សម្ដេច​តេជោ​ ហ៊ុន សែន​៖ ​ជំហរ​អព្យាក្រឹត្យ​កម្ពុជា​មិន​ត្រូវ​ការ​ជ្រើស​រើស​យក​ប្រទេស​មួយ​ ប្រឆាំង​ប្រទេស​មួយ​

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា មានប្រសាសន៍នៅថ្ងៃទី ១២ ខែឧសភាននេះថា កម្ពុជាប្រកាន់យកជំហរអព្យាក្រឹត្យដោយមិនត្រូវការជ្រើសរើសមហាអំណាចប្រទេសណាមួយ ប្រឆាំងនឹងប្រទេសមួយនោះឡើយ តួយ៉ាងរវាង ចិន និងអាមេរិក។

សម្ដេចតេជោ មានប្រសាសន៍ថា “យើងអត់ត្រូវការជ្រើសរើសទេ ទោះបីអ្នកឯងបង្ខំឱ្យខ្ញុំជ្រើសរើស១ ក៏ខ្ញុំអត់ជ្រើសរើសដែរ។ យើងអត់ត្រូវការជ្រើសរើសវៀតណាម ទៅប្រឆាំងថៃ ទៅជ្រើសរើសថៃប្រឆាំងវៀតណាម ទៅជ្រើសរើសវៀតណាមប្រឆាំងចិន ឬយកចិនប្រឆាំងវៀតណាមគឺយើងអត់ជ្រើសរើស”។

សម្ដេចតេជោ មានប្រសាសន៍ថា ក្របខណ្ឌនៃនយោបាយរបស់កម្ពុជា​ដើរស្របជាមួយនយោបាយរបស់អាស៊ាន ហើយគំនិតផ្ដួចផ្ដើមណាក៏ដោយ នៅក្នុងក្របខណ្ឌឥណ្ឌូប៉ាស៊ីហ្វិក ឬអាស៊ីប៉ាស៊ីហ្វិច គឺកម្ពុជាត្រូវឈរលើ​គោល​ការណ៍ ៣ យ៉ាង ទី១ ត្រូវតែបម្រើដល់សន្តិភាព និងការអភិវឌ្ឍ ទី២ មិនប្រឆាំងប្រទេស​ណា​មួយ ទី៣ ត្រូវតែគោរពឯកភាពជាតិ ឯកភាពមជ្ឈភាពរបស់អាស៊ាន។

បើតាមសម្ដេចនាយករដ្ឋមន្ត្រី នេះជាគោលការណ៍៣ ដែលកម្ពុជាសម្រេចថា គាំទ្រ ឬមិនគាំទ្រ នៅក្នុងក្របខណ្ឌ ទាក់ទិន​នឹង​ឥណ្ឌូ​ប៉ា​ស៊ីហ្វិក ឬអាស៊ីប៉ាស៊ីហ្វិក៕