន សែន ១៣ ទស្សវត្សនៃដំណើរកម្ពុជា និងបានបង្ហាញជូនសម្ដេច ហ៊ុន សែន ដោយផ្ទាល់៕